گه‌ڕان

Shadow Shadow
سیاسه‌تی

سواڵکەرێک بەسێ رۆژ 13 ملیۆن دیناری پەیدا کردووە

لەشەش مانگی سەرەتای ئەمساڵدا نزیکەی شەش هەزار تاوان لەهەولێر ئەنجامدراون

2020.09.21 - 15:44
لەشەش مانگی سەرەتای ئەمساڵدا نزیکەی شەش هەزار تاوان لەهەولێر ئەنجامدراون

ناس کورد-

بەڕێوەبەرایەتی پۆلیسی هەولێر ڕایگەیاند، لەماوەی شەش مانگی سەرەتای ئەمساڵدا نزیکەی شەش هەزار تاوانی جۆراوجۆ لەسنوری پارێزگاکە ئەنجامدراون، دەشڵێت، 751 سواڵکەریشیان دەستگیرکردووە کە یەکێک لەوانە لەسێ ڕۆژدا 13 ملیۆن دیناری پەیدا کردووە.

 

ئەمڕۆ (دووشەممە، 21ی ئەیلولی 2020)، لەڕاگەیەندراوێکدا بەڕێوەبەرایەتی پۆلیسی هەولێر ئاماژەى بەوە کرد : "لە شەش مانگی سەرەتای ئەمساڵدا پێنج هەزار و 992 تاوان لە سنوری پارێزگای هەولێر تۆمارکراون و لەو ژمارەیەش پێنج هەزار و 558 تاوانیان ئاشكراکراون، واتە بەڕێژەی %92".

 

ئاماژەی بەوەشكرد :"لەماوەی ئەو شەش مانگەدا 655 تۆمەتباریان دەستگیرکردووە لەهەموو تاوانە جیاجیاکان کە باندی (دزی، کوشتن، ساختەکاری، سپیکردنەوەی پارە، ماددە هۆشبەرەکان و چەندین دیکە)یان تێدا بووە".

 

هەر بەگوێرەی ڕاگەیەندراوەکەی پۆلیسی هەولێر، 751 سواڵکەریشیان دەستگیرکردووە و ڕادەستی یاسایان کردوون، بەشێوەیەک زۆرکات خۆیان بەنەخۆش و کەمئەندام نیشانداوە، بەڵام لەڕاستیدا هیچ کێشەکەیان نەبووە، لە نمونەیەکدا، سواڵکەرێک لەماوەی سێ ڕۆژدا بڕی 13 ملیۆن دیناری کۆکردبووەوە.

 

لەڕاگەیەندراوەکەدا ئەوەش هاتووە، هەر لەشەش مانگی سەرەتای ئەمساڵدا، 28 تۆن دەرمانی ماوە بەسەرچوو و خراپ دەستی بەسەرداگیراوە و هەزار و 284 شوێنیش بەهۆی پابەندنەبوون بەڕێنماییە تەندروستییەکانەوە داخراون.