گه‌ڕان

Shadow Shadow
سیاسه‌تی

پارتی وەڵامی لێدوانەكانی لاهور شێخ جەنگی دایەوە

2020.10.08 - 08:17
پارتی وەڵامی لێدوانەكانی لاهور شێخ جەنگی دایەوە

ناس کورد-

سەرکردەیەکى پارتى دیموکراتى کوردستان وەڵامى لێدوانەکانى لاهور شێخ جەنگى دایەوە لەدوا دیداریدا لەگەڵ شاندێكی ئەمەریكا و ئاماژەى بەوە کرد " كاركردنی ئەنجوومەنی وەزیرانی هەرێمی كورستان وەك یەك تیم، بواری لەبەردەم موزایەدەكان نەهێشتۆتەوە".

 

بڵند ئیسماعیل، ئەندامى سەرکردایەتى پارتى دیموکراتى کوردستان لە میانەى لێدوانێکى بۆ میدیاى فەرمى سەرۆکى حکومەت وەڵامى لێدوانەکانى لاهور شێخ جەنگى، هاوسەرۆکى یەکێتى دایەوە کە هۆشدارى دابوو لە چاوخشاندنەوە بە ڕێککەوتنامەى نێوان یەکێتى و پارتى بۆ پێکهێنانى حکومەت.

 

سەرکردایەتییەکەى پارتى دەڵێت " هەرچەندە گرووپێكی نێو یەكێتی لەو كاتەوەی حكوومەت پێكهێندراوە، شان نادەنە بەر بەرپرسیارێتی و هەر خەریكی موزایەدە و چەواشەكارین، بەڵام پارتی پابەندە بە ڕێككەوتنەكەی لەگەڵ یەكێتی و قسەی یەكێتیش تەنیا لە یەكێتییە راستەقینەكان وەردەگرێت".

 

ڕوونیشی كردەوە  "لە بابەتی چاكسازیدا هەرچەندە حكومەتی هەرێمی كوردستان جددیانە كار لەسەر جێبەجێكردنی یاسای چاكسازی دەكات، بەڵام ئەو گرووپەی یەكێتی نەك هەر نایانەوێت جێبەجێ بكرێت، بەڵكو دەبینین كە لە سنووری ناوچەكانی زۆنی سەوزدا قاچاخچێتیی دەروازەكانی باشماخ و پەروێزخان و فڕۆكەخانەكان بە ڕوونی دیارە".

 

بڵند ئیسماعیل پێیوایە كە باشتروایە بابەتی جێبەجێكردنی ناوەڕۆكی ڕێككەوتننامەی یەكێتی و پارتی بۆ تیمی یەكێتی لە حكومەت جێبهێڵدرێت.

 

پێشتر میدیاى فەرمى یەکێتى ناوەڕۆکى کۆبوونەوە و دیدارى لاهور شێخ جەنگى، هاوسەرۆکى یەکێتى لەگەڵ دەیڤد کۆپلى، جێگرى یاریدەدەرى وەزیرى دەرەوەى ئەمریکا بۆ کاروبارى عێراق، بڵاوکردەوە. 

 

بەگوێرەى هەواڵێکى میدیاى فەرمى یەکێتى لە بەشێکى کۆبوونەوەکەدا و لەبارەی پەیوەندییەكانی نێوان یەكێتیی و پارتی، لاهور شێخ جەنگی رایگەیاند: بەشداریكردنمان لە كابینەی نۆیەم بەپێی رێككەوتنێكی ئیمزاكراو بوە و هەردوولا لەسەری رازیبووین، كە چەند خاڵێكی گرنگی لەخۆگرتوە لەوانە مەسەلەی چاكسازیی و لامەركەزیی دارایی و كارگێڕیی كە بەداخەوە تا ئێستا جێبەجێنەكراون و ئێمە لە هەوڵداین كە ئەو خاڵانە وەك خۆی جێبەجێبكرێت بۆ ئەوەی یەكێتیی ناچار نەبێت بیر لەوە بكاتەوە كە هەڵوێست وەربگرێت لەبەرامبەر جێبەجێنەكردنی خاڵەكانی رێككەوتنەكە".