گه‌ڕان

Shadow Shadow
سیاسه‌تی

رۆژێك بەر لەهاتنی، شەڕی ’’16 ئۆكتۆبەر’’ دەستى پێكرد

2020.10.15 - 16:25
App store icon Play store icon Play store icon
رۆژێك بەر لەهاتنی، شەڕی ’’16 ئۆكتۆبەر’’ دەستى پێكرد

ناس کورد-

هێشتا ڕۆژێکی ماوە بۆ 16ی ئۆکتۆبەر، بەڵام شەڕی ئەو ساڵڕۆژە لەئێستاوە دەستیپێکردووە و ئەندامێکی لیژنەی ئاساییکردنەوەی دۆخی کەرکوک لەسەر پشکی پارتی بەناونیشانی "خیانەتی 16ی ئۆکتۆبەر چۆن ڕوویدا و لێکەوتەکانی چیبوون" بابەتێکی بڵاوکردووەتەوە.

کەناڵی ناس کورد لە تێلیگرام جۆین بکە   

 

شاخەوان عەبدوڵڵا، پەڕلەمانتاری پێشووی عێراق لە فراکسیۆنی پارتی و ئەندامی لیژنەی ئاساییكردنەوەی كەركوك (پێنجشەممە 15ی ئۆکتۆبەری 2020) لە نوسینێکدا لە فەیسبوکی خۆی نوسیویەتی: " خیانەتی١٦ی ئۆکتۆبەر چۆن رویداو لێکەوتەکانی چیبوون:

 

یەكەم/ شازدەی ئۆكتۆبەر ساڵڕۆژی ڕووداوێكی كارەساتبار و ناخۆشە لە مێژووی گەلەكەمان  ئەو ڕووداوە لە ئەنجامی ڕێككەوتنێكی ژێر بە ژێر و نهێنیی بەشێكی یەكێتی، بە بێ ئاگاداریی دامودەزگای فەرمی هەرێم و ئەنجوومەنی باڵای سیاسی و لایەنە سیاسییەكان و تەنانەت بە بێ ئاگاداری بەشێكی گرنگی یەكێتی و بە سەرپەرشتیی لایەنێكی بیانی و حەشد و حكوومەتی عێراقی ئەنجام درا.

 

دووەم / ئەم ڕێككەوتنە هیچ پاساوێك هەڵناگرێت و ناپاكی لە گەلی كوردستان و كەسوكاری شەهیدان و پێشمەرگە و خەبات و قوربانیدانی چەندین ساڵەی ڕۆڵەكانی كوردستان و سەرجەم لایەنە سیاسییەكان كراوە.

 

سێیەم/ ئەم ڕێككەوتنە و ڕادەستكردنی كەركووك بە بێ شەڕ و پاشەكشەپێكردنی هێزەكان بە بێ هەماهەنگی و ئاگاداریی كۆی هێزی بەرگریی كوردستان و وەزارەتی پێشمەرگە زەبرێكی گەوەری لە مۆڕاڵ و ورەی پێشمەرگە دا و پێشمەرگەشی بۆ بەرگریكردن لە ناوچە جیاجیاكان تووشی شپرزەیی وهەڵوەشانەوە كرد.

 

چوارەم/ئەم ڕووداوە بووە هۆی تێكدانی باری دەروونیی هاوڵاتیانی كوردستان و خەڵكی نیشتیمانپەروەر و نائومێدی لەناو تێكڕای نەتەوەی كورد و گەلی كوردستان دروست كرد.

 

پێنجەم/ئەم ڕووداوە کاریگەری زۆری خستە سەر ڕۆڵی کورد لە پڕۆسەی سیاسی لە عێراق  و سەرچاوەكانی هێز و داهاتی گەلی كوردستانی كردە نیوە.

 

شەشەم/ هێزی پێشمەرگەی كوردستان لە شەڕی داعش بە یەكڕیزیی تەواو لە یەك سەنگەردا بوون و قارەمانانە بەرگرییان لە كەرامەت و خاكی كوردستان كرد و ئەو خیانەتە بوە هۆی دروست بونی و درز و دووبەرەكی لەنێو ڕیزەكانی پێشمەرگە و وای لێهات لە ڕۆژانی دواتر بەشێكی هێزەكانی پێشمەرگە شەڕی بەرگرییان دەكرد و بەشێكی تریش فرمێسكی نائومێدی و حەسرەتیان دەڕشت لە دوورەوە سەیریان دەكرد.

 

حەوتەم/ ڕیفراندۆم پڕۆسەیەكی دیموكراتی و ئاشتیخوازانە و مەدەنیانەی خەڵكی كوردستان بوو و هی ئەوە نەبوو ئەو هەڕەشە و زەبر و زەنگ و ناپاكییەی بەرانبەر بكرێت.

 

هەشتەم / ڕووداوی شازدەی ئۆكتۆبەر کاریگەری لەسەر سەنگ و رۆڵی هەرێمی کوردستان لەناو ناوەندە دەولی و عەرەبییەكان بەشێوەیەکی سلبی هەبو ، تەنانەت كاریگەریی خەراپی لەسەر ئەو ناوبانگە باشە هەبوو كە كورد لەسەر ئاستی جیهانیدا بەدەستی هێنابوو بە تایبەت لە شەڕی داعش.

 

نۆیەم /ڕووداوەكانی شازدەی ئۆكتۆبەر پەیوەندی نێوان لایەنە كوردستانییەكانی تێك دا و زەمینەی بۆ دووبەرەكی و شەڕی ئیعالمی و بێ متمانەیی نێوان لایەنە سیاسیەكان خۆش كرد.

 

دەیەم /شازدەی ئۆكتۆبەر بووە هۆی تێكچوونی پەیوەندییەكانی نێوان هەرێم و بەغدا وئەو ناپاكییە ناوخۆییەی ئەنجام درا بووە هۆی بەهێزتربوونی ڕەوتی شۆڤینی و تاییفیی لەناو عێراقدا و هانی بەشێكی زۆری لایەنە عەرەبییەكانی دا بە (شیعە و سوننەوە) زیاتر و بێ باكانەتر دژایەتیی مافە ڕەواكانی گەلی كوردستان بكەن.

 

یازدەهەم /شازدەی ئۆكتۆبەر بووە هۆی ماڵوێرانی و ئاوارەبوونی ژمارەیەكی زۆوری هاووڵاتیانی كورد لە كەركووك و ناوچەكانی تری دەرەوەی هەرێم کوردستان .

 

دوازدەهەم / بەهۆی ١٦ شازدەی ئۆکتۆبەر دیسان پرۆسەی تەعریب لەناوچەکە دەستی پێکردوەو رۆژانە عەرەب هاوردە دەکرێت و بەپێچەوانەی یاسا رێگەیان پێدەرێت و کارئاسانی نیشتەجێ بونیان بۆ دەکرێت. 

 

سێزدەهەم / لەدوای شازدەی ئۆکتۆبەر سەرجەم سامانی ژێر زەویی و سەرزەوی بەتاڵان دەروات و پارەکەشی دەچێتە گیرفانی بێگانەو هەندێ لەملیشیاکان و تەنانەت خاک فرۆشانیش تا ئێستا بەرکەوتەیەکی کەمیان هەیە لەو بەتاڵان بردنەی شارەکە .

 

لە کۆتایی نوسینەکەیدا شاخەوان عەبدوڵڵا نوسیویەتی: "روورەشی بۆ خۆفرۆشان ونەفرەت لەداگیرکەرانی کوردستان ."