ناوەڕۆکى کۆبوونەوەى نوجەیفى و باڵیۆزى تورکیا  ’چى لەبارەى پەکەکە وترا’

ناس كورد- 

ئوسامە نوجێفى سەرۆكى بەرەى ڕزگارى و گەشەپێدان بۆ باسكردنى چەند دۆسیەیەک لەوانەش بارودۆخى سياسى و ڕێكکەوتنى شەنگال و بابەتى بوونى پەكەكە لەگەڵ فاتح يەڵدز باڵيۆزى توركيا كۆبوەوە.

 

کەناڵی ناس کورد لە تێلیگرام جۆین بکە   

بەرەى ڕزگارى و گەشەپێدان (11ى تشرينى يەكەمى 2020) راگەیەندراوێکى بڵاوکردەوە و تیایدا هاتووە، لە كۆبونەوەى نوجێفى و يەڵدزدا باسى پەيوەنديەكانى عێراق و توركيا و دۆسیەى سياسى و ڕێكکەوتنى شەنگال و هەڵبژاردن كراوە.

 

بەگوێرەى راگەیەندراوەکە، نوجێفى جەختى لە گەڕانەوەى ئاوارەكانى شەنگال و دەركردنى ئەوانەى خەڵكى ناوچەكە نين و گرنگى ڕاوێژى نێوان هێزە سياسيەكانى نەينەوا كردوە، پێشى وابوە هەر چارەيەك پێويستە لە بەرژەوەندى ئيرادەى هاووڵاتيانى پارێزگاكە بێت بەتايبەتى شەنگال بە عەرەب و ئێزدى و كوردەوە.

 

سەرۆكى بەرەى ڕزگارى و گەشەپێدان جەختیشى لەسەر ئەوە كردوەتەوە، كە چالاكيەكانى پەكەكە "كاريگەرى نەرێنى لە ناوچەكە دروستكردوە و گەندەڵى و تيرۆرى بڵاوكردوەتەوە".

 

لاى خۆشيەوە باڵيۆزى توركيا هێماى بۆ ئەوەكردوە، توركيا سورە لەسەر كۆتايى هێنان بە بوونى پەكەكە چونكە بۆ عێراق و توركياش خراپە و كار لەسەر قۆستنەوەى گەنجان و شوشتنەوەى مێشكيان دەكات، بۆ ئەوەش سودى لە بڵاوبونەوەى بێكارى وەرگرتوە.

 

فاتح يەڵدز پێشى وايە، ئەو شێوازەش هەمان شێوازى داعشە، ئاسودەيى خۆشى بۆ نيازى حكومەت بۆ دەركردنى سەرجەم گروپە چەكداريەكان دەربڕيوە و وتوشيەتى "توركيا چاودێرى كارەكان دەكات چونكە گرنگى پێدەدات".