گه‌ڕان

Shadow Shadow
سیاسه‌تی

ڕاپۆرتێك: پەیامێك گوتاری بە سەدر و عامری گۆڕی

2020.09.24 - 23:53
ڕاپۆرتێك: پەیامێك گوتاری بە سەدر و عامری گۆڕی

ناس کورد-

ماڵپەڕی ئەلحوڕەی ئەمەریكی لەزاری سەرچاوەیەكی ناو حەشدی شەعبی ئاشكرایكرد، گواستنەوەی پەیامێكی ئەمەریكا لەلایەن سەرۆككۆمار و سەرۆكوەزیرانی عێراقەوە بۆ شیعەكان گوتاری بە موقتەدا سەدر و لیستەكەی هادی عامری گۆڕیوە.

 

سەرچاوەكە ئەوەی بۆ ڕاپۆرتێكی تایبەتی ماڵپەڕە ئەمریکییەکە خستووەتەڕوو كە ئەمڕۆ 24 ئەیلولی 2020 بڵاوكراوەتەوە و ئاماژەی بەوەکردووە: " لەدوا كۆبوونەوەی مستەفا كازمیدا لەگەڵ سەركردەی هێزە شیعەكان پەیامێكی ئەمەریكای پێ گەیاندوون كە هەركامیان بێدەنگ بن لە هێرشكردنە سەر نێردە دیبلۆماسییەكان، ئەوە بەشدارن لەو هێرشانە و بەر لێپێچینەوەی توند دەكەون."

 

ئاماژەی بەوەشكردووە: "هەر بەدوای ئەوەشدا هەریەك لە موقتەدا سەدر و هاوپەیمانێتی فەتح بەسەرۆكایەتی هادی عامری سەركۆنەی بە ئامانجكردنی باڵیۆزخانە و نێردە دیبلۆماسییەكانیان كردووە.   "

 

سەرچاوەكەی حوڕە باسی لەوەشكردووە، لە كۆبوونەوەكەدا سەرۆكی حەشدی شەعبی فالح فەیاز ترس و نیگەرانی دەربڕیوە كە بەر گەمارۆی توندی ئەمەریكا بكەون، بەتایبەت پاش ئەوەی پێشتر بەرهەم ساڵح، سەرۆككۆماری عێراق پەیامێكی هاوشێوەی بەهەمان ناوەڕۆك گەیاندووە بە لایەنە شیعەكان.

 

هەر لەو میانەیەشدا ئیتیلافی فەتح بەسەرۆكایەتی هادی عامری جگە لە ئیدانەكردنی بەئامانجكردنی نێردە دیبلۆماسییەكان، داوایكردووە دادگا و هێزە ئەمنییەكان بەتوندی بەرەنگاری ئەو كارانە و كارەكانی ڕفاندن و تۆقاندنی هاووڵاتیان ببنەوە.

 

لەلای خۆشییەوە، شەوى رابردوو، موقتەدا سەدر، ڕێبەرى ڕەوتى سەدر نامەيەكى ئاراستەى حەشدى شەعبى كرد و تیایدا ئاماژەى بەوە کرد، ئەوەى هەندێك گروپى سەربە حەشد دەيكەن عێراق و گەلەكەى و دەوڵەتەكەى لاواز دەكەن. 

 

سەدر لە نامەكەيدا كە لە هەژمارى خۆى لەتۆڕى كۆمەڵايەتى تويتەر بڵاويكردوەتەوە نووسیبووی: " بزانن ئەى برا موجاهيدەكانى حەشدى شەعبى، ئەوەى هەندێك گروپی حەشدی شەعبی دەيكەن، بريتييە لە لاوازكردنى عێراق و گەلەكەى و دەوڵەتەكەى."