گه‌ڕان

Shadow Shadow
سیاسه‌تی

سەرۆکایەتى هەرێم هۆکاری نەگەڕانەوەى پێشمەرگە بۆ ناوچە جێناکۆکەکان ئاشکرا دەکات

2020.10.10 - 11:56
App store icon Play store icon Play store icon
سەرۆکایەتى هەرێم هۆکاری نەگەڕانەوەى پێشمەرگە بۆ ناوچە جێناکۆکەکان ئاشکرا دەکات

ناس کورد-

سەرباری ڕێککەوتن هەرێم و بەغدا لەسەر پێکھێنانی شەش ژوری ھەماھەنگی لە ناوچە جێناکۆکەکان، بەڵام ڕاوێژکاری سەربازیی سەرۆکی ھەرێمی کوردستان ئاشکرای کرد، ھۆکاری دواکەوتنی گەڕانەوەی پێشمەرگە بۆ ئەو ناوچانە نەبوونی سەرچاوەی بڕیارە لە بەغدا.

کەناڵی ناس کورد لە تێلیگرام جۆین بکە   

 

بابەکر زێباری، ڕاوێژکاری سەربازیی سەرۆکی ھەرێمی کوردستان (10ی تشرینی یەکەمی 2020) بە ماڵپەڕی فەرمیی پارتی ڕاگەیاند، پێشتر ڕێککەوتن ھەبووە لە نێوان ھەرێم و بەغدا بۆ پێکھێنانی ژمارەیەک ناوەندی ھەماھەنگیی ھاوبەش لە ناوچە کوردستانییەکانی دەرەوەی ئیدارەی حکومەتی ھەرێمی کوردستان، بەڵام سەرەڕای ھەبوونی ڕێککەوتن و دانوستان، پڕۆسەی کردنەوەی ناوەندە ھاوبەشەکان دواکەوتووە و دیاریش نییە کەی دەکرێنەوە و دەستبەکار دەبن.

 

بابەکر زێباری دەشڵێت، ھۆکاری دواکەوتنی کردنەوەی ناوەندی ھاوبەش بۆ ئۆپەراسیۆن، بۆ ناسەقامگیریی رەوشی عێراق و نەبوونی سەرچاوەی بڕیار لە عێراق دەگەڕێتەوە، "چونکە ھیچ ناوەندێکی بڕیار لە عێراق نییە تا بڕیاری کۆتایی لەسەر کردنەوەی ناوەندە ھاوبەشەکانی ھەماھەنگی بدات."

 

ئاماژەى بەوەشکرد، ئەگەر ناوەندی ھەماھەنگی بکرێنەوە و ھەماھەنگی بکرێت لە نێوان پێشمەرگە و ھێزە عێراقییەکاندا، ئەوە "بێگومان کاریگەری لەسەر ڕەوشی ئەمنیی ئەو ناوچانە و بەرەنگاربوونەوەی تیرۆرێستانی داعش دەبێت، چونکە بۆشایی ئەمنی دروست بووە و چەکدارانی داعش کەڵک لە بۆشایی ئەمنی وەردەگرن بۆ ئەنجامدانی کردەوەی تیرۆریستی و خۆڕێکخستنەوە."

 

هەردوو حکومەتی عێراق و هەرێمی کوردستان لەسەر دروستکردنی شەش بنکەی هاوبەشی سەربازی ڕێککەوتوون و یەکێک لە بنکەکان لەسنوری کەرکوک دەبێت، بەڵام عەرەب و تورکمانەکانی ئەو شارە لەئێستاوە ناڕەزایی دەردەبڕێن و دەڵێن، ڕێگەنادەن ئەو بنکە هاوبەشە دروست بکرێت.  

  

جێگری سوپاسالاری هێزەکانی پێشمەرگەی هەرێم دەڵێت، دروستکردنی ئەو بنکانە مانای گەڕانەوەی پێشمەرگە نییە و بەرپرسێکی یەکێتیش لە کەرکوک پێیوایە، تورکمانەکانی ئەو شارە دژایەتییەکی دێرینیان بۆ کورد هەیە و لە دەریشەوە ئاڕاستەدەکرێن.  

  

لەدوای بڵاوبوونەوەی دەنگۆی دروستکردنی بنکەکان (24ی ئابی 2020)، عەرەب و تورکمانەکانی کەرکوک ناڕەزایەتی خۆیان نیشاندا و ڕایانگەیاند، قبوڵی ناکەن، بنکەی هاوبەشی پێشمەرگە و سوپای عێراق لە کەرکوک بکرێتەوە.  

  

لەوبارەیەوە، نەجات محەمەد، لێپرسراوی ڕاگەیاندنی مەڵبەندی کەرکوکی یەکێتی بە ناس کوردی ڕاگەیاند: "عەرەب و تورکمانەکانی کەرکوک لەهەموو پرسێکدا دژی کورد دەوەستنەوە، بەتایبەتی تورکمانەکان کە بە دەستی دەرەکیش ئاڕاستە دەکرێن."  

  

وتێشی: "پێموانییە ئەو ناڕەزایەتییانە بایەخیان هەبێت، چونکە ئەو ڕێککەوتنە لەنێوان حکومەتی عێراق و هەرێمی کوردستان کراوە و بەئاسانی هەڵناوەشێتەوە."  

  

ناڕەزایەتی تورکمانەکانی کەرکوک بە دروستکردنی بنکەیەک کە چەند ئەفسەرێکی پێشمەرگەی تێدابێت لەکاتێکدایە، پێکهاتەی تورکمان لە کابینەی نۆیەمی حکومەتی هەرێمدا پشکی گەورەیان پێدراوە و خاوەنی وەزارەتێک و پۆستی سکرتێری پەرلەمانی کوردستانن.  

  

ئەو بەرپرسەی یەکێتی دەڵێت: "تاڕادەیەک تورکمانەکانی هەولێر نێوانیان لەگەڵ کورد باشترە، بەڵام لە کەرکوک دۆخەکە جیاوازە و لە هەموو پرسێکدا دەبێت دژایەتی کورد بکەن."  

  

دروستکردنی ئەو بنکانە مانای گەڕانەوەی پێشمەرگە نییە  

 لیوا قارەمان کەمال، جێگری سوپاسالاری هێزەکانی پێشمەرگە ڕەتیدەکاتەوە کردنەوەی ئەو بنکانە پەیوەندییان گەڕانەوەی هێزەکانی پێشمەرگەوە هەبێت و بەناس کوردی ڕاگەیاند: "دروستکردنی ئەو بنکە هاوبەشانە مانای ئەوە نییە پێشمەرگە دەگەڕێتەوە ئەو ناوچانە و سەربازگە دروست دەکات و لە سنورەکە بڵاودەکرێتەوە، نەخێر بەوشێوەیە نییە."  

  

ئەو بەرپرسەی وەزارەتی پێشمەرگە ڕونیکردەوە: "لەو بنکە هاوبەشانەدا چەند ئەفسەرێکی پێشمەرگە و سوپای عێراق دەبن بۆ دانانی پلان و نەخشەڕێگا و ئاڵوگۆڕکردنی زانیاری لەنێوان پێشمەرگە و سوپای عێراقدا و ئەنجامدانی ئۆپەراسیۆن دژی تیرۆرستانی داعش پێکەوە."  

  

جەختکردنەوەی هەرێمی کوردستان لە کردنەوەی ئەو بنکە هاوبەشانە لەچەندین بۆنەی جیادا، دەگەڕێتەوە بۆ ناسەقامگیری دۆخی ئەمنیی ناوچەکانی دەرەوەی ئیدارەی هەرێم، کە زیانی گیانی و مادی زۆریان لەلایەن پاشماوەکانی داعشەوە بەرکەوتووە.  

  

"زۆرینەی شتەکان کۆتایی هاتووە و بەغدا چاوەڕوانی هەرێمە"  

بەوتەی لیوا قارەمان، بنکە هاوبەشەکان لەشەش بنکە پێکدێن، دوو بنکەی سەرەکی، یەکێک لە بەغدا و یەکێک لە هەولێر، لەگەڵ چوار بنکەی لاوەکی لە کەرکوک و ناوچەکانی دیکەی دەرەوەی ئیدارەی هەرێم.  

  

جێگری سوپاسالاری پێشمەرگە ئاماژەی بەوەشكرد، لە کۆبوونەوەکانی ڕابردوودا زۆرینەی پرسەکان یەکلاکرانەوە و لەئێستادا حکومەتی عێراق چاوەڕوانی هەرێمە بۆ دیاریکردنی ئەو کەسانەی لە بنکە هاوبەشەکاندا دەبن.  

  

بەرپرسەکەی وەزارەتی پێشمەرگە پێیوایە لە کۆبوونەوەی ئەمجارەدا ئەوانەش کۆتاییان دێت و بنکەکان دەکرێنەوە، بەڵام ئاماژەی بەهیچ وادەیەک بۆ کۆبوونەوە نەکرد و وتی: "تائێستا هیچ وادەیەکمان دیارینەکردووە."