گه‌ڕان

Shadow Shadow
سیاسه‌تی

مامۆستایەكی یاسا: گوێ لەمشت لە زانكۆ و خوێندنی باڵادا هەن

2020.10.14 - 22:18
App store icon Play store icon Play store icon
مامۆستایەكی یاسا: گوێ لەمشت لە زانكۆ و خوێندنی باڵادا هەن

ناس کورد-

د.ئیسماعیل نامیق، مامۆستاى كۆلێژی یاسا لە زانکۆى سلێمانى پێشنیار دەکات لەجیاتى ئەوەى پۆستە باڵا و زانستییەکانى ناو زانکۆ و خوێندنى باڵا لەلایەن کۆمیتەر و مەڵبەند و بارەگا حزبییەکانەوە "خەڵکى خراپ و گوێ لەمشتیان" بۆ دابنرێت، هەوڵ بدرێت ڕادەستى خەڵکى بیانى بکرێن.

 

کەناڵی ناس کورد لە تێلیگرام جۆین بکە   

د.ئیسماعیل قادر، مامۆستاى یاسا لە زانکۆى سلێمانى لەمیانەى بڵاوکردنەوەى وتارێک لە هەژمارى خۆى لە فەیسبوک (14 تشرینی یەكەم 2020) كە "ناس كورد" دیویەتی، سەبارەت بەدۆخى سیاسى کوردستان و ململانێى سیاسى لە کوردستان دەڵێت "بەحیزبى ماڵبات حیزبى ماڵبات ناگۆڕدرێت".

 

جەختیشدەکاتەوە، حیزبێک له‌م سه‌رده‌مى نابووتى پۆست وئيداره‌دا، هەموو رێباز وگوتارى سیاسى وستراتیژى کارکردنى بریتى بێت لەداواکردنى پۆست وکڕوزانەوە وشەڕکردن بۆ پۆستى بەڕێوەبەرێک یان جێگرى بەڕێوەبەرێک، چۆن دەتوانێت حێزبێک بگۆڕێت، کەهەموو سەرۆکایەتیەکان وجومگە گرنگەکانى حوکمڕانى کۆنترۆڵ کردووە ولەبەغداد ودەرەوەش نوێنەرایەتى کورد دەکات، بەخوا ئەمە خەیاڵ پڵاویە.

 

ئەو مامۆستایەى یاسا نموونەیەک لە بوارەکەى خۆیدا دەهێنێتەوە لە زانکۆ و خوێندنى باڵا و دەڵێت "دەکرێت پۆستە باڵا و زانستیەکانى ناو زانکۆ وخوێندنى باڵا لەجیاتى ئەوەى لەلایەن کۆمیتە ومەڵبەند وبارەگا حیزبیەکانەوە، خەڵکى خراپ وگوێ لەمشتیان بۆ دابنرێت، هەوڵبدرێت خەڵکى بیانى بهێنرێت، ئەو پۆستانەیان پێ پڕ بکرێتەوە، تا زانکۆکانمان لەزانکۆ بچن نەک بارەگاى حیزبی، لەهەمان کاتدا ببن بەناوەندێکى گەورەى زانست وبیرکردنەوە، بەمە گیانى داهێنان دێتە ناو زانکۆکان وکۆمەڵگەش پێشدەکەوێت".

 

دەقى نووسینەکەى د.ئیسماعیل نامیق:

پارتى بەهێزتر دەبێت!!

سەرۆکى حکومەت راستدەکات پارتى خەڵک دەنگى پێداوە وئێستا 45 کورسى لەپەرلەماندا هەیە، جا ئەو ژمارە زۆرەى کورسى چۆن بەدەستهێناوە ئەمە بابەتێکى دیکەیە، چونکە لەهەڵبژاردن وپەرلەمان وحوکمڕانیدا ژمارەى کورسى سەنگى مەحەکە، ئیتر رێژەى دەنگدان چەند بووە وچەند نەبووە، ئەمە حوکمى لەسەر بینا ناکرێت. بۆ نموونە لەهەڵبژاردنەکانى ئەمریکادا لە 2012 رێژەى دەنگدان ( %53.6 )، و لەهەڵبژاردنەکانى 2016 رێژەى دەنگدان ( %55.6 ) بوو، لەم هەڵبژاردنەى دوایدا هیلارى کلینتۆن دوو ملیۆن وشەش سەد هەزار دەنگى لە ترەمپ زیاتر بوو، بەڵام لەبەر ئەوەى ترەمپ لەکۆى ( 538 دەنگى هەڵبژاردن، کە پێى دەوترێت electoral college واته‌ كۆمه‌ڵگه‌ى هه‌ڵبژاردن)، ( 306 ) دەنگى بەدەستهێنا لەبەرامبەردا هیلارى ( 232 ) دەنگى بەدەست هێنا، ترەمپ بەکەمینەى خەڵک وزۆرینەى کورسى حوکمى کرد وهیلاریش بەزۆرینەى خەڵک وکەمینەى ژمارەى کورسى ماڵئاوایى کرد. کەواتە ئەوەى حوکمدەکات ژمارەى کورسیە.

 

پرسیارێکى گرنگ لێرەدا سەرهەڵدەدات، ئایا چۆن ناڕەزاییەتیەکانى زۆرینەى خەڵکى کوردستان لەبەرامبەر پارتیدا بگۆڕدرێت بۆ ژمارەى کورسى پەرلەمانى؟ راستیەک هەیە ئەوەیە، کەگۆڕینى بەرامبەر بەهەمان تێڕوانین ورێباز وهەڵسوکەوتەکانى ئەو کارێکى ئاستەم ودرۆزنانەیە، بۆ نمونە ئەمریکا وبلۆکى رۆژئاوا قەت نەیانئەتوانى بەپەیڕەوکردنى سیستمى سۆسیالیستى بەسەر یەکێتى سۆڤیەتدا زاڵ بن، موحەمەد ( د. خ ) قەت نەیئەتوانى بەپەیڕەوکردنى رەفتارەکانى قورەیش بەسەریاندا زاڵ بێت وچاکسازیى بکات، موساش نەیئەتوانى نەوەى ئیسرائیل بگۆڕێت، ئیسرائیلیش نەیئەتوانى بەهەمان بیرکردنەوە وعەقڵیەتى عەرەب بەسەریاندا زاڵ بێت. کەواتە ئەمە راستیەکەیە، بەهەمان رێباز ورەویەى بەرامبەر ئاستەمە بەسەریدا زاڵ ببیت، یان بیگۆڕیت. لەکوردستاندا راستیەکى تاڵ هەیە، ئەویش ئەمەیە لەساڵى 1964 بەبیانوى خراپى پارتى وگۆڕینى ئەوەى ناونراوە رێبازى بارزانى، روبەڕوى زۆر نەهامەتى ویەکتر قڕکردن وروداوى ناخۆش بوینەتەوە، بەڵام لەبەر ئەوەى ئاراستە وهەوڵەکانى ئەم گۆڕانکارییە، یان هەر لەبنەڕەتەوە قوتابى قوتابخانەکەى بارزانى بوون، یاخود لەکۆتاییدا گەڕاونەتەوە سەر ئەو رێبازە، بۆیە ئەنجامێکى ئەوتۆیان نەبووە، دەبینین پارتى وەکو خۆى ماوەتەوە، ئەو هەوڵانەش بەدوادا هاتوون یان بەلادا هاتوون.

 

خزمینە دەبێت قەناعەت بەوە بکەن، کە بەحیزبى ماڵبات حیزبى ماڵبات ناگۆڕدرێت، حیزبێک له‌م سه‌رده‌مى نابووتى پۆست وئيداره‌دا، هەموو رێباز وگوتارى سیاسى وستراتیژى کارکردنى بریتى بێت لەداواکردنى پۆست وکڕوزانەوە وشەڕکردن بۆ پۆستى بەڕێوەبەرێک یان جێگرى بەڕێوەبەرێک، چۆن دەتوانێت حێزبێک بگۆڕێت، کەهەموو سەرۆکایەتیەکان وجومگە گرنگەکانى حوکمڕانى کۆنترۆڵ کردووە ولەبەغداد ودەرەوەش نوێنەرایەتى کورد دەکات، بەخوا ئەمە خەیاڵ پڵاویە. ئاخر حیزبێک نەتوانێت لەناوخۆیدا سود لەکادیرە باشەکانى خۆى وەربگرێت، چۆن دەتوانێت، نمونەیەکى جیاوازتر لەپارتى پێشکەش بکات، من بەرگرى لەپارتى ناکەم، بەڵام قەناعەتى تەواوم بەوەیە، حیزبێک دەتوانێت پارتى بگۆڕێت کەلەپارتى نەچێت، لەحیزبایەتی وحوکمڕانیدا، لەسەر رێبازەکەى پارتى وبارزانى رێ نەکات، ئەگەرنا پارتى لەهەڵبژاردنى داهاتوودا بەهێزتر دەبێت، چونکە خەڵک بڕواى وایە دەنگدان بەدەستى یەک باشترە وەک لەدەستى دوو!!

 

نمونەیەکى زۆر سادە، لەدەڤەرى سلێمانیدا ئەوەى پێى دەوترێت زۆنى سەوز، لەجیاتى نمایش وستایش دەکرێت زۆر بەهێمنى چاکسازیى زۆر گەورە بکرێت، ئەگەر من لەبوارەکەى خۆمدا قسە بکەم کەزانکۆ وخوێندنى باڵایە، دەکرێت پۆستە باڵا وزانستیەکانى ناو زانکۆ وخوێندنى باڵا لەجیاتى ئەوەى لەلایەن کۆمیتە ومەڵبەند وبارەگا حیزبیەکانەوە، خەڵکى خراپ وگوێ لەمشتیان بۆ دابنرێت، هەوڵبدرێت خەڵکى بیانى بهێنرێت، ئەو پۆستانەیان پێ پڕ بکرێتەوە، تا زانکۆکانمان لەزانکۆ بچن نەک بارەگاى حیزبی، لەهەمان کاتدا ببن بەناوەندێکى گەورەى زانست وبیرکردنەوە، بەمە گیانى داهێنان دێتە ناو زانکۆکان وکۆمەڵگەش پێشدەکەوێت. ئەگەر بڕواتان وایە بەحیزبى کردنى زانکۆکان ژمارەى دەنگەکانتان لەهەڵبژاردندا زیاد دەکات، دڵنیاتان دەکەمەوە هەڵەن، چونکە ئەوانەى ئێوە پۆستیان پێ دەدەن، رەنگە تەنها خاوەنى یەک دەنگى خۆیان بن، ئەمە لەحاڵەتێکدا ئەگەر دەنگ بدەن، قوتابیانى زانکۆش لەرقى رەفتارى خراپى زۆربەى ئەوانەى ئێوە بەپۆست دڵیان رازى ئەکەن وراتان گرتوون، دەنگتان پێ نادەن، کەواتە ئیتر بۆچى زانکۆ بەحیزبى دەکەن ودەیکەنە بەشێک لەبارەگا حیزبیەکانتان، ئایا چاکسازیى وا دەکرێت؟ بەم شێوەیە دەتوانن هەژمونى پارتى کەمبکەنەوە؟ بێگومان نەخێر. کەواتە بۆ ئەوەى رێ لەباڵا دەستى پارتى بگرن، دەبێت مۆدێلێکى جیاواز لەپارتى پێشکەش بکەن ولەئەو نەچن نەلەرێبازیدا نەلەرەفتاریدا، ئەگەر وانەکرێت، پارتى هەر بەپارتى پارتان دەمێنێتەوە وئەوانى دیکەش پارتى پۆست. خەڵک چیتر ئەوەى قبوڵ نیە لەناخدا مەشرەب پارتى بن وبتانەوێت بەپیشاندانى نەیارێتى بۆ پارتى پۆستى زیاتر لەپارتى وەربگرن، ئەم رێگەیە کۆن بووە، لەرابردودا تاقیکراوەتەوە وئەنجامێکى ئەوتۆى نەبووە، بۆیە رێگە راستەکە ئەوەیە، نابێت لەپارتى بچیت، بۆ ئەوەى بتوانیت لەگەڵ پارتیدا بجەنگیت، مەبەستم لەجەنگ ململانێى دیموکراسیە.

 

تێبینى/ من هیچ دوژمنایەتیەکم لەگەڵ پارتیدا نیە وحیزبێکى سیاسیە ومافى خۆیەتى کارى سیاسى خۆى بکات، بەڵام من ئەم مۆدێلەى پارتى بەمۆدێلێکى خراپ ئەزانم لەژیانى حیزبایەتى وحوکمڕانیدا، لەم روانگەیەشەوە رێگە بەخۆم ئەدەم رەخنەى لێ بگرم وهیواى ئەوە بخوازم رۆژێک لەڕۆژان بەرێگەیەکى دیموکراسى پارتى لەحوکمڕانیدا نەمێنێت.