گه‌ڕان

Shadow Shadow
سیاسه‌تی

کاردانەوەى زۆرى لەتۆڕە کۆمەڵایەتیەکان لێکەوتەوە 

بەرپرسێکى باڵاى حکومەت لەبەرنامەیەکى ڕاستەوخۆدا جنێو بە هاووڵاتییەک دەدات [ڤیدیۆ]

2020.09.14 - 15:51
بەرپرسێکى باڵاى حکومەت لەبەرنامەیەکى ڕاستەوخۆدا جنێو بە هاووڵاتییەک دەدات [ڤیدیۆ]

ناس کورد- 

لەوەڵامى پەیوەندى هاووڵاتییەکدا، حەکیم عەبدولزەهرە، وتەبێژى ئەمێندارێتى بەغدا لەبەرنامەیەکى ڕاستەوخۆى تەلەفزیۆنیدا دەستدەکات بە جنێودان بەهاووڵاتییەک کە ڕەخنەی لەدەزگاکەیان گرتبوو، ئەوەش کاردانەوەى زۆرى لەتۆڕە کۆمەڵایەتیەکان لێکەوتەوە و سەرکۆنەى ئەو کارەى عەبدولزەهرەیان کرد.

 

ڕووداوەکە لەوەوە دەستپێدەکات کاتێک هاووڵاتیەک لەپەیوەندیەکدا بەبەرنامەکەوە کە میواندارى عەبدولزەهرە کراوە و نور ماجد بەرنامەکە پێشکەش دەکات،  گلەیی و ڕەخنەیەکى زۆر لە ئەمێندارێتى بەغدا دەگرێت.

 

هاووڵاتیەکە دەڵێت، ئەمیندارێتى پارە و دەرماڵەى زۆرى بۆ تەرخاندەکرێت بێ ئەوەى شەقامەکانى پایتەختى پێ ئاوەدان بکاتەوە و شۆستەکان هەموویان داڕووخاون و هیچ هەوڵێکى ئەمیندارێتى لەسەر زەوى نیە و ئەوان ئەمیندارێتیان لەواقیع دا نیە.

 

لەدرێژەى وتەکانیدا هاووڵاتیەکە ئاماژە بۆ ئەوەش دەکات، لەبەغدا شوێنێکیان بۆ حەوانەوە بۆ نمونە باخچەیەک نیە و ئەمیندارێتى بەغدا هیچ دەستکەوتێک و ویژدانیان نیە.

 

دواى تەواوبوونى پەیوەندی هاووڵاتیەکە کە بەڕاستەوخۆ لەبەرنامەکەدا وەرگیرا، وتەبێژى ئەمیندارێتى بەغدا بەڕوویدا هەڵدەشاخێت و ڕاستەوخۆ و هەر لەبەرنامەکەدا دەستدەکات بە جنێودان بەو هاووڵاتییە.

 

ڕووداوەکە کاردانەوەیەکی زۆری لەتۆڕە کۆمەڵایەتییەکاندا لێکەوتەوە و هاووڵاتیان سەرکۆنەی کاردانەوەکەی بەرپرسەکەی ئەمیندارێتی بەغدا دەکەن.