گه‌ڕان

Shadow Shadow
سیاسه‌تی

گەڕانەوەى خۆکوژەکان دۆخەکە ناسەقامگیر دەکات

بیرۆکەیەک بۆ جێگرتنەوەى گەڕانەوەى پێشمەرگە بۆ کەرکوک ئاشکراکرا

2020.09.09 - 08:35
بیرۆکەیەک بۆ جێگرتنەوەى گەڕانەوەى پێشمەرگە بۆ کەرکوک ئاشکراکرا

ناس كورد-

نوێنەرێکى کەرکوک لە پەرلەمانى عێراق بیرۆکەیەکى بۆ جێگرتنەوەى گەڕانەوەى پێشمەرگە بۆ کەرکوک ئاشکراکرد، لەکاتێکدا دۆخى ئەمنى پارێزگاکە جارێکى تر رووى لە ناسەقامگیریی کردووەتەوە، دواى ئەوەى داعش لەماوەى هەفتەیەکدا دوو خۆکوژى رەوانەى ناوچەکە کرد.

 

دوێنێ سێشەممە خۆکوژێکى داعش خۆى بە ژمارەیەک سەربازدا لە باشورى کەرکوک تەقاندەوە، دواى ئەوەى لەلایەن هێزێکەوە گەمارۆدرا، ئەوەش دووەم هێرشى لەو شێوەیە بوو لەهەفتەیەکدا، پاش پێنج مانگ لە پەنانەبردنى رێکخراوەکە بۆ ئەو جۆرە هێرشانە.

 

ئەو رێکخراوە لەسەرەتاى ئەمساڵدا پشتى بە هێرشى خێرا دەبەست بۆ سەر خاڵەکانى پشکنین و گوندەکان، پێش ئەوەى ناچاربێت خۆکوژ رەوانەى ناوچەکان بکات بۆ سەر خاڵێکى پشکنینى باشورى کەرکوک لەئەیلولى ئەمساڵدا.

 

لەماوەى هەفتەیەکدا داعش حەوت هێرشى لەناوچە جێناکۆکەکان ئەنجامداوە، کە بەهۆیانەوە نزیکەى 10 کەس کوژران و برینداربوون یاخود بێسەروشوێن بوون. هەروەها لە دوایین هەفتەى ئابى ڕابردوودا ئەو رێکخراوە 12 هێرشى ئەنجامداوە کە بەهۆیانەوە 20 سەرباز و هاوڵاتى مەدەنى کوژران و بێسەروشوێن بوون.

 

کۆى گشتى هێرشەکان لەمانگى ئابدا 35 هێرش بوون کە لە چوار پارێزگا ئەنجامدراون، کە بەهۆیانەوە نزیکەى 70 سەرباز و هاوڵاتى کوژران و برینداربوون.

 

جەمال شکور یەکێک لە نوێنەرانى پارێزگاى کەرکوک لە پەرلەمانى عێراق بە ڕۆژنامەى (مەدا)ى عێراقى ڕاگەیاندووە، "گەڕانەوەى خۆکوژەکان بۆ کەرکوک پێشبینیکراو بوو، بەهۆى بوونى گروپەکانى داعش لەهەندێ ناوچە".

 

دوایین هێرشى خۆکوژى کە لە عێراق تۆمارکرابوو لە نیسانى ڕابردوودا بوو، هەروەها لە کەرکوک خۆکوژێک هێرشیکردە سەر بەرێوەبەرایەتى هەواڵگرى و دژە تیرۆر لەشارەکە و دوو کەس برینداربوون. دوو هێرشەکەى ئەمدواییەش لە نزیک ناحیەى رەشاد سەر بە قەزاى حەویجە روویانداوە کە دەکەوێتە باشورى خۆرئاواى کەرکوک.

 

جەمال شکور دەڵێت، "حەویجە و دەوروبەرى تا ئیستا گروپى داعشى تێدایە، لاوازیەکى ئەمنى هەیە بۆ بەرەنگاربوونەوەیان".

 

قەیرانى هەماهەنگى

گەڕانەوەى هێرشە خۆکوژییەکانى داعش بۆ کەرکوک هاوکاتە لەگەڵ هەوڵەکان بۆ دروستکردنەوەى هەماهەنگى لەنێوان سوپا و پێشمەرگە لەناوچە جێناکۆکەکان بەمەبەستى سەپاندنى ئاسایش، بەڵام تا ئێستا هەوڵەکان بەتەواوى نەگەیشتوون بە ئەنجام.

 

جەمال شکور دۆخى ئیستا دەگەڕێنێتەوە بۆ "دورخستنەوەى پێشمەرگە"، لە دۆسیەى ئەمنى کەرکوک و نەبوونى هەماهەنگى نێوان هەرێم و بەغدا لەو بارەیەوە.

 

ئەمریکا و بەریتانیا لەچەند مانگى ڕابردوودا هەوڵیاندا نێوەندگیریی بکەن لەنێوان هەرێم و بەغدا بۆ زیندوکردنەوەى هەماهەنگى نێوانیان، بەڵام هێشتا هەرێم و بەغدا نەگەیشتوون بە ئەنجامى تەواوەتى لەو بارەیەوە. هەروەها هەندێ لایەنى شیعى و سوننى کەرکوک و ناوچەکانى دیکە دژایەتیان بۆ گەڕانەوەى پێشمەرگە نیشانداوە.

 

ئەوە لەکاتێکدایە، فەرماندەیی پرۆسە هاوبەشەکانى کەرکوک شەممەى ڕابردوو ئامادەبوونى سەنتەرەکانى هەماهەنگى هاوبەشى لەرووى هونەرى و ئیداراییەوە ڕاگەیاند، بەڵام جەختیکردەوە کە هێشتا ئەو سەنتەرانە دەستبەکارنەبوون.

 

بیرۆکەى جێگرەوە

نوێنەرەکەى کەرکوک لە پەرلەمانى عێراق ئاشکرایکرد، بیرۆکەیەکیان بۆ جێگرتنەوەى گەڕانەوەى پێشمەرگە پێشنیازکردووە، بۆ دروستکردنى لیوایەک لە کەرکوک بۆ پاراستنى ناوچەکە، کە سەر بە یەکێک لە وەزارەتە ئەمنییەکان بێت.

 

وتیشى، "هێشتا ئەو بیرۆکەیە لەلایەن حکومەتەوە رەزامەندى لەسەر نەدراوە، ئەوەش ئەو ناوچانە دەخاتە بەردەم هێرشى داعش و گروپە چەکدارەکانى دیکەوە".