گه‌ڕان

Shadow Shadow
سیاسه‌تی

دژە تیرۆرى عێراق بەشوێن ئەوانەدا دەگەڕێ کە شەوانە ناوچەى سەوز دەکەنە ئامانج 

2020.09.23 - 20:10
دژە تیرۆرى عێراق بەشوێن ئەوانەدا دەگەڕێ کە شەوانە ناوچەى سەوز دەکەنە ئامانج 

ناس کورد- 

دەزگاى دژە تيرۆرى عێراق هەڵمەتێكى فراوانى لە چەند ناوچەيەكى بەغدا دەستپێكردوە و بەدواى ئەو لايەنانەدا دەگەڕێت كە ڕۆژانە ناوچەى سەوز دەكەنە ئامانج و موشەكى تێدەگرن.

 

سەرچاوەكانى هەواڵى عێڕاقى لە زارى سەرچاوە ئەمنيەكانەوە بڵاويانكردوەتەوە، هێزێكى سەربە دەزگاى دژە تيرۆر هەڵمەتێكى گەڕان و پشكنينى لەناوچەى "زويە" لە جادريە ئەنجامداوە و بەدواى هەڵدەرى موشەكە كاتيۆشاكاندا بۆ ناوچەى سەوزى بەغدا دەگەڕێن.

 

ئاماژە بەوەشدراوە، هێزێكى سەربازيش سەرجەم ڕێگە لاوەكيەكانى بۆ سەر ناوچەكە كۆنترۆڵكردوە، هەروەها هێزەكانى سوپا لە چەند ناوچەيەكدا بڵاوبونەتەوە وەك كەرادە لە ناوەڕاستى بەغدا.

 

هاوكات لەگەڵ ئەو پرۆسەيەدا ئەنجومەنى دادگاى باڵاى فيدراڵى لە بەياننامەيەكدا بڵاويكردوەتەوە، "فائق زێدان" سەرۆكى ئەنجومەنەكە لەگەڵ "ماسيو تۆلەر" باڵيۆزى ئەمريكا لە بەغدا كۆبوەتەوە و باسيان لە ڕێوشوێنەكانى لێپرسينەوە لەو لايەنانە كردوە كە وەفدە دبلۆماسيەكان دەكەنە ئامانج.

 

ئەوەش هاتوە، هەروەها گفتوگۆ لەسەر ڕێوشوێنەكانى دادگا بۆ لێپرسينەوە لەو لايەنانەى هێرش دەكەنە سەر باڵيۆزخانە و نێردە دبلۆماسيەكان لە عێراق كە كاريگەرى لەسەر پەيوەنديەكانى عێراق بە دەوڵەتانى جيهانەوە هەيە كراوە.

 

هێرشە موشەكيەكان بۆ سەر ناوچەى سەوز و بەئامانجگرتنى كاروانە لۆجستيەكانى هاوپەيمانى نێودەوڵەتى لە ڕێگەى بۆمبى چێنراوەوە بەردەوامە و كۆتا هێرشيش بەرەبەيانى ئەمڕۆ بوو كە چەند گولە هاوەنێك لە ناوچەى "زويە" ى شارى بەغداوە نران بە ناوچەى سەوزەوە بەڵام هيچ زيانێكى گيانيان بەدواوە نەبوو.

 

ولايەتە يەكگرتوەكانى ئەمريكا كە ئامانجى زۆرينەى هێڕشەكانى سەر ناوچەى سەوز باڵيۆزخانەكەيەتى، كۆمارى ئيسلامى ئێران بەو هێرشانە تۆمەتبار دەكات، ئەويش لە ڕێگەى گروپە ميليشيا چەكداريە عێراقيەكانى سەربە تاران.