گه‌ڕان

Shadow Shadow
سیاسه‌تی

وردەکارى بایکۆتکردنى کەرتى تەندروستى بەهۆى نەدانى مووچەوە 

2020.10.12 - 12:10
App store icon Play store icon Play store icon
وردەکارى بایکۆتکردنى کەرتى تەندروستى بەهۆى نەدانى مووچەوە 

ناس کورد-

سەرۆکی سەندیکای کارمەندانی تەندروستیی سلێمانی ڕایگەیاند، بەهۆی نەدانی موچە و بەمەبەست %90ی خزمەتگوزاریی تەندروستیی لە نەخۆشخانە حکومییەکان نەماوە، دەشڵێت، کەرتی تەندروستیی حکومیی هەرێم لە داڕماندایە.

 

کەناڵی ناس کورد لە تێلیگرام جۆین بکە   

هاوژین عوسمان، سەرۆکی لقی سلێمانی کارمەندانی تەندروستی بە ناس کوردی ڕاگەیاند : "لەڕاستیدا ئەگەر بەڕەسمی بایکۆتیش ڕانەگەیەنرێت، بەڵام ماوەی چەند مانگێکە هەر کارمەندان بایکۆتیان کردووە و هاوشێوەی ڕابردوو دەوام ناکەن و خزمەتگوزارییە تەندروستییەکان لە کەرتی حکومەت بەتەواوی پەکیان کەوتووە". 

 

وتیشی :"لەئێستادا نەشتەرگەری لە نەخۆشخانە حکومییەکاندا زۆر بە کەمی ئەنجام دەدرێت، دەتوانین بڵێین %90ی خزمەتگوزارییەکانی کەرتی تەندروستیی حکومی وەستاون و پەکیان کەوتووە".

 

سەرۆکی سەندیکای کارمەندانی تەندروستیی سلێمانی ئاماژەی بەوەشكرد، حکومەتی هەرێم زۆر خەمساردە لەو بارەیەوە و هیچ بەلایەوە گرنگ نییە کەرتی تەندروستی چی بەسەرهاتووە، هەروەها بە مەبەستیش ئەو کارە دەکرێت بۆ ڕەواجدان بە نەخۆشخانە تایبەتەکان. 

 

هاوژین عوسمان جەختیشیکردەوە، لەئێستادا کەرتی تایبەت شوێنی کەرتی حکومی گرتووەتەوە بۆ ئەو خەڵکانەی دۆخی داراییان باشە و ئەوەشی خەڵکی هەژارە دەبێت هەر چاوەڕوانی چارەسەر بێت و بەدەردی خۆیەوە ئازار بچێژێت.

 

"ئێستا کەرتی تەندروستیی لە هەرێم بووە بە بازرگانی، پزیشک هەیە لە نەخۆشخانەی تایبەت مانگی 50 ملیۆن دینار پەیدا دەکات، ئیتر بۆ هەر باسی پەرلەمانتار دەکەن، بەشێک لەو پزیشکانەش تێکەڵی بازرگانیکردن بوون" هاوژین عوسمان وای وت.

 

باسی لەوەشکرد، بەدرێژایی تەمەنی ئەم کابینەیە کارمەندان موچەیەکیان بەبێ گرفت وەرنەگرتووە، هەموو مانگێک بایکۆت و خۆپیشاندان کراوە، بەیاننامە دەرکراوە، ئینجا موچە دابەش کراوە.

 

جەختیشیکردەوە،  ئەگەر ئەم دۆخە بەوشێوەیە بەردەوام بێت، ئەوا کەرتی تەندروستیی هەرێم بەتەواوی دەڕوخێت.

 

شەوی ڕابردووش، سەباح هەورامی، بەرێوەبەری گشتیی تەندروستی لەمیانەی بەرنامەیەکی تەلەفزیۆنیدا کە ناس کورد بینیویەتى ڕایگەیاند :"به‌گشتی كه‌رتی ته‌ندروستی پاشه‌كشه‌ی كردووه‌ و به‌هۆی نه‌بوونی مووچه‌شه‌وه‌ ئه‌گه‌ری ڕوودانی كاره‌سات هه‌یه‌ له‌هه‌رێمی كوردستان".

 

داواى لە حکومەتى هەرێمى کوردستان کرد پێداویستییه‌ پزیشكییه‌كانیان بۆ دابین بكات و ده‌رگا بكاته‌وه‌ بۆ وه‌رگرتنی كارمه‌ندی ته‌ندروستی.