گه‌ڕان

Shadow Shadow
سیاسه‌تی

ئەمریکا سزا بەسەر 24 کەسایەتى و لایەنى تێوەگلاو لە بەرنامەى خۆپڕچەککردنى ئێران دەسەپێنێت

2020.09.20 - 23:31
ئەمریکا سزا بەسەر 24 کەسایەتى و لایەنى تێوەگلاو لە بەرنامەى خۆپڕچەککردنى ئێران دەسەپێنێت

ناس کورد-

بەرپرسێکى ئەمریکى ئاشکرایکرد، وڵاتەکەى سزاى زیاتر بەسەر ئێراندا دەسەپێنێت، کە 24 کەسایەتى و لایەنى تێوەگلاو لە بەرنامەى خۆپڕچەککردنى ئێران لەخۆدەگرێت.

 

ئەو سزایانە بەفشارێکى دیکەى واشنتن دادەنرێت بۆ سەر تاران، بەتایبەتى کە ئەو کەس و لایەنانەى سزایان بەسەردا دەسەپێنرێت تێوەگلاون لە بەرنامەى موشەکى و ئەتۆمى ئێرانەوە.

 

ئاژانسى رۆیتەرز لەزارى ئەو بەرپرسە ئەمریکییەوە کە ناوى نەهێنراوە گواستییەوە، دۆناڵد ترەمپ، سەرۆکى ئەمریکا واژۆ لەسەر فەرمانێکى جێبەجێکردن دەکات کە رێگە بە ئیدارەى ئەمریکا دەدات سزا بەسەر لایەن و بازرگانانى چەک بسەپێنێت کە لەگەڵ ئێران مامەڵە دەکەن.

 

بەگوێرەى ئاژانسەکە، ئێران کەرەستەى پێویستى لەبەردەستدایە بۆ دروستکردنى چەکى ئەتۆمى تا کۆتایی ئەمساڵ، تاران و کۆریارى باکور دەستیانکردووەتەوە بە هاریکارى لە پڕۆسەى دروستکردنى موشەکى دورهاوێژ.

 

ئەمریکا تا ئێستا بەچەند قۆناغێک سزاى بەسەر ئێراندا سەپاندووە، دواى کشانەوەى لە رێککەوتنى ئەتۆمى لەساڵى 2018.

 

پێشتر مایک پۆمپیۆ وەزیرى دەرەوەى ئەمریکالە بەیاننامەیەکدا ڕایگەیاندبوو، سەرجەم ئەو سزا نێودەوڵەتیانەى بەهۆى رێککەوتنى ئەتۆمییەوە لەسەر ئێران هەڵگیرابوون، بەسەر ئەو وڵاتەدا دەسەپێنرێنەوە.

 

جەختیشیکردبووەوە، هەڵمەتى فشارخستنە سەر ئێران بەردەوام دەبێت، تا تاران دەگات بە رێککەوتنێکى گشتگیر لەگەڵ واشنتن، بۆنەهێشتنى هەڕەشە ئەتۆمییەکان و سنوردانان بۆ بڵاوکردنەوەى فەوزا و توندوتیژى و رژانى خوێن.