ناس کورد-
بڕیاره سبه‌ینێ چوارشەممە ئه‌نجومه‌نی وه‌زیرانی هه‌رێمی كوردستان كۆبوونه‌وه‌ی هه‌فتانه‌ی خۆی ئه‌نجام بدات و پرسی ناوچه كوردستانییه‌كانی ده‌ره‌وه‌ی ئیداره‌ی هه‌رێمی كوردستانیش یه‌كێك ده‌بێت له ته‌وه‌ره سه‌ره‌كییه‌كانی كۆبوونه‌وه‌کە.
کەناڵی ناس کورد لە تێلیگرام جۆین بکە
خالید شوانی، وەزیری هەرێم بۆ کاروباری بەغدا لە پەیجی فەرمی خۆی لەتۆڕی کۆمەڵایەتی فەیسبوک بڵاویکردەوە: " بڕگەی یەکەمی کۆبوونەوەی سبەینێی ئەنجومەنی وەزیران تایبەتە به کەرکوک و ناوچە جێناکۆکەکان."
ئاماژەی بەوەشکردووە: "بۆ ئەو مەبەستە و لەسەر بڕیارێکی پێشووتری ئەنجومەنی وەزیران لیژنەیەکی تایبەت پڕۆژەیەکمان بۆ ئەو مەبەستە ئامادە کردووە."
خالید شوانی ئەوەشی خستووەتەڕوو: "کەرکوک و ناوچە جێناکۆکەکانی تر و دانشتووانەکەی ڕوبەڕوی قۆناغێکی دژوار بوونەتەوە و سیاسەتی تەعریب لە ناوچانە جێبەجێ دەکرێت، ڕێگریگرتن لە تەعریب و پاراستنی مافی کوردستانیانی ئەم ناوچانە ئەرکێکی نەتەوەی و نیشتمانیە."
پێشتر مەسرور بارزانی ڕایگەیاند، بەوپەڕی نیگەرانییەوە چاودێری بارودۆخی ناوچە کوردستانییەکانی دەرەوەی ئیدارەی هەرێمی کوردستان دەکەن بەتایبەت لە سنوری پارێزگای کەرکوک کە "بەداخەوە سیاسەتی بەعەرەبکردن و گۆڕینی دیمۆگرافی بەشێوەیەکی بەرنامە بۆداڕێژراو لەو ناوچانە بەردەوامە."
زیاتر بخوێنەوە: ڕاگەیەنراوێک لە مەسرور بارزانییەوە.. ’’ئیتر قبوڵی ناکەین’’
هەر دوای ئەوە، وەزارەتى دادى عێراق بڕیارى هەڵوەشاندنەوەى سەرجەم گرێبەستە کشتوکاڵییەکانى دەرکرد کە لە چوارچێوەى سیاسەتى گۆڕینى دیمۆگرافیاى ناوچە کیشەلەسەرەکانى نێوان هەرێم و بەغدا کراوە و هەروەها لەناو پارێزگاکانەوە کراوە کە دەکەونە سنورى ناو کێشەلەسەرەکانەوە.
زیاتر بخوێنەوە: حکومەتى عێراق بڕیارێکی لە بەرژەوەندی کوردی کەرکوک و ناوچە کێشەلەسەرەکان دا
