گه‌ڕان

Shadow Shadow
سیاسه‌تی

پارتى و یەکێتى کۆدەبنەوە

سەعدى پیرە: پێناچێت سەرجەم کێشەکانی پارتی و یەکێتی پێکەوە چارەسەر بکرێن

2020.09.23 - 16:02
سەعدى پیرە: پێناچێت سەرجەم کێشەکانی پارتی و یەکێتی پێکەوە چارەسەر بکرێن

ناس کورد-

سەعدی ئەحمەد پیرە ڕایگەیاند، پەیوەندییەکانى پارتى و یەکێتى لە ئێستادا لە ئاستێکى باشدایە و کۆبوونەوەکان بۆ گەیشتن بە چارەسەرى کێشەکان بەردەوام دەبن، بەڵام چاوەڕوانناکرێت سەرجەمیان پێکەوە چارەسەر بکرێن.

 

پارتى و یەکێتى ماوەى چەند مانگێکە پەیوەندییەکانیان ڕووى لە ئاسایبوونەوە کردووە و پێکەوە کۆبوونەتەوە، دواى ئەو گرژى و ئاڵۆزیانەى ئەمساڵ بۆ ماوەى چەند مانگێکى درێژ لەنێوانیان بەردەوام بوون.

 

سەعدی ئەحمەد پیرە، ئەندامى ئەنجومەنى سەرکردایەتى یەکێتى بە ناس کوردى ڕاگەیاند، "لەئێستادا پەیوەندییەکانى یەکێتى و پارتى باشە و کۆبوونەوەکان بۆ چارەسەرى کێشەکان بەردەوام دەبن".

 

وتیشى، "بەمنزیکانە کۆبوونەوەى دیکە لەنێوان پارتى و یەکێتى ئەنجام دەدرێت"، بەبێ ئەوەى هیچ وادەیەک دیاریبکات.

 

کێشەکانى پارتى و یەکێتى لەسەر چەند ئاستێکە کە هەردولا ئامادەییان بۆ چارەسەرکردنیان نیشانداوە، بەتایبەتى لەسەر ئاستى پەرلەمان و حکومەت، کە یەکێتى بەردەوام داواى شەراکەتى راستەقینە دەکات.

 

سەعدى پیرە وتى، "ئێمە و پارتى دوو حزبى جیاین و بەرنامەى جیامان هەیە، ئاساییە لەسەر هەندێ پرس جیاواز بین، هەوڵدەدەین کێشەکان چارەسەر بکەین، بەڵام پێناچێت سەرجەمیان پێکەوە چارەسەر بکرێن".

 

دوایین کۆبوونەوەى پارتى و یەکێتى لەسەر ئاستى باڵا لە مانگى ڕابردوودا بوو، کاتێک هەردولا لە هاوینەهەوارى دوکان کۆبوونەوە و جەختیانکردەوە لەسەر پشیوانیکردنى حکومەت و جێبەجێکردنى رێککەوتنى نێوانیان لەساڵى 2019 بەتایبەتى لەپرسی تایبەت بە پەرلەمان و حکومەت.  

  

هەر لەکۆبوونەوەکەدا بڕیاردرا کۆبوونەوەى داهاتووى نێوانیان لە سەرۆکایەتى هەرێم لە هەولێر ئەنجام بدرێت بەئامانجى جێبەجێکردنى بریارەکان. بەڵام تا ئێستا وادەى ئەو کۆبونەوەیە نادیارە.

 

مەحمود محەمەد، وتەبێژی پارتی ئەمڕۆ چوارشەممە بە میدیای حزبەکەى ڕاگەیاند، لەکۆبوونەوەکەى دوکاندا هەردوولا لەسەر كۆمەڵێك خاڵ ڕێكەوتوون، بەشێك لەو خاڵانە جێبەجێكراوە، بەشێكی تریشی ماوەتەوە، یەكێك لەوانەی جێبەجێکراون "سەرۆكایەتی پەرلەمان بەیەكەوە دابنیشێت بەپێی ڕێكکەوتنی سیاسی كە لە نێوان هەردوو لامان هەیە."   

  

ئاماژەى بەوەشکردووە "خاڵێكی تری كۆبونەوەی دوكان، كە بڕیاری لەسەر درابوو، ئەوەبوو كە دەزگای هەڵبژاردنی هەردوولامان لە بارەی هەڵبژاردنی پێشوەختە و ئەو كێشەی لە یاسای هەڵبژاردن هەیە كۆبوونەوە بكەن. هەردوولا هەوڵ بدەن یەك هەڵوێست بن، لەگەڵ لایەنەكانی تری كوردستانیش هاوهەڵوێست بن، خۆشبەختانە ئەوەش جێبەجێكراو هەردوولا بە یەكەوە سەردانی بەغدایان كرد."  

  

  

"خاڵێك ماوەتەوە كە هەردوو مەكتەبی سیاسی كۆبوونەوەیەكی هاوبەش لە سەرۆكایەتی هەرێم بكەن، بۆ ئەم كۆبوونەوەیە چاوەڕوانی یەكێتی دەكەین، باسیشمان لەگەڵ كردوون، لە چەند ڕۆژی پێشوو پەیوەندیان پێوە كراوە، چونكە زۆر شت هەیە، كە لە كۆبونەوەكەی دوكان جێبەجێ نەكراوە، كە پێویستە لەوێ بڕِیارەكان شۆڕ بكرێتەوە بۆ مەكتەبی سیاسی هەردوولا"، مەحمود محەمەد وایوتووە.