گه‌ڕان

Shadow Shadow
سیاسه‌تی

عێراق هەنگاوەکانى بۆ ڕاکێشانى هێڵى شەمەندەفەر و بەستنەوەى بە تورکیاوە چڕدەکاتەوە

2020.10.02 - 21:51
عێراق هەنگاوەکانى بۆ ڕاکێشانى هێڵى شەمەندەفەر و بەستنەوەى بە تورکیاوە چڕدەکاتەوە

ناس کورد-

 

وەزارەتى گواستنەوەى عێراق جێبەجێکردنى زنجیرەیەک ڕێوشوێنى ڕاگەیاند بۆ کاراکردنى هێڵى شەمەندەفەرى ناوخۆیی و دەرەکى لە پارێزگاى نەینەوا و بەستنەوەى عێراق بە تورکیاوە لەو ڕێگەیەوە.

 

وەزارەتەکە ئەمڕۆ هەینى لە بەیاننامەیەکدا ڕایگەیاند، ڕێوشوێنەکان خۆیان دەبیننەوە لە سەردانى مەیدانى چڕ بۆ کاراکردن و بوژاندنەوەى گواستنەوەى ناوخۆیی و دەرەکى پارێزگاکە.

 

ڕونیشیکردووەتەوە، کۆمپانیاى گشتى هێڵى ئاسنى عێراق بەپێی ڕاسپاردەکانى وەزارەت کاردەکات و جەختیکردووەتەوە لەسەر پێویستى کاراکردنى هێڵى ئاسن لەگەڵ تورکیا و بوژاندنەوەى پڕۆژەى ئاڵوگۆڕى بازرگانى نێوان بەغدا و ئەنقەرە لەڕێگەى ئەو دەروازە گرنگەوە.

 

وەزارەتى گواستنەوەى عێراق باسى لەوەشکردووە، چەند شوێنێکى ناوچەکە گەڕاون بۆ زانینى ئامادەکاریی و کاراکردنى هێڵى ئاسنى نێوان بەغدا و موسڵ و رەبیعە، ڕێگەچارەى گونجاو بۆ چالاککردنى هاتوچۆى گەشتیاران و کەلوپەل لەنێوان ناوەڕاست و باکور و رەنگدانەوەى ئیجابی لەو بارەیەوە.

 

پێشتر ناسر شبلى، وەزیرى گواستنەوەى عێراق ڕایگەیاندبوو، لیژنەیەکى پێکهێناوە بۆ تاوتوێکردنى پرسی کاراکردنى پلانى هێڵى ئاسنى فیشخاپور بۆ بەستنەوەى بەغدا و موسڵ و ئەستەنبوڵ بەیەکەوە.  

 

هەوڵدان بۆ کاراکردنى پلانى هێڵى شەمەندەفەرى فیشخاپور دواى ئەوەدێت کە هێڵى ئاسنى عێراق لەگەڵ تورکیا لە رێگەى سوریاوە ساڵانێکى زۆر لەکارکەوتووە.