گه‌ڕان

Shadow Shadow
سیاسه‌تی

عێراق کرا بە 83 بازنەی هەڵبژاردن.. ’’کورسییەکانی کورد زیاد دەکات’’

2020.10.10 - 17:37
App store icon Play store icon Play store icon
عێراق کرا بە 83 بازنەی هەڵبژاردن.. ’’کورسییەکانی کورد زیاد دەکات’’

ناس کورد-

بازنەکانی هەڵبژاردنەکان لەعێراق کرا بە ٨٣ بازنە و بەرپرسێکی پێشووی کوردیش لە ئەنجومەنی کۆمسیارانی کۆمسیۆنی باڵای سەربەخۆی هەڵبژاردنەکانی عێراقیش دەڵێت، ئەگەر حزبە گەورە کوردییەکان ڕێگر نەبن، کورسییەکانی کورد لە ناوچە جێناکۆکەکان دوو بۆ سێ کورسی زیاد دەکات.

کەناڵی ناس کورد لە تێلیگرام جۆین بکە   

 

لە دانیشتنی پەرلەمانی عێراقدا (شەممە 10ی تشرینی یەکەمی 2020) دەنگ درا لەسەر دابەشکردنی بازنەکانی هەڵبژاردنەکان بەسەر 83 بازنەی هەڵبژارندا، هەرچەندە بەشێک لە کوتلەکان ناڕازیی بوون و دانیشتنەکەیان جێهێشت.

 

لەوبارەیەوە سەعید کاکەیی، ئەندامی پێشووی ئەنجومەنی کۆمسیارانی کۆمسیۆنی باڵای سەربەخۆی هەڵبژاردنەکانی عێراق و شارەزا لە هەڵبژاردنەکان لە نوسینێکدا ڕایگەیاند: " دابەشکردنی بازنەکانی ھەڵبژاردنەکان بەسەر ٨٣ بازنەی ھەڵبژاردندا بۆ گەرەنتیکردنی سەرکەوتنی ٨٣  کورسی ژنانە لە کۆی ٣٢٠ کورسی پەرلەمانی ئێستای عێراق."

 

ئاماژەی بەوەشكردووە: " بەوەش، بازنەکانی ھەڵبژاردنەکان لە پارێزگاکانی ھەرێمی کوردستاندا بریتی دەبن لە ١٢ بازنەی ھەڵبژاردن، بەم شێوەیەی خوارەوە:

 

١- پارێزگای سلێمانی؛ ١٨ کورسی، پێنج بازنە.

٢- پارێزگای ھەولێر ؛ ١٥ کورسی، چوار بازنە.

٣- پارێزگای دھۆك؛ ١١ کورسی، سێ بازنە.

 

بەوتەی سەعید کاکەیی، ھەرچی پارێزگاکانی ناوچە جێناکۆکەکانە، ئەوا بریتی دەبن لە ٥٦ بازنەی ھەڵبژاردن و بەم شێوەیەی خوارەوە دابەشدەکرێن:

١- پارێزگای نەینەوا ؛ ٣١ کورسی، ھەشت بازنە.

٢- پارێزگای دیالی؛ ١٤ کورسی، چوار بازنە .

٣- پارێزگای کەرکوك؛ ١٢ کورسی، سێ بازنە .

٤- پارێزگای سەلاحەدین؛ ١٢ کورسی، سێ بازنە .

 

سەعید کاکەیی باسی لەوەشکردووە: " بەو شێوەیە بێت، پێشبینی دەکەم بەوەی کورسییەکانی کورد لەم ناوچانەدا ٢ - ٣ کورسی زیاد بکات بەو مەرجەی حزبە  کوردستانیە گەورەکان رێگری نەکەن و گێچەڵ نەفرۆشن بە کاندیدە سەربەخۆکانی ناوچە دابڕێنراوەکانی کوردستان."

 

ئەو شارەزایە لەبواری هەڵبژاردن ئەوەشی خستووەتەڕەە، بەگشتی، ھەرچەندە ئەم دابەشکردنە نادەستورییە، بەڵام ھەنگاوێکی باش و پۆزەتیڤە بۆ زەمینەخۆشکردن و ھاتنە پێشەوەی کاندیدانی سەربەخۆ و بێلایەن لەپێناو کێبڕکێی بردنەوەی ھەندێك لە کورسیەکانی کورد لە ئەنجومەنی نوێنەرانی عێراقدا .