گه‌ڕان

Shadow Shadow
سیاسه‌تی

فراکسیۆنى پارتی هۆکاری کشانەوەى پەرلەمانتارانی یەکێتی لە پرساندنی مەسرور بارزانی ئاشکرا دەکات

2020.09.15 - 20:59
فراکسیۆنى پارتی هۆکاری کشانەوەى پەرلەمانتارانی یەکێتی لە پرساندنی مەسرور بارزانی ئاشکرا دەکات

ناس کورد-

سەرۆكی فراكسیۆنی پارتی لە پەرله‌مانی كوردستان ڕایگەیاند، ھەردوو فراكسیۆنی پارتی و یەكێتی لە پەرلەمانی کوردستان پابەندكراون بە رێكەوتنەكانی پێشووی نێوان  پارتی و یەكێتی، ئەوەش لەکاتێکدایە لە دووەمین یاداشتی پرساندنی سەرۆکی حکومەت و جێگرەکەی و وەزیری دارایی هیچ پەرلەمانتارێکی یەکێتی واژووی لەسەر یاداشتەکە نەکردووە.

 

ئەمڕۆ سێشەممە، 15ی ئەیلولی 2020، لە لێدوانێکی ڕۆژنامەوانیدا، ئومێد خۆشناو، سەرۆكی فراكسیۆنی پارتی لە پەرلەمانی كوردستان ڕایگەیاند: "پێشتر ھەندێك جار ناكۆكی لەنێوان ھەردوو فراکسیۆن پارتی و یەکێتیدا هەبوو، بەڵام ئێستا ڕێكەوتووین، ھەردوو فراكسیون بە تەواوی پابەندی ئەو رێكەوتنانەی رابردوو دەبین كە لە نێوان ھەردوو حزبدا واژووكراون و لەو چوارچێوەیەدا لە كارەكانی پەرلەماندا ھەنگاو دەنێین."

 

ئاماژەی بەوەشکرد: "بە دڵنیاییەوە ھیچ یەكێك لە ئێمە، لە بەشداربووانی حكومەت ناتوانین خۆمان بێبەری بكەین لە  كارەكانی حكومەت و پشتیوانی لە كارەكانی حكومەت دەكەین."

 

سەرۆکی فراکسیۆنی پارتی ڕونیشیکردەوە، ئەو رێككەوتنە بەو واتایە نایه‌ت، وەكو دوو فراكسیۆنی گەورە لە پەرلەماندا قۆرغكاری دەكەن و پەرلەمان بەو شێوەیەی كە بیانەوێت ئاراستە دەکەن، بەڵكو بەشێكی گرنگ دەبن لە كاراكردنی كاری پەرلەمان.

 

وتەکانی ئومێد خۆشناو لەکاتێکدایە، لەماوەی ڕابردوودا بەشێک لە پەرلەمانتارانی یەکێتی ڕەخنەیەکی زۆریان لەکارەکانی حکومەت دەگرت و تەنانەت لەیاداشتێکدا بۆ پرساندنی سەرۆکی حکومەت و جێگرەکەی و وەزیری دارایی، ژمارەیەک لە پەرلەمانتارانی یەکێتی واژوویان کردبوو.

 

لەدوای ئەوەی کە بەهۆی هەندێک کەموکوڕی یاسایی، یاداشتەکە کاری پێنەکرا، لەجار دووەمدا، یاداشتێکی دیکە واژووکرا، بەڵام ئەمجارە سەرجەم پەرلەمانتارانی یەکێتی هاوشانی پارتی یاداشتەکەیان واژوو نەکرد و سەرۆکی فراکسیۆنی کۆمەڵیش دەڵیت، یەک واژوویان پێویستە بۆ ئەوەی یاداشتەکە پێشکەش بکەن. 

 

هاوکات دوێنێ عەبدولستار مەجید، سەرۆکى فراکسیۆنى کۆمەڵ لە پەرلەمانی کوردستان وتی، بۆ بابەتی پرساندنی سەرۆکی حکومەت و جێگرەکەی و وەزیری دارایی لەسەر بڕینی موچەی فەرمانبەران "تائێستا 22 پەرلەمانتار واژۆیان لەسەر کردووە و تەنها یەک واژۆ ماوە.  

  

عەبدولستار مەجید لە فەیسبوکی خۆی نوسیویەتی، 22 پەرلەمانتار لە "فراکسیۆنەکانی (یەکگرتوو، نەوەی نوێ، کۆمەڵ، ئازادی، سەربەخۆکان، گۆڕان "دوو ئەندام") واژۆیان لەسەر یاداشتەکە کردووە."  

  

دەشڵێت، "کاری پەرلەمانتاری و نوێنەرایەتی حەقیقی خەڵک ئەمەیە! لەبری موزایەدە و هاتوهاواری سەر شاشەکان، پەرلەمانتار دەبێ لەناو هۆڵی پەرلەمان شەڕی ماف و گوزەرانی دەنگدەرەکانی بکات!"  

  

باسی لەوەشکردووە کە "یاداشتەکە بەپێی پەیڕەوی ناوخۆی پەرلەمانی کوردستان پێویستە 23 پەرلەمانتار واژۆی بکات، ئەگەرچی لە یاداشتی پێشوودا کە سەرۆکی پەرلەمان لەبەر هەندێ پاساوی بێبنەما ڕەتیکردەوە، چەند بەڕێزێک لە فراکسیۆنی یەکێتی واژۆیان کردبوو، بەڵام ئەمجارە کەسیان ئامادەی واژۆکردنی یاداشتەکە نین کە هیوادارین بێن و لەگەڵمان هەمووان پێکەوە شەڕی ماف و ژیان و گوزەرانی خەڵک بکەین و لە حکومەتێک بپرسینەوە کە بەبێ هیچ یاسا و ڕێنماییەک سەدا21ی موچەی خەڵکی بڕیوە بەبێ ئەوەی وەک قەرز و پاشەکەوت حسابی بکات، کە ئەمەش واتای ئەوەیە کە دەیبڕن و کەسیش بەتەمای دانەوەی نەبێ هیچ کات!.