گه‌ڕان

Shadow Shadow
سیاسه‌تی

تەرمى خێزانە کوردەکەى شارى بەغدا لە گردى سەیوان بەخاکسپێردران [ڤیدیۆ و وێنە]

2020.09.17 - 13:33
تەرمى خێزانە کوردەکەى شارى بەغدا لە گردى سەیوان بەخاکسپێردران [ڤیدیۆ و وێنە]

ناس کورد-

تەرمى ئەو خێزانە کوردەى کە لە گەڕەکى مەنسوڕ لە شارى بەغدا کوژران لەپاش گەڕێنرانەوەیان بۆ شارى سلێمانى، لە مەراسیمێکدا بە خاکسپێردران.

 

پەیامنێرى ناس کورد لە شارى سلێمانى رایگەیاند "لەپاش ئەوەى تەرمەکان گەڕێنرانەوە بۆ شارى سلێمانى و لە مزگەوت نوێژیان لەسەر کرا لە گۆڕستانى سەیوان لەشارى سلێمانى بەخاک سپیردران".

 

ئاماژەى بەوەش کرد لەسەر گڵکۆى قوربانییەکان کەسوکارى ئەو خێزانە جگە لەوەى سوپاسى ئەو کەسانەیان کرد کە هاوکار بوون لە گەڕانەوەى تەرمەکان بۆ شارى سلێمانى و لە دەستگیرکردنى تاوانبارەکەدا داواشیان لە حکومەتى هەرێمى کوردستان کرد کە بەدواداچوون بۆ پڕۆسەى لێکۆڵینەوەکان بکات و تاوانبار بە سزاى خۆى بگات.

ئەمڕۆ (پێنجشەممە) تەرمى ئەو خێزانە کوردە گەڕێنرایەوە بۆ شارى سلێمانى و لە مزگەوتى ئەحمەدى حاجى ڕەشید مەراسیمى شتن و کفنکردنیان بۆ ئەنجامدرا.

پەیامنێرى ناس کورد لە شارى سلێمانى لە مزگەوتى ئەحمەد حاجى عەلى ڕایگەیاند "تەرمى ئەو خێزانە کوردەى کە لە شارى بەغدا و لە گەڕەکى مەنسور کوژران گەیشتنەوە شارى سلێمانى و لەدواى شۆردن و کفنکردنیان لە گردى سەیوان بەخاک دەسپێردرێن".  

هاوکات بەشێک لە کەسوکارى خێزانە کوژراوەکە لە لێدوانى تایبەتیان بۆ کامێراى ناس کورد رەتیدەکەنەوە ئەو خێزانە هیچ کێشەیەکى کۆمەڵایەتى و سیاسییان هەبووبێت و جەخت لەسەر ئەوە دەکەنەوە کە تاوانەکە بەهۆى دزیکردنەوە ڕوویداوە.  

لە کۆنگرەیەکى رۆژنامەوانیشدا، محەمەد قادر خوشکەزاى خوالێخۆشبوو دارا رەووف سەرجەمى ئەو هەواڵانەى تۆڕە کۆمەڵایەتییەکانى بەدرۆخستەوە کە باس لە سەربڕین یان دەستدرێژیکردنە سەر قوربانییەکان دەکات و وتى "سەرجەمى ئەو هەواڵانە دوورن لە ڕاستییەوە". 

 

محەمەد قادر رونیکردەوە تاوانەکە تاوانێکى دزیکردن بووە و وردەکارییەکەى وەک ئەوە بووە کە تاوانبارەکە لە دانپێدانانەکەیدا ئاماژەى بۆ کردبوو.  

 

رەتیشیکردەوە کە خێزانە کوردەکەى شارى بەغدا ماڵ و دەرمانخانەیان فڕۆشتبێت و نیازیان هەبووبێت بگەڕێنەوە بۆ شارى سلێمانى و لێرە خانوو بکڕن.  

 

هاوکات سوپاسى سەرۆکایەتى کۆمار و بەتایبەتى د.بەرهەم ئەحمەد ساڵح، سەرۆککۆمارى عێراق و هێزە ئەمنییەکانى عێراق و هەرێمى کوردستانى کرد کە بەدەنگ ئەو رووداوە دڵتەزێنەوە هاتن و توانییان تاوانبارەکە لە ماوەیەکى کەمدا دەستگیر بکەن.