گه‌ڕان

Shadow Shadow
سیاسه‌تی

هەزاران کەس داوایان پێشکەش کردووە

هەرێمی کوردستان ئامادەیە بۆ دەستپێکردنەوەى گەشتەکانی عەمرە.. ناونوسین دەستپێدەکات

2020.10.06 - 20:43
هەرێمی کوردستان ئامادەیە بۆ دەستپێکردنەوەى گەشتەکانی عەمرە.. ناونوسین دەستپێدەکات

ناس کورد- هەڤاڵ فەتاح

وتەبێژی وەزارەتی ئەوقاف و کاروباری ئاینی هەرێمی کوردستان ڕایگەیاند، لە ئێستادا بەهەزاران کەس بۆ ئەنجامدانی گەشتی عەمرە داوایان پێشکەشکردووە، ڕوونیشکردەوە، لەڕووی لۆجستی و تەکنیکی و کارگێری ئامادەکاریی تەواویان بۆ پرسەکە کردووە کە بڕیارە لەسەرەتای مانگی تشرینی دووەمی داهاتوودا دەست پێ بکات.

 

نەبەز ئیسماعیل، وتەبێژی وەزارەتی ئەوقاف و کاروباری ئاینیی هەرێمی کوردستان (5ی تشرینی یەکەمی 2020) بە ناس کوردی ڕاگەیاند: "دەستپێکردنەوە گەشتی عەمرە پەیوەستە بەدوو خاڵی سەرەکی، ڕێگەدان بە دەستپێکردنەوەی گەشتەکان لەلایەن وڵاتی سعودیەوە کە بڕیارە لەیەکی تشرینی دووەمی داهاتوودا گەشتەکان دەستپێبکەنەوە، دووەمیش پەیوەندی بە ڕەزامەندیی لیژنەی باڵای ڕوبەڕوبوونەوەی ڤایرۆسی کۆرۆنا لە هەرێمی کوردستان هەیە".

 

نەبەز ئیسماعیل ئاماژەی بەوەشکرد: "دوایین گەشتی عەمرە لە هەرێمی کوردستان بۆ وڵاتی سعودیە لە 28ی شوباتی ڕابردوودا بوو، پێشبینی دەکەین تا کۆتایی ساڵ ژمارەی ئەو کەسانەی لەمساڵدا گەشتی عەمرەیان کردووە بگاتە 30 هەزار هاوڵاتی." 

 

 وتەبێژەکەی وەزارەتی ئەوقاف و کاروباری ئاینیی هەرێمی کوردستان ئەوەشی خستەڕوو، گەشتەکانی عەمرە لە هەرێمی کوردستان لە ڕێگەی فڕۆکەخانەکانی هەولێر و سلێمانیەوە ئەنجامدەدرێن، بەهەماهەنگی وەزارەتی کاروباری ئاینیی حکومەتی هەرێمی کوردستان و 85 کۆمپانیای لاوەکی و 14 کۆمپانیای سەرەکی هەن".

 

 ڕۆژی 1ی تشرینی یەکەمی ئەمساڵ یەکەم گەشتی عەمرە لە ناوخۆی وڵاتی سعودیەوە ئەنجام درا بەڵام بە چەندین ڕێکاری خۆپارێزی لە کۆرۆنا و بە ژمارەیەکی کەمترەوە.