گه‌ڕان

Shadow Shadow
سیاسه‌تی

جێگری بەڕێوەبەری تەندروستیی سلێمانی: پێویستە وەزیری تەندروستی داوای لێبوردن بکات

2020.09.05 - 16:53
جێگری بەڕێوەبەری تەندروستیی سلێمانی: پێویستە وەزیری تەندروستی داوای لێبوردن بکات

ناس کورد-

دوای سەردانیکردنی هونەرمەندی توشبووی کۆرۆنا، کەریم گوڵانی لەلایەن وەزیری تەندروستییەوە، جێگری بەڕێوەبەری تەندروستیی سلێمانی ڕەخنەی توند لەو وەزیرە دەگرێت و دەڵێت، تائێستا چەندین کارمەندی تەندروستیی توشی کۆرۆنا بوون و بەسەری نەکردوونەتەوە، بەڵام دەچێت کەسێک بەسەردەکاتەوە کە تەنها بە حزبدا هەڵدەڵێت.

 

د. هێرش سەلیم، جێگری بەڕێوەبەری گشتیی تەندروستیی سلێمانی لە نوسینێکدا لە هەژماری تایبەتی خۆی لە تۆڕی کۆمەڵایەتی فەیسبوک ڕایگەیاند: "لە سەرەتای سەرهەڵدانی كۆرۆناوە تا ئەم ساتە بە دەیان و سەدان پزیشك و كارمەندی تەندروستی كە لە سەنگەری یەكەمی بەرەنگاربوونەوەی كۆرۆنا بوون تووشی پەتاكە بوون و بەشێكیش گیانیان سپارد كە زۆرینەیان بە گیرفانی بەتاڵ و بێ مووچە بەرگریكارێكی سەرسەختی كۆرۆنا بوون."

 

ئاماژەی بەوەشكردووە: "لەوکاتەوە نەك وەزیری تەندروستی و ستافەكەی بە پەیامێكیش بەسەریان نەكردونەتەوە، بگرە پاداشتی مەعنەویشیان نەداونەتەوە لانی كەم سەردانی خانەوادەی كۆچكردووانی كردبێت، بەڵام ئەوەی زیاتر پزیشكان و كارمەندان نیگەران دەكات وەزیرێك كە ئەبوایە لەم بارودۆخە ڕۆڵی سەرۆك وەزیران ببینێ، بەڵام بووە بە نوێنەری كۆمەڵایەتی و دەوری كوێخای دێ دەبینێ كەسێك بەسەر ئەكاتەوە كە 30 ساڵە مشەخۆرە لەسەر گیرفانی حزب و حوكمەت."

 

جێگری بەڕێوەبەری گشتیی تەندروستیی سلێمانی ئەوەشی خستووەتەڕوو: " ئەو کەسە هونەرەكەشی بۆ گیرفان پڕكردن بەكارهێناوەو خاوەنی هۆڵێكی بۆنەو ئاهەنگە نرخەكەی لە 40 دەفتەر دۆلار كەمتر نیە، کەچی كەوتۆتە لاڵانەوە كڕوزانەوە بۆ ئەوەی وەزیری تەندروستی ڕێگەی بدا هۆڵی بۆنەكەی بۆ بكاتەوە."

 

د. هێرش سەید سەلیم باسی لەوەشكردووە: " بەدەنگەوە چوونی وەزیرێك بۆ ئەو جۆرە كەسانە و پشتگوێ خستنی سەربازەكانی خۆی سیاسەتی پادارو بێ پایە، پێویستە جەنابی وەزیر پۆزش بۆ پزیشكان  و كارمەندانی خۆی بێنێتەوە كە بوون بە قوربانی كۆرۆنا و داوای لێبووردنیان لێ بكات، لەمە بەدەر سیفاتی سەركردایەتی كردنی دەیان هەزار كارمەند و پزیشكی دەكەوێتە ژێر پرسیار."

 

ئەوەش لەکاتێکدایە، ئەمڕؤ شەممە 5ی ئەیلولی 2020، هونەرمەند، کەریم گوڵانی، ڤیدیۆیەکی بڵاوکردەوە و تیایدا ڕایگەیاند، بارودۆخی تەندروستیی خۆی و خێزانەکەی زۆر خراپە و بەهۆی ئەوەشی ماوەی شەش مانگە کاری نەکردووە، پارەی حەبیشیان پێنییە بیکڕن.

 

ئاماژەی بەوەشكرد: "جەنابی سەرۆک بارزانی، ئەگەر فریامان نەکەون دەمرین و هاوارمان بۆ تۆ هێناوە."

 

هەر لەدوای ئەوە، د. سامان بەرزنجی، وەزیری تەندروستیی هەرێم لەسەر ڕاسپاردەی سەرۆکی حکومەتی هەرێم سەردانی ئەو هونەرمەندەی کرد و دواتریش کەریم گوڵانی ڤیدیۆیەکی دیکەی بڵاوکردەوە و سوپاسی پارتی و وەزیری تەنروستی کرد و داوای لێبوردنیشی کرد ئەگەر قسەیەکی هەڵەی کردبێت و وتی: "من دەروێشی پارتی و ماڵی بارزانیم."