گه‌ڕان

Shadow Shadow
سیاسه‌تی

’حکومەتی هەرێم  هەر جارێک و بەبیانوویەک موچەکانمان پێنادات’

مامۆستایان و فەرمانبەرانى سلێمانى یاداشتێک دەدەنە مستەفا کازمى 

2020.09.11 - 14:20
App store icon Play store icon Play store icon
مامۆستایان و فەرمانبەرانى سلێمانى یاداشتێک دەدەنە مستەفا کازمى 

ناس کورد-

بەشێک لە مامۆستایان و فەرمانبەرانی هەرێمی کوردستان لەمیانەی سەردانەکەی مستەفا کازمی، سەرۆکوەزیرانی عێراق بۆ شارى سلێمانى یاداشتێکیان پێشکەش کرد و داوایان لێکرد، مافە خوراوەکانی چەند ساڵی ڕابردوویان کەخۆی دەبینێتەوە لە موچە، بەرزکردنەوەی پلەی وەزیفی و دابەشکردنی زەوییان بۆ بگەڕێنێتەوە.

 

کەناڵی ناس کورد لە تێلیگرام جۆین بکە   

ئەمڕۆ (هەینی، 11ی ئەیلولی 2020)، بەشێک لە مامۆستایان وفەرمانبەرانی شارى سلێمانى یادشتێکیان پێشکەش بە مستەفا کازمی، سەرۆکوەزیرانی عێراق کرد لە میانی سەردانەکەیدا بۆ شاری سلێمانی و لە یاداشتنامەکەدا هاتووە "ماوەی حەوت ساڵە ئێمەی مامۆستایان و فەرمانبەرانی هەرێمی کوردستان، خۆمان و منداڵەکانمان بە دەست سیاسیەتی برسیکردنی ناڕەوای حکومەتی هەرێمی کوردستانەوە دەناڵێنین، هەر جارێک بە بیانویەک".

 

ئاماژە بەوەش کراوە "حکومەتی هەرێمی کوردستان جارێک بە بیانووی پاشەکەوتی زۆرەملێ و جارێکی دیکەش بە بیانووی بڕینی لە 21%ی موچەکانمان پێ نادات، ئێمە هاووڵاتی عێراقی ڕەسەنین وەک هەموو هاووڵاتییەکی ئەم وڵاتە، بۆیە داوا لە بەڕێزتان دەکەین بە هانامانەوە بێن وئەم ستەمە لەسەرمان هەڵگرن و چارەسەر بۆ کێشە نەبڕاوەکەمان بدۆزنەوە".

 

 لەبەشێکی دیکەی یاداشتەکە داوا لە سەرۆکوەزیرانی عێراق کراوە "موچەی فەرمانبەرانی حکومەتی هەرێمی کوردستان بەشێوەیەکی ڕاستەوخۆ لەلایەن حکومەتی فیدراڵییەوە دابەش بکرێت و لقی هەردوو بانکی ڕەشید و ڕافیدەینیش لە شارەکانی هەرێمی کوردستان بکرێنەوە".

 

هەروەها لە یاداشتەکەدا داواکراوە "حکومەتی فیدراڵی سەرژمێریەکی ڕاست و دروست بۆ ژمارەی فەرمانبەرە ڕاستەقینەکانی حکومەتی هەرێم بکات".

 

یاداشتەکە بەپێویستزانیوە "حکومەتی ناوەندی فشار بخاتە سەر حکومەتی هەرێم بۆ ئەوەی موچە پاشەکەوتکراوەکان بگەڕێنێتەوە و بڕیاری ڕاگرتنی پلە بەرزکردنەوەیان کە ماوەی حەوت ساڵە ڕاگیراوە هەڵیوەشێنێتەوە".

 

مامۆستایان و فەرمانبەران داواشیان لە کازمی کردووە "موچەخۆرانی هەرێمی کوردستان هاوتای موچەخۆرانی عێراق بکرێت لە وەرگرتنی قەرز لە بانکی ڕەشید و ڕافیدەین و پارچە زەویشیان بۆ تەرخان بکرێت لەگەڵ پێدانی قەرزی خانوبەرە".   

 

لە کۆتایی یاداشتەکەدا مامۆستیان و فەرمانبەران باسیان" لە ڕەفتارە ناشرینەکانی دەسەڵاتدارانی هەرێمی کوردستان کردووە لە بەکارهێنانی زەبری هێز و لێدان و سوکایەتیکردن دژ بە خۆپیشاندانەکانیان لەشارەکانی هەولێر و ناوچەکانی دیکەی هەرێم، و داواشیان کردووە سەرۆکوەزیرانی عێراق بەخێرا بێت بە هانایانەوە".