گه‌ڕان

Shadow Shadow
سیاسه‌تی

دابان محەمەد یان گوڵستان سەعید؟

هەڵبژاردنى سەرۆکى فراکسیۆن ناکۆکى لەناو فراکسیۆنى گۆڕاندا دروست دەکات

2020.09.21 - 22:43
هەڵبژاردنى سەرۆکى فراکسیۆن ناکۆکى لەناو فراکسیۆنى گۆڕاندا دروست دەکات

ناس کورد-

هەڵبژاردن بۆ دیاریکردنى سەرۆکى فراکسیۆنى گۆڕان لە پەرلەمانى کوردستان ناکۆکى لەناو ئەو فراکسیۆنە دروستکردووە، دواى ئەوەى دوو کاندید دەنگى یەکسانیان بەدەستهێنا، یەکێک لە کاندیدەکان دەڵێت، ئەو سەرۆکى فراکسیۆنە، ئەوەى دیکەشیان چاوەڕوانى یەکلاکردنەوەى "گرفتى یاساییە" لەو بارەیەوە.

 

دواى دەستلەکارکێشانەوەى عەلى حەمەساڵح لە سەرۆکى فراکسیۆنى گۆڕان کە خاوەنى 12 کورسییە، بزوتنەوەکە بڕیاریدا بە دەنگدان ئەو پۆستە یەکلایی بکرێتەوە، بۆ ئەو مەبەستەش هەڵبژاردن لەناو ئەندامانى فراکسیۆنەکەدا کراوە، بەڵام ئەنجامەکە بەسەر دوو بەرەدا دابەشى کردوون.

لە هەڵبژاردنەکەدا هەریەکە لە دابان محەمەد و گوڵستان سەعید شەش دەنگیان بەدەستهێناوە، لەچەند رۆژى ڕابردوودا دابان محەمەد وەک سەرۆکى نوێی فراکسیۆنى گۆڕان بەیاننامەیەکى بڵاوکردەوە، بەڵام ئێستا گوڵستان سەعید وەک سەرۆکى فراکسیۆن خۆى ناساندووە.

 

جەلال محەمەد، ئەندامى فراکسیۆنى گۆڕان بە ناس کوردى ڕاگەیاند، "بەهۆى ئەوەى هەردوو کاندیدەکە یەک دەنگیان هێناوە، گرفتێکى یاسایی دروستبووە، چاوەڕوانین ئەوە یەکلایی بێتەوە تا سەرۆکێکى نوێ بۆ فراکسیۆن دیاری بکرێت".

 

بەڵام گوڵستان سەعید پەرلەمانتارى فراکسیۆنى گۆڕان لە لێدوانێکیدا بۆ ناس کورد جەختیکردەوە، "هیچ گرفتێکى یاسایی بوونى نییە"، چونکە بەپێی دەستورى گۆڕان لەهەر هەڵبژاردنێکدا پیاوێک و ژنێک یەکسان بوون بۆ بەدەستهێنانى پۆستێک، ئەوا ژنەکە بە براوە دادەنرێت.

 

دەستورى ناوخۆیی گۆڕان لەساڵى 2013 نوسراوە لەبەشى حەوتەمیدا کە تایبەتە بە هەڵبژاردنى ئەنجومەنى وڵات (ئەنجومەنێکە تایبەت بە رەوەندى کوردى لەدەرەوەى وڵات) باس لەوەکراوە ئەگەر ژن و پیاوێکى کاندید دەنگەکانیان هاوتا بوو ئەوا ژنەکە بەدەرچوو دادەنرێت، ئەگەریش دوو پیاو هەمان دەنگیان هێنا ئەوان یان هەڵبژاردن دوبارە دەکرێتەوە یان تیروپشک دەکرێت.

 

جەلال محەمەد وتى، "ئەو ماددەیە تایبەتە بە هەڵبژاردنى رەوەندى کوردى لەدەرەوە، نەک بۆ هەموو هەڵبژاردنە ناوخۆییەکانى گۆڕان، فراکسیۆنى گۆڕان پەیڕەوى خۆى هەیە و بەهیچ شێوەیەک لەوەدا باسى ئەوە نەکراوە".

 

وتیشى، "لەئێستادا چاوەڕوانى یەکلاکردنەوەى ئەو گرفتە یاساییەین".

 

تائێستا بزوتنەوەى گۆڕان بەفەرمى ئەنجامى هەڵبژاردنەکەى ڕانەگەیاندووە، بەڵام رۆژى 18 ى ئەم مانگە، کاتێک دابان محەمەد وەک سەرۆکى فراکسیۆن بەیاننامەیەکى بڵاوکردەوە، میدیاکانى بزوتنەوەکە بەناوى پەرلەمانتارى گۆڕانەوە بڵاویانکردەوە نەک سەرۆک، هەمان رۆژ هەواڵێکى گوڵستان سەعیدیان بڵاوکردوەتەوە بەسیفەتى ئەندامى فراکسیۆنى گۆڕان.

 

گوڵستان سەعید کە خۆى وەک سەرۆکى فراکسیۆن ناساند جەختیکردەوە، کە دەستور بۆ هەموو دامەزراوەکانى گۆڕانە و پێویستە هەموان پێوەى پابەند بن.

 

باسى لەوەشکرد، لە رۆژانى داهاتوودا قسە لەگەڵ دابان محەمەد دەکات، بۆ رەواندنەوەى هەر نیگەرانییەک کە لەو بارەیەوە لەلاى دروستبووبێت.