گه‌ڕان

Shadow Shadow
سیاسه‌تی

رۆژنامەیەک وردەکاریی لەو بارەیەوە ئاشکرادەکات

گروپەکانى کاتیۆشا لە عێراق ’لە چاوەڕوانى هێرشێکى بەهێزى ئەمریکادا’

2020.09.15 - 11:07
گروپەکانى کاتیۆشا لە عێراق ’لە چاوەڕوانى هێرشێکى بەهێزى ئەمریکادا’

ناس كورد-

چاوەڕواندەکرێت واشنتن هێرشێکى بەهێز بکاتە سەر ئەو گروپە چەکدارانەى کە باڵیۆزخانە و بەرژەوەندییەکانى ئەمریکا لە عێراق دەکەنە ئامانج لەژێر ناوى "بەرگریدا"، ئەوەش بەپێی رۆژنامەى (مەدا)ى عێراقى.

 

بەپێی راپۆرتێکى رۆژنامەکە، گروپى مافیایی نەناسراو، کە بەرپرسیارێتى لەو هێرشانە ڕادەگەیەنن، بەشێوەیەکى بەردەوام چالاکن و لەژێر ناوى نوێدا خۆیان رادەگەیەنن.

 

ئاماژە بەوەشکراوە، سیاسییەکان پێیانوایە، ئەو ناوانە روکارى نوێی گروپە چەکدارە ناسراوەکانن لە عێراق، کە لەلایەن ئێرانەوە پشتیوانى دەکرێن، بۆ دورخستنەوەى مەترسی پێکدادانى راستەوخۆ لەگەڵ واشنتن.

 

لە ناوەڕاستى ئابى ڕابردووەوە تا ناوەڕاستى ئەم مانگە، ئەو گروپانە 21 هێرشیان ئەنجامداوە، کە نۆیان لەرێگەى کاتیۆشاوە ئەنجامدراون بۆ سەر سەربازگەى تاجى لەبەغدا، باڵیۆزخانەى ئەمریکا لەناوچەى سەوز، فڕۆکەخانەى بەغدا، 12 هێرش لەرێگەى بۆمبى چێنراو بۆ سەر کاروان و پشتیوانى لۆجسیتى هێزەکانى ئەمریکا لەرێگە خێراکان.

 

ئەو گروپانە کە ناسراون بە "گروپەکانى کاتیۆشا" نزیکەى دوو مانگە کارەکانیان فراوانکردووە، هەروەها لەماوەى سێ مانگدا زیاتر لە 30 هێرشیان کردووەتە سەر بارهەڵگر و پێگە سەربازیی و دیبلۆماسییەکان.

 

زۆربەى هێرشەکان لەلایەن گروپەکانى وەک (ئەسحابولکەهف)وە بەرپرسیارێتى ئەنجامدانیان لە ئەستۆ گیراوە کە زیانى گەورەى لێکەوتووەتەوە.

 

سەرچاوەیەکى ئاگادار بە رۆژنامەکەى وتووە "ئەو میلیشیایانە پڕوپاگەندە دەکەن و پێکدادانیان ناوێت لەگەڵ واشنتن، بەڵام دەگەڕێن بۆ شەرعیەتدان بە مانەوەى خۆیان و چەکەکانیان لە عێراق".

 

سەرچاوەکە کە سەرۆکى حزبێکە و داوایکردووە ناوى نەهێنرێت دەڵێت "ئەمریکا دەستەوەستان ناوەستێت بەرانبەر سوکایەتیکردن بە هێزەکانى، رەنگە بەم نزیکانە هێرشێکى بەهێزو کۆتایی بکاتە سەر گروپەکان".

 

بەپێی رۆژنامەکە، هەندێ خوێندنەوە ئاماژە بەوە دەکەن ئیسماعیل قائانى جێگرەوەى قاسم سولەیمانى چەند مانگێک لەمەوبەر شێوازێکى نوێی داناوە بۆ بەرەنگاربوونەوەى ئەمریکا، لە رێگەى ناوى "وەهمی بۆ میلیشیا شیعەکان" لەژێر ناوى بەرگرى دژى هێزەکانى ئەمریکا.

 

سەرچاوەکە دەڵێت "گروپەکانى کاتیۆشا هەمان گروپە چەکدارە ناسراوەکانن لە عێراق کە لەلایەن ئێرانەوە هاوکارى دەکرێن، بەڵام لەژێر ناوى وەهمیدا خۆیان شاردووەتەوە".