گه‌ڕان

Shadow Shadow
سیاسه‌تی

یەکێک لە دەرمانە سەرەکییەکان لە هەرێم کەمە

بۆچی ڕێژەی مردن بە کۆرۆنا لە هەرێم زۆر زیاترە لە عێراق؟

2020.10.13 - 22:05
App store icon Play store icon Play store icon
بۆچی ڕێژەی مردن بە کۆرۆنا لە هەرێم زۆر زیاترە لە عێراق؟

ناس کورد-

ئەگەرچی ئامارەکانی توشبووانی کۆرۆنا لە هەرێمی کوردستان و عێراقیش بەردەوام زیاد دەکات، بەڵام ڕێژەی گیانلەدەستدان لە هەرێم بەراورد بە عێراق زیاترە و بەپێچەوانەوە ڕێژەی چاکبوونەوەش کەمترە، پزیشکێکیش دەڵێت، هاوڵاتیان تا تەندروستییان تێکنەچێت ناچنە نەخۆشخانە، ئەوکاتەش درەنگە بۆ چاکبوونەوە. 

کەناڵی ناس کورد لە تێلیگرام جۆین بکە   

 

لەئێستادا لە سەرانسەری عێراق 409 هەزار و 359 توشبووی ڤایرۆسی کۆرۆنا تۆمارکراون، لەو ژمارەیەش، 334 هەزار و 208 توشبوو چاکبوونەتەوە و 9970 توشبووش گیانیان لەدەست داوە، هەروەها لە هەرێم، 57 هەزار و 375 توشبوو تۆمارکراون، 35 هەزار و 705 لەوانە چاکبوونەتەوە و دوو هەزار و 40 توشبووش گیانیان لەدەستداوە.

 

بەگوێرەی وردبینییەکی ناس کورد و بە پشت بەستن بەو ئامارانە ئەوە دەردەکەوێت، لە عێراق ڕێژەی گیان لەدەستدان بە ڤایرۆسەکە %2.4، لە بەرامبەردا لە هەرێمی کوردستان ڕێژەی گیان لەدەستدان بەرزترە و %3.5ی تێپەڕاندووە.

 

هاوکات لە عێراق ڕێژەی چاکبوونەوە  %84ی تێپەڕاندووە، بەڵام ڕێژەی چاکبوونەوە لە هەرێم کەمترە و تائێستا گەیشتووەتە %62.

 

جیاوازی ڕێژەکان لە نێوان هەرێم و عێراق کە سنوری یەک وڵاتن، جێی سەرنجە و لەکاتێکیشدایە کە عێراق ماوەی چەند مانگێکە دەرمانی  "فاڤیپیراڤیر" کە لە هەرێم بە دەرمانە ڕووسییەکە ناسراوە بەکاردەهێنێت بۆ توشبووان، بەڵام لە هەرێم درەنگتر و بەڕێژەیەکی کەمتر بەکاردەهێنرێت.

 

ئاسۆ حەوێزی، وتەبێژی وەزارەتی تەندروستیی هەرێم بە ناس کوردی وت: "لەئێستادا ئێمەش ئەو دەرمانە بۆ توشبووانی کۆرۆنا بەکاردەهێنین، لەگەڵ ئەوەی هەندێک جار کێشەی نەبوونی دروست دەبێت و ڕێژەکەی کەمە، بەڵام بەگشتیی بەکاریدەهێنین بۆ توشبووان."

 

ئەو دەرمانە ئەگەرچی چارەسەری سەرەکی پەتاکە نییە و بۆ ئەو کەسانە بەکاردەهێنرێت کە نیشانەکانیان هەیە بۆ ئەوەی قورستر نەبێت لەسەریان، بەڵام نرخەکەی تا ڕادەیەک گرانە و ئەگەر وەزارەتی تەندروستی بیەوێت بیکڕێت، نرخی یەک پاکەت لە دەرمانەکە کە بەشی چوار ڕۆژ دەکات 165 دۆلارە.

 

لەگەڵ ئەوەشدا دەرمانەکە لەبازاڕدا هەیە و دەفرۆشرێت بە 200 دۆلار، جگە لەوەی ناس کورد زانیویەتی، لە وڵاتی تورکیاشەوە بە قاچاخ هاوردە دەکرێت و بەبێ مۆری وەزارەتی لە بازاڕەکاندا دەفرۆشرێت.

 

د. هێرش حەیدەر، سەرۆکی تیمی ڕووبەڕووبوونەوەی کۆرۆنا لە سلێمانی بە ناس کوردی وت: "لەئێستادا وەک بەڕێوەبەرایەتیی تەندروستیی سلێمانی ئەو دەرمانە بەپێی پێویست بۆ توشبووان بەکاردەهێنین و لەگەڵ چەند دەرمانێکی دیکەدا."

 

وتیشی: "یەکێک لە هۆکارەکانی زیادبوونی گیان لەدەستدان بە ڤایرۆسەکە، ئەوەیە هاووڵاتیان ناچن بۆ نەخۆشخانە و دەڵێن، کۆرۆنامان نییە ئەنفلۆنزایە، بەڵام کاتێک تەندروستییان تێکدەچێت ئەوکات دەچنە نەخۆشخانە، ئەوکاتیش نەخۆشییەکە کاریگەریی لەسەر دروست کردوون و چاکبوونەوەیان قورستر دەبێت."

 

د. هێرش حەیدەر ئاماژەی بەوەشكرد: "یەکێکی دیکە لە هۆکارەکانی زۆری ژمارەی گیان لەدەستدان بەتایبەت لە پارێزگای سلێمانی، ئەوەیە بەشێک لە هاووڵاتیانی پارێزگاکانی دیکەی هەرێم و عێراقیش دێنە سلێمانی بۆ چارەسەر."

 

"هەروەها لە ئامارەکانی عێراقدا پارێزگای هەڵەبجەش لەسەر سلێمانی هەژمار دەکرێت و ئەوەش ژمارەکە زیاتر دەکات."، هێرش حەیدەر وای وت.

 

سەرۆکی تیمی ڕووبەڕووبوونەوەی کۆرۆنا لە سلێمانی خەتیشیکردەوە: "جگە لەوانە هیچ هۆکارێکی دیکەی تایبەت نییە کە هۆکاری زیادبوونی ئامارەکان بێت لە هەرێم و سلێمانی بەتایبەتی."