گه‌ڕان

Shadow Shadow
سیاسه‌تی

سەرۆکایەتی پەرلەمانی عێراق ڕاگەیەنراوێکی لەبارەى کوشتنی خێزانە کوردەکەى بەغدا بڵاوکردەوە

2020.09.16 - 14:43
سەرۆکایەتی پەرلەمانی عێراق ڕاگەیەنراوێکی لەبارەى کوشتنی خێزانە کوردەکەى بەغدا بڵاوکردەوە

ناس کورد-

سەرۆکایەتی پەرلەمانی عێراق ئیدانەى کوشتنی خێزانێکی کوردی دانیشتوی شاری بەغدا کرد و داوای لێکۆڵینەوەی بەپەلە و دەستگیرکردنی بکەرانی تاوانە دەکات بە زووترین کات.

 

ئەمڕۆ چوارشەممە، 16ی ئەیلولی 2020، بەشیر حەداد، جێگری دووەمی سەرۆکى پەرلەمانی عێراق ڕاگەیەنراوێکی بڵاوکردەوە و دەڵێت، "بە توندترین دەستەواژە ئیدانەی ئەو تاوانە قێزەونە دەکەین لەدژی خێزانێک کە لە ناوەڕاستی بەغدا ژیاون، هێرشکراوەتە سەر باوک و هاوسەر و کچەکە و بە شێوەیەکی ترسنۆکانە کوژراون و جەستەیان شێوێنراوە."

 

بەشیر حەداد ئەو "تاوانە قێزەونەى" ئیدانە کردووە و داوای لە "لایەنی پەیوەندیدار کردووە بە زووترین کات لێکۆڵینەوە بکەن و بکەرانی ڕادەستی دادگا بکەن بۆئەوەى سزای دادپەروەرانەى خۆیان وەربگرن."

 

دارا ڕەئوف و خێزان و کچەکەى سەرقاڵى ئامادەکاریی بوون بۆ جێهێشتنى یەکجارەکى بەغدا بەرەو سلێمانى، بەڵام ژمارەیەک چەکدارى نەناسراو ئەو خەونەیانى لەگۆڕنا و پێکەوە لەبەرچاو یەکترى لەناو ماڵەکەى خۆیاندا کوژران.  

  

دارا و عالیەی هاوسەری و شیلانى کچى کە سەرجەمیان کوردن، ساڵانێکى زۆر بوو لەبەغدا نیشتەجێ بوون، بەدیاریکراوى ماڵەکەیان لە گەڕەکى مەنسورى پارێزراو بوو بەهۆى نزیکى لەباڵیۆزخانەکانى بەحرەین و روسیا، بەڵام ئەوە دورینەخستنەوە لە مەترسی کوشتن و بە ئامانجگرتنیان.  

  

درەنگانى ئێوارەى دوێنێ کەسوکارە نزیکەکانیان توشى شۆک بوون، کاتێک هەواڵى کوژرانى هەر سێکیان پێکەوە پێیان ڕاگەیەنرا، ئەوان سەرقاڵى ئامادەکردنى کەلوپەل و خانوى پێویست بوون بۆ ئەو خێزانە تا لە سلێمانى نیشتەجێ بن، نەک هەواڵى مەرگیان کە بەتەواوى تاساندوونى.  



  

ئاشنا بابان خوشکەزاى دارا بە ناس کوردى ڕاگەیاند، "ئێوارەى دوێنێ ئاگادارکراینەوە کە خاڵم و خاڵۆژنم و کچەکەى لە ماڵەکەى خۆیان لە گەڕەکى مەنسورى بەغدا کوژراون، وتیان بە چەقۆ لە حەمامەکە کوژراون و کچەکەشیان خنکێنراوە".  

  

بەپێی هەندێ سەرچاوە ئەوان سەربڕدڕاون بەڵام هێشتا پۆلیس ئەوەى پشتڕاستنەکردووەتەوە.  

  

ئاشنا وتى، "نازانین هۆکارەکە چییە چونکە ئەوان کێشەیان نەبووە، بەڵام ئەوەى ئێمە بۆیدەچین دزى بووە لەبەر ئەو بڕە پارەیە بووە کە هەیانبووە لەماڵەوە، رووداوەکە زۆر کتوپڕ بووە".  

  

دارا و هاوسەرەکەى فەرمانبەرى خانەنشین بوون و پێکەوە لەگەڵ شیلانى کچیان دەژیان، شیلان پزیشکى دەرمانسازى بووە و لە شاری پزیشکی بەغدا کاریکردووە.  

  

لەبارەى ئەو دەنگۆیانەى باس لەوە دەکەن شیلان چالاکوانى خۆپیشاندانەکان بووە، ئاشنا وتى "شیلان پزیشکى دەرمانسازى بووە و زۆر تەدەخولى سیاسەت و خۆپیشاندانى نەکردووە، ئەگەر کردبیشێتى ئاگادارنین".  

  

شیلان لە هەژمارەکەیدا لە فەیسبوک تەنها یەک وێنەى خۆپیشاندانەکانى بڵاوکردووەتەوە کە مێژووەکەى دەگەڕێتەوە بۆ کۆتایی ساڵى ڕابردوو دواى سەرهەڵدانى خۆپیشاندانەکانى دژى حکومەت، کە وێنەکە گەنجێکە و ئاڵاى عێراقى لەخۆیەوە پێچاوە و لە گۆڕەپانى خۆپیشاندانەکان وەستاوە.  

  

لە ئێستادا هەر سێ تەرمەکە لە پزیشکى دادوەرى بەغدان و پۆلیس هیچ زانیاریەکى لەبارەى هۆکارى رووداوەکەوە ئاشکرانەکردووە.  

  

"پۆلیس تا ئێستا هیچ پێ نەوتوین، کارەساتەکە ئەوەیە هەمویان لەبەرچاوى یەکتر و بەو شێوە دڕندانەیە کوژران"، ئاشنا وایوت.  

  

ئاشنا هەفتەى رابردوو دوایین جار لەگەڵ خاڵى قسەیکردووە و پێکەوە باسى ئامادەکارییەکانیان کردووە بۆ نیشتەجێ بوونیان لە سلێمانى، دواى ئەوەى بڕیارى جێهێشتنى بەغدایان داوە.  

  

ئاشنا دەڵێت، "هەفتەى پێشوو دوایین جار لەگەڵ خاڵم قسەمکرد وتى بڕیارمداوە ئەم هەفتەیە بێینە سلێمانى نیشتەجێ بین، ئێمەش خانوو و شتمان بۆ دابینکردبوون، بەڵام بەداخەوە ئێستا تەرمەکانیان دەهێنرێتەوە لەجیاتى خۆیان".