گه‌ڕان

Shadow Shadow
سیاسه‌تی

فەرماندەیەکى ئەمریکى زانیارى نوێ لەسەر هێرشى میلیشیاکانى عێراق و مامەڵە نوێیەکانى ئێران دەدرکێنێت

2020.09.12 - 09:41
فەرماندەیەکى ئەمریکى زانیارى نوێ لەسەر هێرشى میلیشیاکانى عێراق و مامەڵە نوێیەکانى ئێران دەدرکێنێت

ناس کورد-

 

دواى زیاتر لەهەشت مانگ بەسەر کوژرانى خانەنشینێکى ئەمریکیى و برینداربوونى چوار کارمەندى ئەو وڵاتە بەموشەکى میلیشیاکان، بەرپرسێکى باڵاى سەربازى ئەمریکا ئەوە ئاشکرا دەکات، بەئامانجگرتنى بنکە سەربازییەکانیان لەعێراق لەلایەن میلیشیاکانەوە بەردەوامە و بەرفراوانیش بووە.

 

ژەنراڵ کینیس ماکنزى فەرماندەى ناوەندى هێزەکانى ئەمریکا لە چاوپێکەوتنێکدا کە لەگەڵ تۆڕى ئێن بى نیوز لەمیانى سەردانەکەیدا بۆ ڕۆژهەڵاتى ناوەڕاست ئەنجامیداوە، ئاماژەى بۆ ئەوەش کردووە، ئەو هێرشانە نەبونەتە هۆى کوژرانى هیچ کەس و ئەوەش شتێکى باشە بەڵام بەردەوامە.

 

باسى لەوەشکردووە، لەنیوەى یەکەمى ئەم ساڵدا زیاتر لەساڵى ڕابردوو ڕوبەڕووى هێرشى موشەکى نزیکهاوێژى ڕاستەوخۆ  بۆ سەر بنکە سەربازییەکانیان بوونەتەوە.

 

وتەکانى ئەو بەرپرسە باڵایەى ئەمریکا دواى چەند کاتژمێرێک هات لە ڕاگەیاندنەکەى واشنتۆن لەبارەى کەمکردنەوەى هێزەکانیان لەعێراق بۆ نزیکەى نیوەى ئەو هێزانەى کە ئێستا لەعێراقن لەکۆتایى مانگى ئەیلولدا.

 

ساڵى 2019 میلیشیاکان لەهێرشێکیاندا دەیان موشەکیان دەهاویشت، بەڵام لە هێرشەکانى ئەم ساڵ لەیەک هێرشدا چەند موشەکێکى کەم دەهاوێژن.

 

ماکینزى دەڵێت "ئێمە دەزانین ئەوانە چەکى باش و پێشکەوتوویان هەیە ، ئەو میلیشیایانە موشەکى جۆرى 107 ملم و دوورهاوێژ بەکاردەهێنن و ئەوانەش زۆر پێشکەوتوو نین وەکو هەندێک چەکى تر کە لەلاى ئەوانى دیکە هەیانە".

 

ماکینزى باسى لەوەش کردووە، ئامانجى ئێران ناچار کردنى ئەمریکایە بۆ ئەوەى ناوچەکە بەجێبهێڵێت و تاران ئەمساڵ پەیڕەوى ئەو سیاسەتە دەکات، ئەوەش لەڕێگەى کاریگەرى خستنە سەر حکومەتى عێراق بۆ ئەوەى ئەمریکا عێراق بەجێبهێڵێت.



فەرماندەى ناوەندى هێزەکانى ئەمریکا ئەوەشى خستووەتە ڕوو، ئەوە ڕوونە چارەسەر بۆ ئەو گرفتە ئەنجامى نابێت چونکە حکومەتى عێراق وادەبینێت کە سودى وڵاتەکەى لەپاراستنى پەیوەندییە ئەمنیەکانیدایە لەگەڵ ئەمریکا و ناتۆ و هاوپەیمانەکانیان.



ماکینزى دەشڵێت، پێویستە ئێران بڕیاربدات ئایا بەردەوام دەبێت لەو گۆشەیەدا کە سەرکەوتوو نەبووە تیایدا یاخود ئەو شتانە دەگۆڕێت و دەزانێت چۆن مامەڵە لەگەڵ ئەو دۆخەدا بکات؟