گه‌ڕان

Shadow Shadow
سیاسه‌تی

سەدر توڕەیە و عامریش خۆی بێبەری دەکات

گۆڕانکارییەکانى کازمى لە بەردەم ڕەشەباى ناڕەزاییدایە و بە ’’گەڕانەوە بۆ دواوە’’ وەسف دەکرێت

2020.09.14 - 23:33
گۆڕانکارییەکانى کازمى لە بەردەم ڕەشەباى ناڕەزاییدایە و بە ’’گەڕانەوە بۆ دواوە’’ وەسف دەکرێت

ناس کورد-

بڕیارەکەى مستەفا کازمى بۆ گۆڕانکاریکردن لە ژمارەیەک بەرپرسى گەورەى حکومی کاردانەوەى زۆرى لێکەوتەوە، هەندێ لایەن نیگەرانن و خۆیان لێ بێبەرى دەکەن، لەکاتێکدا حکومەت جەخت لە گۆڕانکارییەکان دەکاتەوە.

 

گۆڕانکارییەکان 16 پۆستى گرنگى حکومى گرتووەتەوە کە پەیوەستن بە دەستە و بانک و ئەمیندارێتى و بریکارى وەزارەتەکان، ئەوەش یەکەم گۆڕانکارى فراوانى لەو شێوەیەى مستەفا کازمییە لەو کاتەوە کە پۆستى سەرۆکوەزیرانى گرتووەتە دەست.

 

هێرشى فەتح

گۆڕانکارییەکان کاردانەوەى خێرایان لێکەوتەوە، هاوپەیمانی فەتح هێرشیکردە سەر گۆڕانکارییەکان و بێ بەریبوونى لە تێوەگلان لەو گۆڕانکارییانە نیشاندا.

 

هادی عامری، سەرۆکی هاوپەیمانی فەتح، ئەمڕۆ دووشەممە 14ی ئەیلولی 2020  لە ڕاگەیەنراوێکدا ڕایگەیاند "ئەو گۆڕانکاریانەی کە ئەمڕۆ لە پۆستە ئیدارییە باڵاکانی حکومەتدا کران مشتومڕێکی  زۆری هەڵگرت، بەهیچ شێوەیەک پەیوەندی بە هاوپەیمانی فەتحەوە نییە و ئاگاشمان لێی نییە".

 

وتیشی، "لە بارەی دانانی شێخ سامی مەسعودی لە یەکێک لەپۆستەکاندا، دەمانەوێت ئەوە بخەینە ڕوو ناوبراو هەر لە سەردەمی سەرۆکوەزیرانی پێشودا پۆستی جێگری هەبووە، ئەگەر سەرۆکوەزیرانی لە ئێستادا دەیەوێت بەو هەنگاوە خۆش ڕەفتاری لەگەڵ  هاوپەیمانی فەتحدا بکات ئەوا مەسعودی زۆر لەو پرسە گەورەترە".

 

عامری جەختیکردووەتەوە، هاوپەیمانی فەتح تەنها دوو شتی لە مستەفا کازمی، سەرۆکوەزیرانی عێراق داواکردووە و چەندین جاریش ئەو داوکارییەی دووبارە کردووەتەوە، "یەکەمیان پاشەکشەکردنی هێزەکانی ئەمریکا لە عێراق دووەمیشیان ئەنجامدانی هەڵبژاردنێکی پاک و بێگەردە".

 

سائیرون هەڕەشە دەکات

گۆڕانکارییەکان هاوپەیمانى سائیرونى سەر بە رەوتى سەدرى بەسەرۆکایەتى موقتەدا سەدر توڕە کردووە و هەڕەشە لە پەرلەمانتارەکانى دەکات کە کار بکەن بۆ هەڵوەشاندنەوەى.

 

هاوپەیمانێتییەکە لە ڕاگەیەنراوێکدا ڕایگەیاند "توشى شۆک بوون بەبینینى لیستى گۆڕانکاریەکان کە زۆربەیان لە چوارچێوەى حزبى و سیاسیدان، ئەوەش ماناى گەڕانەوەیە بۆ هەمان بازنەى پێشوو".

 

هەروەها بێبەریبوونى لەو لیستە ڕاگەیاندووە و دەڵێت لەگەڵ ئاڕاستە و هەڵوێستى ئەواندا یەناگرێتەوە بۆ راستکردنەوەى ڕێڕەوە هەڵەکان لە پرۆسەى سیاسی و هەوڵدان بۆ بنیاتنانى دەوڵەتى هاوڵاتى.

 

ئەو هەڵوێستە دواى چەند خولەکێک هات لە هەڕەشەى ساڵح محەمەد عێراقى وەزیرى سەدر لە پەرلەمانتارانى رەوتەکە کە خۆیان بێبەرى بکەن لەو گۆڕانکارییانە و کار بۆ هەڵوەشاندنەوەى بکەن.

 

هاوکات هەر ئەمڕۆ(دووشەممە) گاتع رکابی، پەرلەمانتاری دەوڵەتی یاسا لە پەرلەمانی عێراق لە لێدوانێکی ڕۆژنامەوانیدا لەگەڵ یەکێک لە میدیا عێراقییەکان وتی " گۆڕانکاری لە پۆستە ئیدارییەکان و دامەزراندنی کەسانی دیکە لەو پۆستانە گەلی عێراقی نیگەران کرد".

 

وتیشی "کەسانێک لەوپۆستانە دانراون کە زیاتر سیاسەتی پشک پشکێنە و تایفەگەری لە عێراقدا دەچەسپێنێت".

 

 بەوتەی ڕکابی "گۆڕانکارییەکان بۆ ڕازیکردنی لایەنە سیاسییەکان ئەنجامدراوە و بەهیچ شێوەیەک ئامانجی عێراقییەکان ناهێنێتە دی، پێویستە ئەو پۆستانە ڕادەستی کەسانی خاوەن ئەزمون بکرێن دوور لە هەموو لایەنگیرییەکی سیاسی".

 

هەڵوێستى حکومەت لەسەر ناڕەزاییەکان

حکومەتى عێراق جەختدەکاتەوە کە لایەنە سیاسییەکان مافى خۆیانە ناڕەزایی دەربڕن لەو بارەیەوە، بەڵام دەسەڵاتى کۆتایی دیاریکردنى کەسەکان مافى مستەفا کازمییە و پێیانوایە ئەو کەسانە دەتوانن ئەو ئەرکانە بەجێبهێنن کە پێیان سپێردراوە.

 

ئەحمەد مەلا تەڵال، وتەبێژ بەناوى سەرۆکوەزیرانى عێراق لە کۆنفرانسێکى رۆژنامەنوسیدا ڕایگەیاند، ئەو بنەمایەى کە سەرۆکوەزیران پشتى پێبەستووە بۆ راسپاردنى ئەو کەسانە شارەزایی و دەستپاکى بووە، هیچ رێگرێکیش نییە بۆ بوونى ئەو کەسانە کە سەر بە حزبەکان بن.

 

وتیشى "لەوڵاتێکدا کەتێیدا رێگە بە ئازادى رادەربڕین درابێت، ئاساییە مشتومڕ لەسەر هەنگاوەکانى حکومەت دروستبێت، لەناویاندا راسپاردنى کەسانى نوێ بۆ پۆستە باڵاکان".

 

ئەحمەد مەلا تەڵال جەختیکردەوە، سروشتى ئیداریی پێویستى بە گۆڕانکاریى هەیە لەپۆستە باڵاکان بۆ گۆڕینى سیاسەتى دامەزراوەکان.