گه‌ڕان

Shadow Shadow
سیاسه‌تی

کازمی: هەڵەبجە ژانێکە بۆ عێراق و کار بۆ خزمەتکردنی دەکەین

2020.09.11 - 18:28
کازمی: هەڵەبجە ژانێکە بۆ عێراق و کار بۆ خزمەتکردنی دەکەین

ناس کورد-

سەرۆکوەزیرانی عێراق لەکاتی سەردانیکردنی مۆنیۆمێنتی شەهیدان لە هەڵەبجە ڕایگەیاند، بۆ هاتوون گوێ لە داواکاری خەڵکی ناوچەکە بگرن و لیژنەیەکیش پێکدەهێنن بۆ پرسی بە پارێزگاناساندنی هەڵەبجە.

 

ئەمڕۆ هەینی 11ی ئەیلولی 2020، مستەفا کازمی، سەرۆکوەزیرانی عێراق گەیشتە پارێزگای هەڵەبجە و تاجەگوڵینەی لەسەر پەیکەری عومەری خاوەر لە مۆنۆمێنتی هەڵەبجە دانا.

 

لەیاداشتی سەردانەکەی کازمیدا، "خه‌می منداڵانی ونبوو، خه‌می كه‌سوكاری كیمیاباران ، خه‌می به‌ پارێزگابوونی هه‌ڵه‌بجه‌، خه‌می ئه‌و به‌ڕیوه‌به‌رایه‌تییانه‌ی كه‌ هاوبه‌شن له‌ نیوان حكومه‌تی عێراق و هه‌رێمی كوردستان، خه‌می قه‌ره‌بووی ئه‌م خه‌ڵكه‌، هه‌روه‌ها له‌سه‌ر بابه‌تی  پاره‌ی گه‌نمی جوتیاران تێدابوو".

 

کازمی لەلێدوانێکدا ڕایگەیاند: "کۆمەڵکوژیی هەڵەبجە ژانێکە بۆ مرۆڤایەتی و خەڵکی عێراق، بۆ هاتووین گوێ لە دانیشتووانی ئەم ناوچەیە بگرین کە لەڕابردوودا ڕووبەڕووی چەندین ژان و ستەم بوونەتەوە، ئێستاش کاتی ئەوەیە ئەو ژانە بکرێتە دەرفەتی هیوا بۆ خەڵکی شارەکە."

 

ئاماژەی بەوەشكرد: "لێکۆڵینەوە لە داواکەتان بۆ بە پارێزگا ناساندنی ئەم شارە دەکەین، لیژنەیەک پێکدەهێنین بۆ لێکۆڵینەوە لێی، بە مەبەستی پێشکێشکردنی خزمەتگوزاری و هاوکاری بۆ ئەم شارە کە تووشی کارەساتێکی گەورە بووە".

 

هاوکات بەوتەی ئازاد تۆفیق، پارێزگاری هەڵەبجە، لە کۆبوونەوەکەیاندا کازمی وتویەتی: " سه‌یری ئه‌م شاره‌بكه‌ن له‌ ماوه‌ی یه‌ك كاتژمێردا پێنج هه‌زار كه‌س شه‌هید بووه‌، ئه‌م شاره‌ زیانێکی گه‌وره‌ی کردووە." 

 

لەدوای سەردانەکەی بۆ هەڵەبجە، مستەفا کازمی چووە دەروازەی سنوریی باشماخ و لەوێ لەگەڵ بەرپرسانی دەروازەکە کۆدەبێتەوە.