گه‌ڕان

Shadow Shadow
سیاسه‌تی

دوا زانیارى لەبارەى ئەنجامدەرانى هێرشە موشەکییەکان و بڕیارى داخستنى باڵیۆزخانەى ئەمریکا

2020.10.05 - 23:06
دوا زانیارى لەبارەى ئەنجامدەرانى هێرشە موشەکییەکان و بڕیارى داخستنى باڵیۆزخانەى ئەمریکا

ناس کورد-

وەزیرى دەرەوەى عێراق ئاشکرایکرد، ژمارەیەک کەس لەسەر هێرشە موشەکییەکان دەستگیرکراون و هەندێ وڵاتیش جوڵاون بۆ ئەوەى هانى ئەمریکا بدەن کە باڵیۆزخانەکەى نەکێشێتەوە.

 

فوئاد حسێن لە چاوپێکەوتنێکیدا لەگەڵ تەلەفزیۆنی فەرمی حکومەتى عێراق (5 تشرینی یەکەمی 2020) کە ناس کورد دیویەتی ڕایگەیاند، "ئەمریکا هەڕەشەى داخستنى باڵیۆزخانەى نەکردووە، بەڵکو هێرشەکان بۆسەر نێردەى دیبلۆماسی و فڕۆکەخانەکان وایلێکردوون کە بیر لە کێشانەوەى باڵیۆزخانەکەیان بکەنەوە".

 

وتیشى، "مایک پۆمپیۆ بە سەرۆک کۆمارى ڕاگەیاندووە کە ئیدارەى ئەمریکا نیگەرانە لە زیادبوونى هێرشەکان بۆ سەر ناوچەى سەوزو و فڕۆکەخانەى بەغدا".

 

فوئاد حسێن دەڵێت، کشانەوەى باڵیۆزخانەى ئەمریکا کاریگەرى دەبێت لەسەر پەیوەندى عێراق لەگەڵ زۆرێک لەنێردە ئەوروپى و عەرەبییەکان، هەندێ وڵات جوڵاون بۆ ئەوەى هانى ئەمریکا بدەن کە نەکشێتەوە.

 

دەشڵێت، ژمارەیەک کەس دەستگیرکراون کە تۆمەتبارن بە ئەنجامدانى هێرشەکان.

 

لەدواى هەڕەشەکەى ئەمدواییەى ئەمریکا بۆ داخستنى باڵیۆزخانەى لە بەغدا بەهۆى هێرشە موشەکییەکانەوە، عێراق هەوڵەکانى چڕکردووەتەوە بۆ کۆتایی هێنان بە هێرشەکان.  

 

لیوا یەحیا ڕەسوڵ وتەبێژى فەرماندەى گشتى هێزە چەکدارەکانى عێراق (4 تشرینی یەکەمی 2020) ڕایگەیاند، گەیشتوون بەسەرەداوى گرنگ لەبارەى هەڵدانى موشەک بەئاڕاستەى ناوچەى سەوز.