گه‌ڕان

Shadow Shadow
سیاسه‌تی

ڕۆژنامەیەک ’’پلانى مالیکى بە سەرپەرشتى خامنەیی بۆ دژایەتیکردنى کازمى’’ ئاشکرادەکات

2020.09.16 - 15:19
ڕۆژنامەیەک ’’پلانى مالیکى بە سەرپەرشتى خامنەیی بۆ دژایەتیکردنى کازمى’’ ئاشکرادەکات

ناس کورد-

سەردانەکەى ئەمدواییەى نورى مالیکى، سەرۆکى هاوپەیمانى دەوڵەتى یاسا بۆ تاران بە نهێنیى بووە بە ئامانجى فشارخستنە سەر مستەفا کازمى، کارەکەش "بە سەرپەرشتى خامنەیى دەکرێت" و لەگەڵ چەندین بەرپرسى باڵاى سوپاى پاسدارانى ئێرانیدا کۆدەبێتەوە، ئەوەش بەپێی ڕۆژنامەى عەرەبى لەندەنى.

 

مالیکى یەکشەممەى ڕابردوو بە سەردانێک گەیشتە ئێران کە چەند رۆژێکى پێدەچێت، بەپێی ڕاگەیەنراوێکى نوسینگەکەى، مالیکى کە سەرۆکایەتى حزبى دەعوەى ئیسلامى دەکات چاوى بەژمارەیەک بەرپرسى ئێرانى دەکەوێت و هەروەها لەو سەردانەیدا چەند پشکنینێکى پزیشکى ئاسایى بۆ تەندروستى ئەنجامدەدات.


نوسینگەى مالیکى خۆى لەبەردەم کۆمەڵێک پرسیاریدا بینیەوە، دواى ئەوەى هەواڵەکە دزەى کرد کە مالیکى بەسەردانێکى نهێنى بەرەو تاران بۆ دیدارى عەلى خامنەى و بەرپرسانى سوپاى پاسداران لەسەرووى هەمویانەوە قائانیى بەڕێکەوتووە بۆ باسکردنى چەند دۆسییەکى تایبەت بەکاروبارەکانى عێراق.


پرسیارەکان پەیوەستن بەوەى تاچەندە سەردانەکەى مالیکى پەیوەندى بە جوڵاندنى بزاوتێکى سیاسیەوە هەیە لەبەغدا بەئامانجى فشار خستنە سەر کازمى، یاخود هەوڵدان بۆ وەرگرتنەوەى متمانە لێى گەر بێت و پاشەکشە لەو هەوڵانەى نەکات بۆ دورکەوتنەوەى لەئێران و نزیک بوونەوەى لەئەمریکا و سعودیە.

me_ga.php?id=960
رۆژنامەکە لەزارى چەند سەرچاوەیەکى سیاسی لەبەغداوە گواستویەتییەوە، هەڵمەتە میدیایەکان بۆ سەر کازمی لەبەرژەوەندى هێزە سیاسیەکانى سەربەئێران لەعێراقدا بەتایبەتى حزبى دەعوە و دەوڵەتى یاسا و سەرکردەى میلشیاکان کۆتایی نایەت، بەهۆى ئەو پشتگیرییەى کە ئێستا لەلایەن خەڵکیەوە بۆ کازمیى لەئارادایە بەتایبەتى لەناو چینى گەنجانى ناو شیعەکان.


فاروق یوسف کە نوسەرێکى عێراقیە بەڕۆژنامەکەى ڕاگەیاندووە، ئێران لەم قۆناغەدا پێویستى بەبەرەنگاربوونەوەى حکومەتەکەى کازمییە و بۆ ئەوەش پێویستى بەگەڕانەوەى خزمەتەکانى مالیکى هەیە.
me_ga.php?id=961
باسى لەوەش کردووە، ئێران باش دەزانێت ئەوەى داواى لەمالیکى دەکات بۆى دەکات چونکە دۆخەکەى لەتەنگەژەدایە بۆیە لەڕێگەى ئەوەوە هەوڵى پڕوپاگەندەى ناوخۆیى دەدات هاوکات لەگەڵ بەردەوامى موشەکبارانکردنى بنکە سەربازییەکانى ئەمریکا لەعێراقدا.

 

لەوەڵامى ئەوەى مالیکى لەهەوڵەکانیدا سەردەکەوێت..؟ یوسف دەڵێت، ئەوە گەرەنتى نیە بەهۆى ئەوەى زۆرێک لەسەرکردەکانى حزبى دەعوەى نزیک لەمالیکى وازیانهێناوە و ئەویش بەکارتێکى سوتاو دەزانن و ئێرانیش هیچ زیانێک ناکات چونکە تەنها مالیکى بارمتەى بەردەستى نیە.

 

ڕۆژنامەکە ئەوەشى خستووەتە ڕوو، چەند لایەنێکى سیاسى و میلیشیاکانى نزیک لەئێران واى دەبینن، تێکەڵکردنى کارتەکان لەسەر ئاستى ئەمنیى ڕەنگە سەر لەکازمى بشیوێنیت و شکستى پێبهێنیت پیش هەڵبژاردن، بۆیە میلیشیاکان هێرشەکانیان بەمەبەستى بەئامانجگرتنى هێزەکانى هاوپەیمانان و هێزەکانى ئەمریکا لەعێراقدا چڕکردووەتەوە بێ ئەوەى بەئاشکرا بەرپرسیارێتى ئەو هێرشانە بگرنە ئەستۆ.


سەرچاوە سیاسیەکان باسیان لەوەکردووە، لەسەردانەکەى مالیکیدا بۆ تاران ڕەنگە لێکتێگەیشتنەکان لەسەر زیادبوونى گرژییە ئەمنیەکان لەدژى حکومەتەکەى کازمى بەپاساوى بەرخودان لەدژى هێزەکانى ئەمریکا، لەگەڵ خامنەى و سەرکردەکانى سوپاى پاسداراندا تاوتوێ بکرێت.


بەپێى ڕۆژنامەکە لەکاتى ویلایەتەکەى مالیکى دا لەنێوان ساڵانى 2006 تا 2010 زۆربەى میلیشیا توندڕەوەکان گەشەیان کردووە و لەئێستاشدا گرەو لەسەر گەڕانەوە بۆ گۆڕەپانى سیاسى بەپاڵپشتى تاران لەداهاتودا بەهێزەوە دەکات، بەتایبەت دواى ئەوەى لەمشەش ساڵەى دواییدا بەفشارى مەرجەعیەتى باڵاى شیعەکانى عێراق پەراوێز خراوە.

ئەوەش خراوەتەڕوو، سیستانى لەو باوەڕەدایە کە خامنەیى چەندین ساڵە مالیکى بەکارهێناوە بۆ هاندانى شیعەکان عێراق تا بچنە ناو ململانێ خوێناوییەکانى سوریا و یەمەن بەنوێنەرایەتى ئیران.

هەروەها لەزارى چاودێرانەوە ئاماژە بەوەکراوە، مالیکى دەیەوێت لەئەگەرى دروستبوونى هەر بۆشایەکى سیاسیدا کە بەهۆى دۆخى ئەمنی بەغداوە ڕووبدات هەلەکە بقۆزێتەوە بەتایبەت لەکاتى نزیکبونەوەى وادەى هەڵبژاردنەکاندا.