گه‌ڕان

Shadow Shadow
سیاسه‌تی

غالب محەمەد بۆ بەشێک لە بەرپرسانی گۆڕان: نایانەوێت دەستبەرداری بەرژەوەندی بن

2020.09.05 - 18:00
غالب محەمەد بۆ بەشێک لە بەرپرسانی گۆڕان: نایانەوێت دەستبەرداری بەرژەوەندی بن

ناس کورد-

لەدوای دروستبوونی گرژییەکانی نێو کۆبوونەوەکەی ئەمڕۆی جڤاتی نیشتیمانیی گۆڕان، غالب محەمەد، یەکەم قسەی لەبارەی ڕووداوەکانەوە کرد  و ڕایگەیاند، ئەوان نایەنەوێت دەستبەرداری کورسی و بەرژەوندی ببن، دەشڵێت، فراکسیۆنەکەیان کۆدەبێتەوە و بڕیاری جدی لەوبارەیەوە دەدەن.

ئەمڕۆ شەممە 5ی ئەیلولی 2020، جڤاتى نیشتمانیى گۆڕان بۆ تاوتوێکردنى چەند پرسێکى ناوخۆیی کۆبووەوە، لەناویاندا هەڵسەنگاندنى کارەکانیان لە حکومەت و ڕاگەیەنراوی فراکسیۆنى گۆڕان لە بەغدا بۆ کشانەوەیان لە حکومەت، بەڵام کۆبوونەوەکە گرژی و ئاڵۆزی بەخۆیەوە بینی. 

 

غالب محەمەد کە وەک نوێنەری فراکسیۆنی گۆڕان لە پەرلەمانی بەغدا بەشداری کۆبوونەوەکەی کرد، لە هەژماری خۆی لە تۆڕی کۆمەڵایەتی فەیسبوک بڵاویکردەوە: :ئەوەی ئەمڕۆ لەکۆبونەوەی جڤات ڕویدا کێشەیەکی بچوکی نێوان بەندە و گروپی بەرژەوەندی خوازی گۆڕان نەبووە لەحکومەت، بەڵکو کێشەی سەرەکی بووە لەپێناو ژیانی هاوڵاتیانی هەرێمی کوردستان."

 

ئاماژەی بەوەشكردووە: " بەندە بەنوێنەرایەتی فراکسیۆنی گۆڕان لەبەغدا بەشداربووم بۆیە شەڕێکی شەخسی نەبوو، داوام کرد چیتر ئەو گروپە بەردەوام نەبن لەم حکومەتە شکستخواردوە کە بوەتە سەرچاوەی نەهامەتی و دەردەسەری بۆخەڵکی هەرێمی کوردستان و خەریکی مکیاج کردنن بۆ دەسەڵات و دەیانەوێت فراکسیۆنی گۆڕانیش لەبەغدا هاوشێوەی خۆیان لێبکەن و خۆیان و نەوەکانیان وەک شا بژین و ملی هاووڵاتیان بخەنەژێر چەقۆی دەسەڵات."

 

غالب محەمەد باسی لەوەشكردووە: "ئاڵۆزی کۆبوونەوەکە لەوەوە دروست بوو، چونکە ئەوان نایەنەوێت دەستبەرداری کورسی و بەرژەوندی ببن، لای ئێمەش ئەمە قبول نیە".

 

ڕونیشیکردووەتەوە: " لەئێستادا دەگەڕێمەوە بەغدا و لەگەڵ هاوڕێیانم لەبەغدا کۆبونەوە لەوبارەیەوە ئەنجام دەدەین و هەڵوێستی جدیمان دەبێت، دوا بریار لە گەڵ هاوریاندا دەدەین."

 

هەر لەوبارەیەوە ، کاوە محەمەد، ئەندامی فراکسیۆنی گۆڕان لە پەرلەمانی عێراق لە هەژماری خۆی لە تۆڕی کۆمەڵایەتی فەیسبوک ڕایگەیاند: "ئێمە، هەر پێنج ئەندامی فراکسیۆنی گۆڕان لەئەنجومەنی نوێنەرانی عیراق، هاوڕا و یەکدەنگین لەسەر زەروورەتی کشانەوەی بزووتنەوەی گۆڕان لەم حکومەتە پڕ لەگەندەڵی و دژە ئازادییەی هەرێم و تەئکید لەرا و هەڵوێستی پێشوومان دەکەینەوە کە لەبەیاننامەکەی رۆژی (٨/٢٠) رامانگەیاند."

 

ئاماژەی بەوەشكردووە: "بەشداری ئەمڕۆی کاک (د.غالب محەمەد)ی هاوڕێشمان لەکۆبوونەوەی جڤاتی نیشتیمانی، بە نوێنەرایەتی فراکسیۆن بووە و راکانی ئەو دەریبڕیون، رای ئێمەشە و پشتیوانی تەواوی دەکەین."

 

پێشتر سەرچاوەیەکی بەشدار لە کۆبوونەوەکە بە ناس کوردی وت: "کاتێک ئاواتى شێج جەناب ڕاپۆرتەکەى خوێندووەتەوە دواتر وتوویەتى من کۆبوونەوەکە بەجێدەهێڵم و کاروبارى لیژنەکانى هەرێمم هەیە کە بڕیارە بەمنزیکانە سەردانى بەغدا بکەن، غالب محەمەدیش پێی وتووە مەڕۆ و پێویستە تۆ وەڵامى پرسیارەکان بدەیتەوە، بۆ دەتەوێت خۆت بشاریتەوە، تۆ بویتە پارتى و خزمەتى ئەوان لەدژى خەڵک دەکەیت". 

 

بەوتەى سەرچاوەکە ئاواتى شێخ جەناب وەڵامى غالب محەمەدی داوەتەوە و پێی وتووە: "ئێوەش بوونەتە عێراقچى".