گه‌ڕان

Shadow Shadow
سیاسه‌تی

98%ى کارەکانى لیژنەکە هێشتا دەستیپێنەکردووە

میدیاى فەرمى عێراق: داوادەکرێت هەڵمەتى لێدان لەسەرە گەورەکانى گەندەڵى کوردستانیش بگرێتەوە

2020.09.22 - 09:58
میدیاى فەرمى عێراق: داوادەکرێت هەڵمەتى لێدان لەسەرە گەورەکانى گەندەڵى کوردستانیش بگرێتەوە

ناس کورد-

میدیاى فەرمى عێراق بڵاویکردەوە، داواکان لە زیادبووندان بۆ ئەوەى هەڵمەتى لێدان لەسەرە گەورەکانى گەندەڵى کەرکوک و هەرێمى کوردستان بگرێتەوە، کە لەلایەن حکومەتى عێراقەوە ماوەیەکى کەمە دەستیپێکردووە و چەندین بەرپرس دەستگیرکراون.

 

رۆژنامەى سەباحى نیمچە فەرمى عێراق ئەمڕۆ (سێشەممە) لەزارى سەرچاوەیەکى پەرلەمانییەوە گواستییەوە، 98%ى کارەکانى لیژنەى هەمیشەیی تایبەت بە تاوانەکانى گەندەڵى هێشتا دەستیپێنەکردووە و لەقۆناغى نزیکى داهاتوودا دەستپێدەکات.

 

ئاماژەى بەوەەشکردووە، داواکان لە زیادبووندان بۆ ئەوەى هەڵمەتى لێدان لەگەندەڵکاران ناوچەکانى دیکەى دەرەوەى بەغدا، لەناویاندا کەرکوک و هەرێمى کوردستان بگرێتەوە.

 

بەگوێرەى رۆژنامەکە، حکومەت تا ئێستا لەزیاد لە لێدوانێکدا جەختیکردووەتەوە کە دەستگیرکردنى هەندێ کەسایەتى تەنها سەرەتای کارى لیژنەی لێکۆڵینەوە لە گەندەڵى و تاوانە گەورەکانە کە بەسەرۆکایەتى لیواى مافپەروەر ئەحمەد ئەبو رەغیف پێکهێنراوە.

 

ئەوەش خراوەتەڕوو، ئەوانەى دەستگیرکراون تەنها 2%ى کارەکانى لیژنەکە پێکدەهێنن، لەناو پێشبینییەکان بۆ ئەوەى کارى داهاتووى لیژنەکە لە قۆناغى داهاتوودا بەرەو نەهەنگ و سەرە گەورەکانى تۆمەتبار بە گەندەڵى دەبێت.

 

پەرلەمان کە لایەنى چاودێرى پڕۆسەیەکە، دەیان دۆسیەى گەندەڵى بۆ دەستەى نەزاهە بەرزکردووەتەوە.

 

رەعد مەکسوسى، ئەندامى پەرلەمانى عێراق گەشبینى خۆى بە کارى لیژنەکە نیشانداوە لە قۆناغى داهاتوودا، ئەگەر لێکۆڵینەوە لەهەندێ کەسایەتى دەستگیرکراو ببێتە هۆى خستنى ئەو سەرە گەورانەى تێوەگلاون لەو دۆسیانە.

 

بەگوێرەى رۆژنامەکە، لەناو ئەو لایەنانەدا کە نوێنەریان لە لیژنەکەدا هەیە، دەزگاى هەواڵگرى نیشتیمانى عێراقییە، کە تواناکانى دەخاتە بەردەست بۆ شوێنکەوتنى گەندەڵکاران و ئاشکراکردنى ئەو سەروەتانەى بە ناڕەوا کۆیانکردووەتەوە.

 

یونادم یوسف کەنا، سەرۆکى کوتلەى رافیدەین لە پەرلەمانى عێراق، داوادەکات هاوشان لەگەڵ ئەو هەڵمەتە کە کازمى دەستیپێکردووە، یاساى "ئەمەت لەکوێ بوو؟" جێبەجێبکرێت، لەپێناو لێپرسینەوە لەسەرجەم بەرپرسان و سیاسەتمەداران لەبارەى سامانەکانیان، بەجۆرێک هەڵمەتەکە کەسانى نزیکى ئەو بەرپرسانەش بگرێتەوە.