گه‌ڕان

Shadow Shadow
سیاسه‌تی

هاوشێوەی دەروێشەکان لە هەرێم.. سەدان زیارەتکاری شیعەی ئێرانی هەوڵیاندا سنوری عێراق ببەزێنن

2020.09.18 - 13:59
هاوشێوەی دەروێشەکان لە هەرێم.. سەدان زیارەتکاری شیعەی ئێرانی هەوڵیاندا سنوری عێراق ببەزێنن

ناس کورد-

نیوەڕۆی ئەمڕۆ سەدان زیارەتکاری شیعەی ئێرانی سنوری عێراقییان لە دەروازەی سنوریی شەمجە لە پارێزگای کەربەلا بەزاند بۆ بەشداریکردن لە چلەی ماتەمینی ئیمام حسێن، ئەوەش سەرباری ڕێگری سەربازانی ئێرانی.

 

بەپێی گرتە ڤیدیۆییەکان، ئاڵۆزی و توندوتیژی لەنێوان سەربازانی سنوریی ئێران و زیارەتکاراندا دروست دەبێت، زیارەتکاران بەدەم ڕاکردنەوە دروشمی ئاینی خۆیان دەڵێنەوە.

 

پەیامنێری ناس کورد وتی، بەرپرسانی ئێرانی سەرکەوتوو بوون لە بەرپەچدانەوەى ئەو خەڵکە و نەیانهێشتووە دەروازە ببەزێنن.

 

هاوکات دەستەى دەروازە سنورییەکانی عێراق ئاشکرایکرد، دەروازە سنورییەکانی عێراق بە تەواوەتی داخراون و هیچ کەسێک لەو زیارەتکارانە نەیانتوانیوە بێنە ناو عێراقەوە.

 

دەستەکە لە ڕاگەیەنراوێکدا دەڵێـت، دەروازەکانمان بە تەواوەتی داخراون لە بەردەم جوڵەى گەشتیاران و ڕێگەی بە هیچ کەسێک نادرێت بێتە ژوورەوە."

 

دەشڵێت، "ئەو ڤیدیۆیەی بڵاوکراوەتەوە لەناو خاکی ئێراندایە و دۆخەکە لەلایەن هێزەکانی ئێرانەوە کۆنتڕۆڵکراوە."

 

ڕۆژی 9ی تەموزی 2020، سەدان دەروێش و لایەنگری شێخ محەمەد کەسنەزانی بە زۆر دەروازەی سنوریی باشماخیان بەزاند و دەربازی هەرێمی کوردستان بوون بۆ بەشداری لە پرسەی شێخەکەیان.

 

زیاتر بخوێنەوە: سەدان دەروێش سنوری هەرێمی کوردستانیان بەزاند