گه‌ڕان

Shadow Shadow
سیاسه‌تی

ئێران لەبارەی رەخنەگرتنی كەیهان لە سیستانی ڕوونكردنەوەیدا

2020.09.28 - 13:06
ئێران لەبارەی رەخنەگرتنی كەیهان لە سیستانی ڕوونكردنەوەیدا

ناس کورد-

وەزارەتى دەرەوەى ئێران لەسەر ڕەخنەکانى ڕۆژنامەى کەیهان لە مەرجەعى باڵاى شیعەکانى عێراق هاتە دەنگ و دەڵێت ئەوە هەڵوێستى کۆمارى ئیسلامیى نیە و پێگەى ناوبراو مایەى ڕێزگرتنێکى گەورەیە لەلایان.

 

ئەمڕۆ (دووشەممە، 28ى ئەیلولى 2020) لەمیانەى ئەنجامدانى کۆنگرەیەکى ڕۆژنامەوانیدا، سەعید خەتیب زادە وتەبێژى وەزارەتى دەرەوەى ئێران ڕایگەیاند، ئەو کارەى ڕۆژنامەى کەیهان بەرامبەر عەلى سیستانى، مەرجەعى باڵاى شیعەکانى عێراق کردوویەتى هیچ پەیوەندییەکى بەدەسەڵاتدارانى فەرمیى ئێرانەوە نیە.

 

ڕونیشیکردەوە، ڕژێمى ئیسلامى ئێران لەسەر بنەماى مەرجەعیەت دامەزراوە ومەرجەعیەتیش لەئێران و عێراقیش ئاسایش و ئاشتى هەردوو وڵات دەپارێزن.

 

وتەبێژەکەى وەزارەتى دەرەوەى ئێران جەختى لەسەر ئەوەش کردەوە، ڕۆڵى سیستانى لەعێراقدا هیچ جێگرەوەیەکى نیە و هەروەها پێگەیەکى بەرزى لەنێوان شیعەکانى جیهاندا هەیە.

 

خەتیب زا جەختى کردەوە، ئەوەى ئەمڕۆ وتویانە و دەیڵێن هەڵوێستیان وەکو پابەندبوون بەئەرکى ئیسلامیەوە ڕێزگرتنێکى گەورەیە بۆ سیستانى و هیچ وتەیەکى دیکەیان نیە و قبوڵیش ناکەن زیان بەپێگەو ڕۆڵەکەى بگەیەنرێت.

 

نووسینى وتارێک لەلایەن حەسەن شەريعەتمەدارى، بەڕێوەبەرى هەواڵى ڕۆژنامەى کەیهان، کاردانەوەى زۆرى ناوەندى عێراقى لێکەوتەوە کە تیایدا ڕەخنەى لە عەلى سیستانى، مەرجەعى باڵاى شیعەکانى عێراق گرتبوو بەهۆى داواکردنى لە نەتەوە یەکگرتووەکان بۆ سەرپەرشتیکردنى هەڵبژاردنى داهاتووى عێراق.

 

 شەریعەتمەدارى لە وتارەکەیدا ئاماژەى بەوە کردبوو "داواكارى سيستانى لە نەتەوە يەكگرتوەكان بۆ ئەوەى سەرپەرشتى هەڵبژاردنى پەرلەمانى عێراق بكەن هێنانە خوارەوەى پێگە و ناو و ناوبانگى خۆيەتى".