گه‌ڕان

Shadow Shadow
سیاسه‌تی

داعش ڕۆناڵدۆ و ئەستێرەكانى تر لە ’’دورگەكانى فيردەوس’’ بێبەش کرد

2020.09.18 - 15:38
داعش ڕۆناڵدۆ و ئەستێرەكانى تر لە ’’دورگەكانى فيردەوس’’ بێبەش کرد

ناس کورد-

چەكدارانى ڕێكخراوى داعش دورگەكانى پارادايس "فيردەوس"يان لە سەر زەرياى هندى لە خۆرئاواى ئەفريقا كۆنتڕۆڵكرد و سەرجەم هۆتێل و ڤێلا گرانبەهاكانيان لەسەر كەنارى دورگەكە سوتاند، ئەوەش بە بيانوى سەپاندنى شەريعەتى ئيسلامى.

 

ڕۆژنامەى "دەيلى مەيل"ی بەریتانی بڵاويكردوەتەوە، چەكدارانى  داعش دورگەكانى پارادايسيان كۆنترۆڵكردوە، هەروەها هەردوو دورگەى فاميزى و ميكۆنگۆشيان كۆنترۆڵكردوە كە سەربە مۆزەمبيقن لە خۆرئاواى ئەفريقا و خانوو و كێڵگە كشتوكاڵيەكانيان سوتاندووە و فەرمانيان بە دانيشتوانەكانيان كردوە كە دورگەكان جێبهێڵن.

 

ڕۆژنامەكە باسى لەوەشكردوە، ئەو دورگانە شوێنى حەوانەوەى زۆرێك لە كەسايەتييە بەناوبانگەكانى جيهان و بەسەربردنى پشوەكانيان بووە، لەوانەش "كريستيانۆ ڕۆناڵدۆ"ى پرتوگال و "ئەلبێرتى دووەم"ى ئەميرى مۆناكۆ و ئەستێرەى جيهانى "دانياڵ كريگ" و تەنانەت "نيڵسۆن ماندێلا" كەسايەتى ديارى سياسى ئەفريقى.

 

ئەوەش هاتووە، سەرەڕاى ئەوەش ڕێكخراوەكە دەستيگرتووە بەسەر شارى "موسيمبوا دا برايا"ى كەنارى ستراتيژى لە مۆزەمبيق، هەروەها گوندێكيش لە كەرتى "كابو ديلگادۆ"ى دەوڵەمەند بە غاز.

 

يەكێك لە دانيشتوانى دورگەى ميكۆنگۆ وتويەتى، چەكدارانى داعش بە شەو بەسوارى بەلەم هاتن و هەموانيان دەستگيركرد، وتيان كە پێويستە لەسەرتان هەڵبێين ئەگەر دەتانەوێت بژين.

 

پێش سێ ساڵ ڕێكخراوى داعش لەو ناوچانە هێرشەكانى دەستپێكرد كە بووەتە هۆى كوشتنى زياتر لە 1300 كەس، هەروەها لە چەند مانگى ڕابردودا پانتاييەكى زۆرى لە خۆرئاواى ئەفريقا داگير كردوە.