گه‌ڕان

Shadow Shadow
سیاسه‌تی

دوا زانیاری لەبارەی ڕاگەیاندنی ناوی وەرگیراوانی خوێندنی باڵا

2020.10.06 - 19:04
دوا زانیاری لەبارەی ڕاگەیاندنی ناوی وەرگیراوانی خوێندنی باڵا

ناس کورد-

ئەنجامدانی تاقیكردنەوەی زارەكی زانكۆكانی كوردستان بۆ خوازیارانی ماستەر و دكتۆرا نزیك دەبێتەوە لە دوو هەفتە، بەڵام تا ئێستا هیچ وادەیەك بۆ ڕاگەیاندنی ناوی وەرگیراوان دیاری نەكراوە.

 

ڕۆژی 22ی ئەیلولی 2020، بەپێی ڕێنمایی نوێی وەزارەتی خوێندنی باڵا و توێژینەوەی زانستی دەیان خوازیاری خوێندنی باڵا (ماستەر و دكتۆرا) كە پێشتر چانسی وەرگیرانیان نەبووە و مەرجی بەشداریكردنەوەیان لە تاقیكردنەوەی زارەكی تێدابوو، بەشدارییان كرد لە پڕۆسەكە، بەڵام پاش تێپەڕبوونی نزیكەی دوو هەفتە هێشتا هیچ وادەیەك بۆ راگەیاندنی لیستی كۆتایی ناوەكان و ئاشكراكردنی ئەنجامی تاقیكردنەوەكە ئاشكرا نەكراوە.


لەمبارەیەوە "ناس كورد" پەیوەندی بەسەرچاوە فەرمییەكانی وەزارەتی خوێندنی باڵا كرد (6 تشرینی دووەمی 2020)، بەڵام پێیان ڕاگەیاند، "هیچ پێشهاتێكی نوێ لەو بارەیەوە نییە".


خوازیارێك لە نوێنەرایەتی "گروپی كۆڵنادەین" كە تایبەتە بە خوازیارانی خوێندنی باڵا، ڕەخنەی لە سستی هەنگاوەكانی وەزارەت و زانكۆكان گرت لەیەكلاییكردنەوەی ئەم دۆسیەیە لەكاتێكدا ئەم تاقیكردنەوەی دوایی پشكنینی تیا نەبووە و هەمان ڕۆژ نمرە بۆ خوازیاران دانراوە، تەنها ماوە بەراوردی خاڵی كێبەركێكاران بكرێت.


ئەم نوێنەرە باسی لەوەشكرد، "وەزارەتی پەروەردە لەماوەی دوو هەفتەدا ئەنجامی تاقیكردنەوەی بەكالۆری هەزاران خوێندكاران خوێندكار لەپاش پشكنین و وردبینی بەڕێكوپێكی رادەگەیەنێت بەڵام زانكۆكان لەو وادەیەدا تاقیكردنەوەی 2_3 هەزار خوازیاریان پێ یەكلایی ناكرێتەوە".


لەپاش تاقیكردنەوەی یەكەم بۆ پڕكردنەوەی پێنج هەزار كورسی راگەیەنراوی خوێندنی باڵا (دبلۆم، ماستەر، دكتۆرا) لە شوباتی 2020 كە ناڕەزایی و رەخنەی زۆری خوازیارانی بەدوای خۆیدا هێنا، (2404) تانە لە لایەن ئەزمووندەرانەوە پێشكەش كران و پاش خستنەڕووی كەموكوڕیی و نادادییەكان، ئەنجومەنی وەزارەتی خوێندنی باڵا كۆمەڵێك رێنمایی نوێی درەركرد بۆ پێدانەوەی چانس بە خوازیاران كە یەكێكیان دووبارەكردنەوەی تاقیكردنەوە بوو بۆ ئەوانەی جاری یەكەم دەرنەچوون و كورسی بەتاڵیان هەبووە بەمەرجێك نمرەكانیان 7.5 كەمتر نەبێت لە 30 .