گه‌ڕان

Shadow Shadow
سیاسه‌تی

دەقى دانپێدانانى بکوژى خێزانە کوردەکەى شارى بەغدا [ڤیدیۆ]

2020.09.16 - 20:39
دەقى دانپێدانانى بکوژى خێزانە کوردەکەى شارى بەغدا [ڤیدیۆ]

ناس کورد-

دەزگاى دژە تیرۆرى کوردستان، گرتەى ڤیدیۆیى دەقى دانپێدانانى بکوژى خێزانە کوردەکەى شارى بەغداى بڵاوکردەوە کە کەسێکە بەناوى مەهدى حسێن ناسڕ و پاسەوانى باڵیۆزخانەى ڕوسیا بووە لە بەغدا.

 

بەگوێرەى گرتە ڤیدیۆییەکە، تاوانبارەکە دان بەوەدا دەنێت کە بەهۆى ئەوەى داواى پارەى لە باوکى شیلان کردووە و ئەویش ئامادە نەبووە پارەى بداتێ ئەو خێزانەى کوشتووە و پاشان هەڵهاتووە بۆ شارى هەولێر و هەوڵى بەدەستهێنانى ڤیزاى داوە بۆ گەشتکردن بۆ تورکیا بەڵام لە گەڕانەوەى بۆ ئۆتێلەکەى دەستگیردەکرێت.

 

 

 

ده‌قى دانپێدانانی بكوژی خێزانه‌ كورده‌كه‌ی به‌غداد

دەقی راگەیەنراوی دژە تیرۆری کوردستان

 

دواى یٔه‌وه‌ى زانیاریمان ده‌ستكه‌وت كه‌ یٔه‌و بكوژه‌ى شەوی ١٤-٩-٢٠٢٠، لەنێو باڵەخانەیەکی گەڕەکی مەنسوور لە بەغدا خێزانێكى کوردى به‌شێوه‌یه‌كى زۆر دڕندانه‌ كوشتووه‌ كه‌ خێزانه‌كه‌ له‌ دایک و باوک و کچێکیان پێكهاتبوو و ناوبراو خۆى له‌ هه‌ولێر حه‌شارداوه‌، دواى به‌شوێنداچوون و چاودێرى توانیمان شوێنى ناوبراو بدۆزینه‌وه‌ و له‌لایه‌ن به‌ڕێوه‌به‌رایه‌تى یٔاسایشى هه‌ولێر ده‌ستگیر بكرێت و دواى لێكۆڵینه‌وه‌ ناوبراو دانى به‌ تاوانه‌كه‌ى نا كه‌ یٔه‌مه‌ش ده‌قى دانپێدانانه‌كه‌یه‌تى:

 

ناوم (مەهدی حوسێن ناسر مەتەر)، لە دایکبووی ساڵی ،١٩٨٤ دانیشتووی بەغدا ناوچەی حەبیبیه‌، دەوامم لە وەزارەتی ناوخۆیە - پاسەوانیی باڵیۆزخانەکان، بە دیاریکراویش باڵیۆزخانەی روسیا.

 

پیش ٤ ساڵ کەسێکم ناسی بە ناوی باوکی شیلان، پیش دوو رۆژ لەمەوبەر پێوستم بە بڕێک پارە هەبوو، چونکە قەرزاربووم، چوومە لای لە شوقەی خۆی و بەیەکەوە دانیشتین، داوای یٔەو گوژمە پارەیەم لێ کرد، بەڵام یٔامادە نەبوو و گوتی: نیمە. دەمەقاڵێمان بوو، چەقۆیەک لە نزیکم بوو، بە چەقۆ لێم دا و کەوتە سەر زەوی، ویستم یٔاسەواری تاوانەکە بشارمەوە لەو کاتە هاوسه‌ره‌كه‌شى هاتەوه‌، من شۆک بووم و شڵەژام و یٔەویش دەستی بە هاوار و قیژە کرد و یٔەویشم دایە بەر چەقۆ و کەوتە سەر زەوی، تەرمەکانیانم لە ژوورەکە بردە حەمام و بۆری یٔاوەکەم کردەوە لەو کاتەدا شیلان هاتە ژوورەوە. کاتێ شیلان هات و بارودۆخەکەی بینی شڵەژا، ویستم هێوری بکەمەوە، هێور نەبوویەوە بە تەپڵەکە جگەرەیەک کێشای بە سەرمدا، منیش دوو بۆکسم لێ دا و کەوتە سەر زەوی، سەرینێک لەوێ بوو لەسەر دەمیم دانا و کوشتم. هەوڵمدا یٔاسەواری تاوانەکە بشارمەوە، بەڵام نەمدەزانی چی بکەم و بۆ کوێ بڕۆم، شوێنەکەم خاوێن کردەوە و بۆ پارە گەڕام، گوژمە پارەیەکم دۆزییەوە، بەڵام نازانم چەند بوو، نزیکی ١٠ هەزار دۆلارێک یان زیاتر دەبوو، هەندێ پارەی عێراقیشی تێدا بوو. پارە و مۆبایلەکانم برد، چەقۆکەشم لەگەڵ خۆم برد و لەناو کیسه‌یه‌کم دانا و دەرچووم. بۆ کوێ بچم. بۆ کوێ بچم، چوومە ناوچەی قەنات و چه‌قۆ و مۆبایله‌كانم لەوێ فڕێدا، گوتم با بچم بۆ هەولێر، یٔۆتۆمبێلێکی تایبەتم گرت و هاتمە هەولێر. لە یەکێک لە هۆتێلەکان دابەزیم، ویستم لە هەولێرەوە سەفەر بکەم بۆ دەرەوەی وڵات، رۆژی دواتر ویستم ڤیزایەک بۆ تورکیا یان بۆ شوێنێکی تر پەیدا بکەم، بەڵام دەستم نەکەوت و گەڕامەوە هۆتێل و لەوێ دەستگیر کرام.

دەزگاى هەواڵگرى عێراق راگەیەندراوێکى لەبارەى دەستگیرکردنى بکوژى خێزانە کوردەکەى شارى بەغدا بڵاوکردەوە کە تیایدا کچێکى دەرمانساز و باوک و دایکى تیادا کوژران.  

  

لە راگەیەندراوەکەى دەزگاى هەواڵگرى عێراقدا ئاماژە بەوە کراوە، بەسەرپەرشتى راستەوخۆى مستەفا کازمى، سەرۆکوەزیرانى عێراق و چاودێرى وەزیرى ناوخۆى عێراق هێزێکى دەزگاى هەواڵگرى عێراق و بەهەماهەنگى لەگەڵ هێزەکانى ئاسایشى هەرێمى کوردستان و لە ئۆپراسیۆنێکى هەواڵگریدا توانرا بکوژى خێزانە کوردەکەى مەنسوڕ دەستگیر بکرێت.  

  

ئاماژە بەوەش کراوە کە لە راگەیەندراوێکى تردا وردەکارى ئۆپراسیۆنەکە ئاشکرا دەکرێت.  

  

پێشتر ناس کورد  لەسەرچاوەیەکى باڵا لە دەزگاى هەواڵگرى عێراقەوە بڵاوى کردەوە، بکوژی خێزانە کوردەکەی گەڕەکی مەنسورى شاری بەغدا دەستگیرکرا، ئاماژەی بەوەشکرد، بکوژەکە کارمەندی  پۆلیسە ولە یەکێک لە باڵوێزخانەکانی نزیک ماڵی خێزانە کوردەکە کاردەکات.   

  

 ئەمڕۆ(چوارشەممە،16ی ئەیلۆلی 2020) سەرچاوەیەکی باڵا لە دەزگای هەواڵگری عێراق لە بارەی کوشتنی خێزانە کوردەکەی شاری بەغدا تایبەت بە ناس کوردی ڕاگەیاند، دوای کوشتنی شیلان دارای کچە دەرمانساز و خێزانەکەی لە ماڵەکەی خۆیان لە گەڕەکی مەنسوڕ، توانراوە دوای چەند کاتژمێرێک لە ئەنجامدانی تاوانەکە زانیاریی وردمان لەبارەی بکوژەکەوە دەستبکەوێت".   

  

وتیشی "دەزگای هەواڵگری توانیویەتی شوێنی بکوژەکە دەستنیشان بکات کە دوای ئەنجامدانی تاوانەکەی هەڵاتووە بۆ پارێزگای سلێمانی لە هەرێمی کوردستان لەوێشەوە  خۆی گەیاندووەتە شاری هەولێر".   

  

سەرچاوە هەواڵگرییەکە ئاماژەی بەوەکرد"بەهاوکاری دەزگا ئەمنییەکانی هەرێمی کوردستان توانراوە بکوژەکە لە شاری هەولێر دەستگیر بکەن و لە ئێستادا چاوەڕێی ئەوەین  بەزوترین کات ڕادەستی لایەنە ئەمنییەکانی شاری بەغدا بکرێتەوە".   

  

درەنگانی شه‌وی رابردوو خێزانێکی کوردی نیشتەجێی گەڕەکی مەنسوڕی شاری بەغدا کە پێکهاتبوون لە باوکێک بەناوی دارا ڕەئوف و دایکەکە بە ناوی عالیە ڕەشید و کچەکەیان بەناوی شیلان دارا کە پیشەی دەرمانسازە له‌لایه‌ن چه‌ند چه‌كدارێكه‌وه‌ هێرشكرایه‌ سه‌ر ماڵیان به‌چه‌قۆ كوژران .