گه‌ڕان

Shadow Shadow
سیاسه‌تی

قەرەباڵغى و پشتگوێخستن.. چۆن ڤايرۆسى كۆرۆنا لە گرتوخانەكانى ئێراندا بڵاودەبێتەوە؟

2020.09.03 - 09:19
قەرەباڵغى و پشتگوێخستن.. چۆن ڤايرۆسى كۆرۆنا لە گرتوخانەكانى ئێراندا بڵاودەبێتەوە؟

ناس کورد- 

قەرەباڵغى و پشتگوێخستن و تەنانەت كەمى سابون، ئەمە بارودۆخى گرتوخانەكانى كۆمارى ئيسلامى ئێرانە كە بەبێ هيچ چەكێك بۆ ڕوبەڕوبونەوەى ڤايرۆسى كۆرۆنا، جێهێڵراون.

 

لەمانگى رابردودا ڤايرۆسى كۆرۆنا گرتوخانەكانى ئێرانى هەراسانكرد، ئەوەش بەپێى زانياريەكانى دامەزراوەى "عەبدولڕەحمان برومند" كە لە بوارى مافەكانى بەندكراوان و ڕێگەگرتن لە سزاى لەسێدارەدان چالاكە، ئەو ڕێكخراوە داواش لە ڕژێمى ئێران دەكات بەگوێرەى ڕێسا نێودەوڵەتيەكان كاربكات بۆ بەرەنگاربونەوەى ڤايرۆسى كۆرۆنا لە بەنديخانەكاندا.

 

دامەزراوەكە كە بارەگاكەى لە واشنتۆنە لە ڕاگەیەندراوێکدا هێماى بۆ ئەوەكردوە، ڤايرۆسى كۆرۆنا بەشێوەيەكى فراوان لە سەرجەم ناوچەكانى ئێران بە خێرايى بڵاوبووەتەوە، بەتايبەتى لە گرتوخانە قەرەباڵغە ناتەندروستەكاندا.

 

جەختیشى كردوەتەوە، دەسەڵاتداران هيچ پێداويستيەكى گرتوخانە و بەندكراوەكانيان بۆ بەرەنگاربونەوەى نەخۆشيەكە دابين نەكردوە، تەنانەت سابونى دروستكراوى ناوخۆيى و پاكژكەرەوەشيان نييە.

 

بەگوێرەى ڕاپۆرتەكە كە زانياريیەكانى بە هاوكارى چالاكوانان و ڕێكخراوەكانى ترى مافى مرۆڤ وەك ڕێكخراوى "هرانا" كۆكراونەتەوە، گرتوخانەكانى ئێران شكستيانهێناوە لە كۆنترۆڵكردنى ڤايرۆسى كۆرۆنا.

 

ڕاپۆرتەکە رونیدەکاتەوە، كۆمەڵگەى گرتوخانەى مەشهدى ناوەندى "وەكيل ئاباد" كە سێ هۆڵى فراوانى تێدايە و 600 بەندكراوى هەيە، بووەتە ناوەندى بڵاوبونەوەى ڤايرۆسى كۆرۆنا، هەروەها لە بەنديخانەى "ئيفين" لانيكەم 8 بەندكراوى سياسى تووشى ڤايرۆسەكە بوون.

 

لەماوەى ڕابردودا ياخيبون لە ژمارەيەك لە گرتوخانەكانى ئێران سەريهەڵدا ئەوەش بەهۆى ترس لە بڵاوبونەوەى كۆرۆنا لەناو بەندكراواندا، بەگوێرەى زانياريەكان و گرتە ڤيديۆييەكان لەيەكێك لە گرتوخانەكانى پارێزگاى كوردستان "سنە" دەيان بەندكراو گرتوخانەكانيان شكاند و هەڵاتن.

 

پێشتريش "ڕۆبەرت كولفيل" وتەبێژى كۆمسيۆنى نەتەوە يەكگرتوەكان بۆ مافەكانى مرۆڤ ڕايگەياندبوو، نيگەرانن لە بارودۆخى بەندكراوانى ئێران ئەوەش دواى ڕاپۆرتەكان سەبارەت بە ياخيبونەكان بەهۆى ڤايرۆسى كۆرۆناوە، لەكاتێكدا ئێران يەكێكە لە وڵاتە زۆر زەرەرمەندەكانى ڤايرۆسى كۆرۆنا لە جيهاندا.