گه‌ڕان

Shadow Shadow
سیاسه‌تی

’’هەڵمەتەکە سەرە گەورەکانى گەندەڵى دەگرێتەوە’’

شەش گەورە بەرپرسى عێراقى لەسەر دۆسیەى گەندەڵى و تاوانى نائاسایی دەستگیرکران

2020.09.16 - 08:46
شەش گەورە بەرپرسى عێراقى لەسەر دۆسیەى گەندەڵى و تاوانى نائاسایی دەستگیرکران

ناس کورد-

هێزە سەربازییە تایبەتەکانى عێراق تا ئێستا شەش گەورە بەرپرسیان دەستگیرکردووە، لە چوارچێوەى ئەو هەڵمەتەى لیژنەى لێکۆڵینەوە لە تاوانە گەورەکانى گەندەڵى و تاوانە نائاساییەکان دەستیپێکردووە، ئەوەش بەوتەى سەرچاوەیەکى باڵاى ئەمنى بۆ ناس کورد.

 

سەرچاوەکە ئاشکرایکرد، دوێنێ سێشەممە هێزێکى سوات ئەحمەد ساعدى، بەڕێوەبەرى پێشووى دەستەى گشتى خانەنشینى لەماڵەکەى خۆیدا دەستگیرکردووە و بەرەو بارەگاى هێزەکە گواستوویەتییەوە و رەوانەى بەردەم دادوەرى لێکۆڵینەوە دەکرێت.

 

وتیشى، "شەشى بەرپرس تائێستا دەستگیرکراون لەهەمان هەڵمەتدا"، بەبێ ئەوەى ناوەکانیان ئاشکرابکات و جەختیکردەوە لەکاتێکى گونجاودا لەرووى یاساییەوە ناوەکان ڕادەگەیەنرێت.

 

سەرچاوەکە باسى لەوەشکرد، لیژنەکە حەوت دۆسیەى گەورەى گەندەڵى رادەستکراوە و کاردەکات بۆ جێبەجێکردنى بڕیارى دەستگیرکردنى تۆمەتباران و وتى "هەڵمەتەکە سەرە گەورەکانى گەندەڵى دەگرێتەوە، قۆناغى داهاتووى هەڵمەتەکە ژمارەیەک گەورە بەرپرسى ناوچەیی لەخۆدەگرێت".

 

لیژنەى لێکۆڵینەوە لە تاوانە گەورەکانى گەندەڵى و تاوانە نائاساییەکان رۆژى 27ى ئاب لەلایەن مستەفا کازمى سەرۆکوەزیرانەوە پێکهێنراوە و ماوەى هەفتەیەکە دەستبەکاربووە.

 

لەچەند رۆژى ڕابردودا ئەحمەد مەلا تەڵال وتەبێژ بەناوى سەرۆکوەزیرانى عێراق ڕایگەیاندبوو، بەم نزیکانە دەستگیرکردنى چەند ناوێکى گەورە دەبیستن بەهۆى تێوەگلانیان لە گەندەڵییەوە.