گه‌ڕان

Shadow Shadow
سیاسه‌تی

هەپەگە بۆ ناس کورد: لە هەموو شوێنێک بەرخۆدان دەکەین

شەڕ و پێکدادان لە نێوان گەریلاکانی پەکەکە و سەربازانی تورکیا دەستیپێکردەوە

2020.09.15 - 22:18
شەڕ و پێکدادان لە نێوان گەریلاکانی پەکەکە و سەربازانی تورکیا دەستیپێکردەوە

ناس کورد- ئاکۆ حەمەد رابی

ئەمشەو لە سنوری برادۆست شەڕ و ڕوبەڕوبوونەوەیەکی سەخت لەنێوان سەربازانی سوپای تورکیا و گەریلاکانی پەکەکە ڕوویدا و تائێستاش بەردەوامە، وتەبێژی هەپەگەش دەڵێت، لەهەموو شوێنێک دژی سوپای تورکیا بەرخودان دەکەن.

 

سەرچاوەیەکی ئاگادار لە ناوچەکەوە بە ناس کوردی ڕاگەیاند: "لە پێش کاتژمێر 9:00ی ئەمشەوەوە لە گەروی کەوێتا کە ناوچەیەکی بەرزایی سنوری ناوچەی برادۆستە شەڕو ڕوبەڕوبونەوەی چەکداری لەنێوان پەکەکە و سوپای تورکیا دروستبووەو تائێستاش ناوە ناوە دەنگی تەقە دەبیسترێت".

 

هاوکات جەلال عوزێر، موختاری گوندی خەلیفان کە ناوچەیەکی سنوریە لەبرادۆست ئەوەی بۆ ناس کوردی پشتڕاستکردەوە کە دەنگی چەکی جۆراو جۆر دەبیسترێت، بەڵام زانیاری وردی لەوبارەیەوە نەبوو.

 

لەلایەکی دیکەوە دیار دەنیز، وتەبێژی هێزەکانی پاراستنی گەل (هەپەگە) باڵی سەربازی پەکەکە بەناس کوردی ڕاگەیاند: 'گەریلاکانمان لەهەموو شوێنێک دژی سوپای تورکیا بەرخودان دەکەن و ئەو شەڕو ڕوبەڕوبونەوانەش لەو چوارچێوەیەدایە."

 

وتیشی: "تائێستا زیانی شەڕەکە نازانین و زانیاریمان لەبارەی ئەنجامی شەڕەکەوە نیە".

 

هاوکات سەرچاوەیەکی ئاگادارو شایەتحاڵ لە سنوری برادۆست بە ناس کوردی وت، ماوەی چەند ڕۆژێکە سوپای تورکیا لە بەرزاییەکی سنورەکەوە بنکەیەکی نوێی سەربازی داناوە.

 

هەر درەنگانی ئێوارەی ئەمڕۆ سێشەممە، سەربازانی سوپای تورکیا تەقەیان لە گوندێکی برادۆست کرد و بەوهۆیەشەوە پاوان و دارستان و ڕەزو باخ و زەوییەکی زۆری هاووڵاتیان سوتاوە، کەمێک پێش ئێستاش شەڕو ڕوبەڕوبوونەوە لە نێوان پەکەکەو تورکیا لەسنوری سیدەکان ڕویدا.

 

مەلا سەعید، موختاری گوندی دایلا لە ناوچەی برادۆستی ناحیەی سیدەکانی قەزای سۆران بە ناس کوردی ڕاگەیاند: "درەنگانی ئێوارەی ئەمڕۆش سەربازانی سوپای تورکیا بە چەکی جۆراوجۆر بۆماوەی 20 خولەک تەقەیان لە گوندەکەمان کرد."

 

وتیشی: "تەقەکردنەکە زیانی گیانی پێنەگەیاندین، بەڵام وێڕای بڵاوبوونەوەی ترس و دڵەڕاوکێ، بەهۆی تەقەکردنەوە بەشێکی زۆر لە پاوان و دارستان و ڕەزو باخچەکانمان سوتاون و زیانی زۆرمان پێگەیشتووە."

 

ئاماژەی بەوەشكرد: "گوندەکەمان نزیکەی 32 ماڵی تێدا نیشتەجێیە، بەڵام بەهۆی نائارامی ناوچە سنوریەکان ژیانمان لێ تاڵ بووە و بەردەوام لە مەترسیداین".