گه‌ڕان

Shadow Shadow
سیاسه‌تی

مەريەم لەنێوان دژايەتى و پشتگيرى!

مەريەم جوجيتۆ بە لەچکەکەیەوە دەچێتە پەرلەمانى فەرەنسا و ئەوەش هەرا دەنێتەوە

2020.09.19 - 22:54
مەريەم جوجيتۆ بە لەچکەکەیەوە دەچێتە پەرلەمانى فەرەنسا و ئەوەش هەرا دەنێتەوە

ناس کورد- 

بەهۆى بەستنى لەچك و چوونە پەرلەمانى فەرەنسا، خوێندكارێكى مسوڵمان هەراى نايەوە و بەهۆيەوە پەرلەمانتارانى ڕاستڕەوەكان و كۆماريیەكان هۆڵى پەرلەمانيان جێهێشت، ئەوەش لەكاتێكدايە فەرەنسا بە يەكێك لە ديموكراسيترين وڵاتەكانى جيهان دادەنرێت.

 

مەريەم جوجيتۆ وەك يەكێك لە نوێنەرانى يەكێتى خوێندكارانى فەرەنسا بەشدارى دانيشتنێكى پەرلەمانى ئەو وڵاتەی كرد كە تايبەت بوو بە باسكردنى كاريگەرى ڤايرۆسى كۆرۆنا لەسەر گەنجان، بەڵام دواى وتارى سەنديكاى خوێندكاران "بيير هندري دومون" نوێنەرى حزبى كۆماريیەكان دەستى كرد بە ناڕەزايى دەربڕين، بەوەى كە بەپێى كارنامەى ناوخۆيى پەرلەمان لەچك ڕێگەى پێنەكراوە.

 

ئاماژەى بەوەشدا، ئەو كارە "هاتنە پەرلەمان بە لەچكەوە" مەبدەئى علمانى پێشێلدەكات كە پێويستە پەرلەمانى فەرەنسا پێوەى پابەند بێت.

 

لاى خۆشيەوە "ئان كريستين لانگ" پەرلەمانتارى حزبى دەسەڵاتدار چووە پاڵ ئەو پەرلەمانتارە و پێى وابوو، بەستنى لەچك لەگەڵ بەهاكانى بەرگريكردن لە مافى ژنان ناگونجێت.

 

هاوکات لاى خۆيەوە "ساندرين مورش" سەرۆكى پەرلەمان وتى، ئەو جۆرە كاردانەوانە پێويست نين، هەروەها هيچ ڕێسايەك نييە ڕێگە لە خەڵك بگرێت بە جلى ئايينيەوە بێتە ناو پەرلەمان.

 

سەرەڕاى ئەوەش پەرلەمانتارانى هەردوو حزبى ڕاستڕەوەكان و كۆماریيەكان سوور بوون لەسەر بۆچونەكانيان و هۆڵى پەرلەمانيان جێهێشت.

 

لاى خۆشيەوە "ستيڤان زومستيگ" مامۆستاى ياسا و پەيوەنديیە نێودەوڵەتیيەكان بە پێگەى "سكاى نيوز"ى وتووە: "لە ڕووى ياساييەوە پەرلەمانتاران مافى ئەوەيان نييە دژى لەچككردنى كچێك ناڕەزايى دەربڕن و هيچ ڕێسا و ياسايەك نييە ڕێگە لە لەچككردن بگرێت لەناو پەرلەماندا.

 

وتيشى: "لەڕووى سياسيشەوە  لە فەرەنسا تائێستا لەچككردن شۆكێكە بۆ سياسيەكان، چونكە لەسەرى ڕانەهاتوون لە دەوڵەتێكى علمانيدا كە پڕوپاگەندە بۆ ئازادى دەكات، ئەوەى بارودۆخەكە خراپتر دەكات ئەوەيە مەريەم تەنها هاوڵاتيەكى فەرەنسى ئاسايى نەبوو بەڵكو نوێنەرى سەنديكايەكى گرنگ بوو كە لە پلەى يەكەمدايە لە فەرەنسا، بۆيە ئەو كچە ڕەمزێكى سياسييە."

 

مريەم جوجيتۆ كێييە؟

ڕاى گشتیى فەرەنسا مەريەم جوجيتۆ  دەناسێت، كچێكى تەمەن 21 ساڵە و پۆستى نوێنەرى ڕێكخراوى يەكێتى نيشتمانى خوێندكارانى فەرەنساى لە زانكۆى سوربون لە پاريس هەيە.

 

جوجيتۆ ساڵى 2018 لە چاوپێكەوتنێكى كەناڵى "ئێم 6"ى فەرەنسيدا دەركەوت و كاردانەوەكان لەسەرى جياواز بوون، هەندێك پێيان ئاسايى بوو هەندێكيش پێيان وابوو كە ئەوە شەڕێكە دژى علمانييەت.

 

پێشتريش خۆى بە ماڵپەڕى "بوزفيد"ى وتووە، هەميشە دەبێت ئەوە ڕووبكەمەوە كە لەچكەكەم هيچ ئاماژەيەكى سياسى هەڵناگرێ بەڵكو ئايينەكەم پيشان دەدات، ئەوەش ڕوون و ئاشكرايە بەڵام بۆ ئەوە نييە كە مشتومڕ دروستبكات.

 

سەرەڕاى ئەوەش مەريەم لەلايەن ڕۆژنامەى "شارلى ئيبدۆ" ڕوبەڕوى هەڵمەتێكى توند بوويەوە و چەندين كەسايەتيش هێڕشيان كردە سەرى، يەكێك لەوانەش "جيرار كۆڵۆمپ" وەزيرى دەرەوەى ئەو كاتەى فەرەنسا كە وتى "بەستنى لەچك پێچەوانەى كۆمەڵگەى فەرەنسييە".

 

پشتگيریكردنى مەريەم

لاى خۆيەوە "ميلانى لوس" سەركۆى يەكێتى نيشتمانیى خوێندكارانى فەرەنسا لە تويتێكدا نوسيويەتى: "هێڕشكردنە سەر خوێندكارێكى لەچكبەسەر كە نوێنەرى هەڵبژێردراوى يەكێتييەكەيە و ڕێگەگرتن لێى لەوەى نوێنەرايەتى كۆمەڵەى نەتەوەيى بكات كە نە ژنانەيە و نە جەماوەرييە، بريتييە لە ئيسلامۆفۆبيا.

 

باسى لەوەشكردوە، جێى نيگەرانييە، چونكە هاورێكەى كە چووە بۆ قسەكردن لەسەر بارودۆخێكى مەترسيدار گوێى لێنەگيراوە و ئەوەش تەنها بەهۆى لەچكەكەيەوە.