گه‌ڕان

Shadow Shadow
سیاسه‌تی

’وەڵامێکتان دەدەینەوە کە هەزار جار لەکوشتنى سولەیمانى گەورەتر بێت’

ترەمپ هەڕەشەى توند لە ئێران دەکات: بیر لە تۆڵەى سولەیمانى مەکەنەوە 

2020.09.15 - 09:55
ترەمپ هەڕەشەى توند لە ئێران دەکات: بیر لە تۆڵەى سولەیمانى مەکەنەوە 

ناس کورد-

سەرۆکى ئەمریکا هەڕەشەی وەڵامدانەوەى توند لە ئێران دەکات بەرانبەر هەر هێرشێکى ئەو وڵاتە لەدژى ئەمریکا وەک تۆڵەکردنەوەى کوژرانى قاسم سولەیمانى.

 

دۆناڵد ترەمپ، سەرۆکى ئەمریکا لە تویتێکدا نوسیویەتى "هەر هێرشێک لەلایەن ئێرانەوە بەهەر شێوەیەک بێت دژى ئەمریکا وەڵامیدەدەینەوە بەجۆرێک کە هەزار جار گەورەتر بێت لەو هێرشە".

 

ئاماژەى بەوەشکردووە، ئێران رەنگە بیەوێت تۆڵە بکاتەوە و هێرش بکات، وەک وەڵامدانەوەیەک بۆ کوژرانى قاسم سولەیمانى لەلایەن ئەمریکاوە، وەک سەرچاوە رۆژنامەوانییەکان باسى دەکەن.

 

ترەمپ لە تویتەکەیدا جارێکى تر بەرگرى کردووە لە بڕیارەکەى بۆ کوشتنى قاسم سولەیمانى و جەختیکردووەتەوە، بڕیارەکەى بەهۆى پلانى سولەیمانیەوە بووە بۆ هێرش و کوشتنى سەربازانى ئەمریکا لەداهاتوودا.

 

لاى خۆیەوە، مایک پۆمپیۆ وەزیرى دەرەوەى ئەمریکا بە ئاژانسى فرانس پرێسى ڕاگەیاندووە، بەهەموو هەوڵیانەوە کار دەکەن بۆ پاراستنى بەرپرسەکانیان، هۆشداریشیداوەتە تاران لە هێرشکردنە سەر هەر هاووڵاتییەکى ئەمریکى لەهەر شوێنێک بێت.

 

ئەوە لەکاتێکدایە بەگوێرەى ماڵپەرى (پۆلیتیکۆ)ى ئەمریکى، ئێران پلانیداوە بۆ تیرۆکردنى لانا مارکس باڵیۆزى ئەمریکا لە باشورى ئەفریقا کە کەسێکى نزیکە لەسەرۆکى ئەمریکاوە.

 

بەڵام وەزارەتى دەرەوەى ئێران وەڵامى ماڵپەرەکەى داوەتەوە و ڕایگەیاندووە ئەو زانیارییانە ناڕاستن و هیچ بنەمایەکیان نییە.