گه‌ڕان

Shadow Shadow
سیاسه‌تی

کێشەکانیان گەیشتووە بە کوێ؟

فراکسیۆنى گۆڕان لە بەغدا ’’هەموو شتێکى لەگەڵ بزوتنەوەکەى بڕاندووەتەوە’’

2020.09.14 - 17:00
فراکسیۆنى گۆڕان لە بەغدا ’’هەموو شتێکى لەگەڵ بزوتنەوەکەى بڕاندووەتەوە’’

ناس کورد-

پەرلەمانتارێکى فراکسیۆنى گۆڕان لە پەرلەمانى عێراق ڕایگەیاند، ئەوان هەموو شتێکیان "بڕاندووەتەوە" لەگەڵ بزوتنەوەکەیان، ئەگەر ئەو خاڵانە جێبەجێنەکرێت کە لە دوایین بەیاننامەیاندا ڕایانگەیاند.

 

ڕۆژى 7ی ئەم مانگە فراکسیۆنى گۆڕان پەیوەندییەکانى لەگەڵ بزوتنەوەى گۆڕان هەڵپەسارد، بەهۆى بڕیارى بزوتنەوەکە بۆ مانەوەیان لە حکومەت "بەبێ هیچ راپرسی و دەنگدانێک" لەو بارەیەوە، لەگەڵ شێوازى مامەڵەیان لەگەڵ فراکسیۆنەکە کە داواى کشانەوەیان کردبوو لە حکومەت.  

 

زیاتر بخوێنەوە: فراکسیۆنی گۆڕان لە پەرلەمانی عێراق پەیوەندییەکانى لەگەڵ گۆڕان هەڵپەسارد

 

ئەو بڕیارە دواى دوو ڕۆژ هات لە کۆبوونەوەکەى جڤاتى نیشتیمانى گۆڕان، کە مشتومڕى توندى بەخۆوە بینى لەنێوان غالب محەمەد نوێنەرى فراکسیۆنەکە و بەرپرسانى بزوتنەوەکە، لەسەر پرسی کشانەوەی گۆڕان لەحکومەت.

 

غالب محەمەد پەرلەمانتارى فراکسیۆنى گۆڕان بە ناس کوردى ڕاگەیاند "ئێمە لەو بەیاننامەیەدا کە حەوتى مانگ بڵاومانکردەوە، هەموو شتێکمان باسکردووە و هەڵویستەکانى خۆمان خستووەتەڕوو".

 

زیاتر بخوێنەوە: تۆمەتی ’’پارتیبوون و عێراقچییەتی’’ کۆبوونەوەکەى ئەمڕۆی جڤاتی نیشتمانی گۆڕانی تێکدا

 

لەبارەى ئەوەى ئەو بەیاننامەیە بەماناى جیابونەوەیان دێت لە گۆڕان، غالب محەمەد وتى، "ئێمە لەبەیاننامەکەدا هەموو شتێکمان بڕاندووەتەوە، ئەگەر گۆڕان ئەوانە جێبەجێنەکات کە لەبەیاننامەکەدا باسمانکردووە، ئەوەش بۆچونى هەر پێنج ئەندامەکەى فراکسیۆنەکەمانە".

 

فراکسیۆنى گۆڕان لە بەیاننامەکەدا جەختى لەداواکەى کردووەتەوە بۆ کشانەوەى گۆڕان لە حکومەت، ئەوەشى بەمەرجى دەستلەکارکێشانەوەى ئەندامانى فراکسیۆنەکە دیاریکردووە، کە بەوتەى ئەوان بەرپرسانى گۆڕان بە نافەرمى داواى ئەوەیان کردووە.

 

بەڵام بڕیارى ئێستاى گۆڕان مانەوەیەتى لە کابینەى نۆیەمى حکومەتدا کە تێیدا خاوەنى چوار وەزیرە، ئەوەش رۆژى 5ی ئەم مانگە دواى کۆبوونەوەکەى جڤاتى نیشتیمانى لەلایەن وتەبێژى بزوتنەوەکەوە راگەیەنرا.  

 

کاردۆ محەمەد، رێکخەرى ژورى پەرلەمانى بزوتنەوەى گۆڕان پێشتر بە ناس کوردى ڕاگەیاندبوو، "بەپێی چوارچێوەى کاریی دامەزراوەیی رێگە بەهیچ ئۆرگانێک نادرێت کە بریارى پێشوەختە بەسەر بزوتنەوەکەدا بسەپێنێت، یاخود هەوڵبدات لەدەرەوە بڕیارى خۆى بسەپێنێت، بەڵکو دەبێت بە گفتوگۆ لەناو ئۆرگانەکاندا پرۆسەى بڕیاردان گفتوگۆى لەسەر بکرێت و بڕیارى پێویست لەسەر پرسەکان بدرێت".   

  

زیاتر بخوێنەوە: گۆڕان وەڵامی فراکسیۆنەکەى لە بەغدا دەداتەوە: ڕێگە بە سەپاندنى بڕیارى پێشوەختە نادرێت

 

سەرەتاى دەرکەوتنى ناکۆکییەکانى نێوان  گۆڕان و فراکسیۆنەکەى لە بەغدا رۆژى 20 ى ئاب دەرکەوتن، کاتێک فراکسیۆنەکە لە ڕاگەیەنراوێکدا داواى لە بزوتنەوەکە کرد لە حکومەتى هەرێم بکشێتەوە، بە پاساوى ئەوەى "شکستی خواردووە".

    

گۆڕان لە پەرلەمانى عێراق خاوەنى پێنج پەرلەمانتارە کە پێکهاتوون لە (یوسف محەمەد سەرۆکى فراکسیۆن، کاوە محەمەد، هۆشیار عەبدوڵا، بەهار مەحمود، غالب محەمەد).