گه‌ڕان

Shadow Shadow
سیاسه‌تی

میدڵ ئێست: میلیشیاكان دەیانەوێ هۆزەکان بكەن بەگژ  كازمیدا 

2020.09.24 - 10:11
میدڵ ئێست: میلیشیاكان دەیانەوێ هۆزەکان بكەن بەگژ  كازمیدا 

ناس کورد-

راپۆرتێكی ماڵپەڕی میدڵ ئێست ئۆن لاین ئەوەدەخاتەڕوو بزوتنەوەی عەسایب لەهەوڵی هاندانی هۆزى ناسریەدایە دژی مستەفا كازمی سەرۆكوەزیران و میلیشیاكانیتر هەنگاوەكانی بەمەترسی دەزانن لەسەر خۆیان.

 

بەپێی ڕاپۆرتێكی ماڵپەڕی میدڵ ئێست ئۆن لاین (meo) كە شەوی 23 ئەیلول بڵاوكراوەتەوە لەگەڵ هەر هەنگاوێك بۆ بەرقەراركردنی ئۆقرەیی، مستەفا كازمی دووچاری گێچەڵی میلیشیا شیعەكانی لایەنگری ئێران دەبێتەوە، كە دواترینیان جوڵاندنی هێزی دژە تیرۆرە لە شاری ناسریە بۆ دەستگیركردنی ڕفێنەرانی چالاكوانی مەدەنی سەجاد عێراقی و ئاشكراكردنی چارەنووسی ناوبراو.

 

راپۆرتەكە ئەوەشی خستووەتە ڕوو كە كازمی رۆژی دوو شەممە 21 ئەیلول هێزێكی تایبەتی دژە تیرۆری ناردووە بە پاڵپشتی هێزی ئاسمانی سوپا بۆ دۆزینەوەی چالاكوانێكی مەدەنی (سەجاد عێراقی) كە رۆژی شەممە لە شاری ناسریە ڕفێنراوە و باوەڕ وەهایە لای گروپە چەكدارەكان بێت.

 

بەدوای ئەم هەنگاوەی سەرۆكوەزیرانیشدا بزوتنەوەی عەسایبی سەر بە قەیس خەزعەلی كەوتووەتە ڕەخنەگرتن و جەواد تڵێباوی كە سەركردەیەكی ئەم بزوتنەوەیە لە رێگەی تویتێكەوە باسی لەوە كردووە، ئەگەر هۆزى ناسریە نەبوونایە دەوڵەت هیچ سەنگ و بەهایەكی نەئەبوو، بۆیە نەنگییە كە مستەفا كازمی هێزی دژە تیرۆری هێناوە "بۆ خۆنواندن بەسەر هۆزەکاندا".

ماڵپەڕەكە لەزاری چەند سەرچاوەیەكی عێراقییەوە ئەوەی خستۆتەڕوو، ئەگەر میلیشیاكان گومانیان لەخۆیان نییە پێویست بەو هاندانەی هۆزەکان ناكات دژ بە پرۆسەیەكی ئەمنی كە ئامانج لێی بەرقەراركردنی ئاسایش و دۆزینەوەی ڕفێنراوێكی چالاكوانە لە خۆپیشاندانە مەدەنییەكان.

 

راپۆرتەكە ئەوەشی بیرهێناوەتەوە كە پێش عەسایب، كازمی لەگەڵ كەتیبەكانی حیزبوڵڵا كەوتوەتە كێشەوە و بۆ خۆنمایش كردن بەچەكەوە هاتوونەتە بەردەم دەروازەكانی ناوچەی سەوز كە بنكەو بارەگاكانی حكومەت لە خۆ دەگرێت.

 

هەر بەپێی راپۆرتەكە گروپە چەكدارە شیعەكان بەتوندی رەخنە لەهەنگاوەكانی كازمی دەگرن بۆ سنورداركردنی دەسەڵاتیان، میدیا ئێرانییەكانیش باس لەوە دەكەن سەرۆكوەزیرانی عێراق دوور كەوتوەتەوە لەو ئامانجانەی هێزە سیاسییەكان دیارییان كردووە بۆ حكومەتەكەی كە چارەسەركردنی دۆخی ئابوورییە.

شەوى رابردووش موقتەدا سەدر، ڕێبەرى ڕەوتى سەدر نامەيەكى ئاراستەى حەشدى شەعبى كرد و تیایدا ئاماژەى بەوە کرد، ئەوەى هەندێك گروپى سەربە حەشد دەيكەن عێراق و گەلەكەى و دەوڵەتەكەى لاواز دەكەن.

 

سەدر لە نامەكەيدا كە لە هەژمارى خۆى لەتۆڕى كۆمەڵايەتى تويتەر بڵاويكردوەتەوە نووسیویەتى، بزانن ئەى برا موجاهيدەكانى حەشدى شەعبى، ئەوەى هەندێك گروپ كە سەربەو ناونيشانە گەورەن "مەبەست حەشدى شەعبى" دەيكەن بريتييە لە لاوازكردنى عێراق و گەلەكەى و دەوڵەتەكەى.

ڕونيشيكردوەتەوە، لاوازكردنى ئەوانەش بە واتاى بەهێزكردنى هێزى دەرەكى و لەسەروشيانەوە گەورەى شەڕەكان ئەمريكايە.

 

سەرۆكى ڕەوتى سەدر ڕونيشيكردوەتەوە، هەوڵ بدەن بە دانايى و لێهاتويى و خۆشەويستى بۆ عێراق و گەلەكەى هەڵسوكەوت بكەن، ئێوە لەبەردەم خودا و گەلدا بەرپرسيارن.

 

داواشیان لێدەکات هەوڵ بدەن عێراق بەدوور بگرن لەوەی ببێتە گۆڕەپانێك بۆ بۆ كێشمەكێشی خەڵكیتر و با پێكەوە هەوڵی سەربەخۆیی و ئۆقرەیی و پاراستنی سیادەی عێراق بدەین ئەگەرنا لەدەستمان دەچێت.