گه‌ڕان

Shadow Shadow
سیاسه‌تی

’’دانی بە تۆمەتەکەیدا ناوە’’

ڕونکردنەوەیەک لە حکومەتى هەرێمەوە لەبارەى هۆکاری دەستگیرکردنی شێروان شێروانی

2020.10.11 - 15:30
App store icon Play store icon Play store icon
ڕونکردنەوەیەک لە حکومەتى هەرێمەوە لەبارەى هۆکاری دەستگیرکردنی شێروان شێروانی

ناس کورد-

ڕێکخەری ڕاسپاردە نێودەوڵەتییەکانی سەر بە حکومەتی هەرێم لەبارەی دەستگیرکردنی شێروان شێروانی، ڕۆژنامەنوس و چالاکی مەدەنی ڕایگەیاند، ناوبراو تۆمەتبارە بەوەی ئاشتەوایی کۆمەڵایەتى دەخاتە مەترسییەوە و دانی بەوەداناوە کە لە لایەنی دەرەکییەوە هاوکاری دارایی کراوە.

کەناڵی ناس کورد لە تێلیگرام جۆین بکە   

 

لە ڕاگەیەندراویکدا (11ی تشرینی یەکەمی 2020) دیندار زێباری، ڕێکخەری ڕاسپاردە نێودەوڵەتیەکان ڕایگەیاند: "لە رێکەوتى 8ی تشرینی یەکەمی 2020 شێروان شێروانى لە پارێزگای دهۆک دەستگیر کرا، ئەم رووداوەش بوو بە جێى مشت و مڕى بەشێک لە ئاژانسەکانى هەواڵ و چالاکوانانى مەدەنى."

 

ئاماژەی بەوەشكردووە: "بەڕیز (شێروان شێروانى) لەسەر فەرمانى راگرتن کە لە دادگاى لێکۆڵینەوەى دهۆک دەرچووە دەستگیر کراوە، ناوبراو تۆمەتبارە بە پێى ماددەى 156 لە یاساى سزادانى عێراقى، ژمارە (21) بۆ ساڵى 2001 کە لە پەرلەمانى هەرێمى کوردستان هەموارکراوە."

 

لەڕاگەیەندراوەکەدا ئەوەش هاتووە: "لەکاتى لێکۆڵینەوەى سەرەتایى شێروان شێروانى دانى بەوە ناوە کە ئەو لە سەرچاوەى دەرەکییەوە یارمەتی دارایی دراوە بۆ دروستکردنى ئاڵۆزى و پشێوى، ناشیرینکردن و وتنى قسەى نەشیاو بە پەرپرسان و کەسانى خاوەن پێگەى کۆمەڵایەتى دیاریکراو، هەروەها بەلاڕێدابردنى ناڕەزایى و خۆپێشاندانە ئاشتیخوازییەکان بۆ دروست بوونى توندوتیژى، هەروەها هەڕەشەکردن لە دادوەران."

 

ڕێکخەری ڕاسپاردە نێودەوڵەتییەکان باسی لەوەشکردووە: " لەو بارەیەوە لێکۆڵینەوە لەم دانپێدانانە دەکرێت لەلایەن دادوەرى لیکۆڵینەوە، شێروان شێروانى لەسەر فەرمانى دادگا دەستگیر کراوە و رێو شوێنى یاسایى لەبەرانبەردا گیراوەتە بەر."

 

جەختیشیکردووەیەوە: "ئەوەى جێگاى سەرنجە شێروانى لەدەرەوەى چوارچێوەى رۆژنامەوانییەکەى دەستگیر کراوە، تۆمەتبارە بە گوتنى قسەى نەشیا و تۆمەت دروستکردن و تێکدانى ئاشتى کۆمەڵایەتى. پێویستە لەسەر رۆژنامە نووسان و دەزگاکانى راگەیاندن هەست بە بەرپرسیارێتى بکەن و ئاسایشى نیشتیمانى نەخەنە مەترسییەوە لە ژێر ناوى ئازادى رادەربڕینەوە."

 

لەڕاگەیەندراوەکەدا ئەوەش هاتووە: "بەپێى یاساى رۆژنامەوانى لە هەرێمى کوردستان ماددە 35ى ساڵى 2007، ناتواندرێت رۆژنامەنوس دەستگیر بکرێت تەنها بە فەرمانى دادگا و رەزامەندى سەندیکاى رۆژنامەنوسان نەبێت، بە پێى ئەم یاسایەى سەرەوە هێزەکانى پۆلیس رۆژنامەنوسى تۆمەتبار و تێوەگلاو لە سەرپێچیکردن دەستگیر ناکەن، تەنها کاتێک دادگا داوادەکات بە گرتنەبەرى رێوشوێنى پێویست، لە کاتى دروستکردنى مەترسى لەسەر ئاسایشى نەتەوەیى و بڵاوکردنەوەى توندوتیژیدا بە پێى یاساى سزادانى عێراقى ژمارە 111ى ساڵى 1969 مامەڵە دەکرێت."