گه‌ڕان

Shadow Shadow
سیاسه‌تی

دواى دەستلەکارکێشانەوەى عەلى حەمەساڵح

گۆڕان سەرۆکێکى نوێ بۆ فراکسیۆنەکەى لە پەرلەمانى کوردستان دیاریدەکات

2020.08.31 - 17:41
App store icon Play store icon Play store icon
گۆڕان سەرۆکێکى نوێ بۆ فراکسیۆنەکەى لە پەرلەمانى کوردستان دیاریدەکات

ناس کورد-

 

 رێکخەرى ژورى پەرلەمانى بزوتنەوەى گۆڕان ڕایگەیاند، سبەینێ بە هەڵبژاردن و سەرۆکێکى نوێ بۆ فراکسیۆنەکەیان لە پەرلەمانى کوردستان دیارى دەکەن، دواى ئەوەى عەلى حەمەساڵح دەستى لەسەرۆکى فراکسیۆنەکە کێشایەوە.

کەناڵی ناس کورد لە تێلیگرام جۆین بکە   

 

بەپێی میدیاکانى گۆڕان، ئەمڕۆ دوشەممە، لە مەکۆى سەرەکى بزوتنەوەى گۆڕان لە شارى سلێمانى، رێکخەرى گشتى و خانەى راپەڕاندن لەگەڵ فراکسیۆنى گۆڕان لە پەرلەمانى کوردستان کۆبونەوە، کە بەیەکەم کۆبوونەوەى لەو شێوەیە دادەنرێت لەدواى دەستلەکارکێشانەوەى سەرۆکى فراکسیۆنەکەوە.

 

کاردۆ محەمەد، رێکخەرى ژورى پەرلەمانى بزوتنەوەى گۆڕان ڕایگەیاندووە "لەکۆبونەوەکەدا بەوردى باس لەو هەوڵ و هەنگاوانەى فراکسیۆنەکە کرا کە لە چوارچێوەى بەرژەوەندى هاوڵاتیاندا کار دەکەن بۆ دەرچونى ژمارەیەک پڕۆژە یاسا".

 

وتیشى "جێبەجێکردن و پەیڕەوکردنى پەیڕەوى ناوخۆى فراکسیۆنى گۆڕان لە کارى پەرلەمانتارى یەکێکى دیکە بوو لە تەوەرى کۆبوونەوەکە.

 

کاردۆ محەمەد باسى لەوەشکرد، سبەینێ بە هەڵبژاردن و سەرۆکێکى نوێ بۆ فراکسیۆنەکە دیارى دەکرێت.

 

لە چەند ڕۆژى ڕابردوودا عەلی حەمەساڵح دەستی لە پۆستی سەرۆكی فراسیۆنی گۆڕان لە پەرلەمانی كوردستان‌ و ئەندامێتی جڤاتی نیشتمانی بزوتنەوەی گۆڕان كێشایەوە و وابڵاوكرايەوە گوايە ڕێكخەر و خانەی ڕاپەڕاندن داوایان لێكردوە واژۆكەى بۆ بانگهێشتكردنی مەسرور بارزانی بۆ پەرلەمان بكێشێتەوە.  

  

بەڵام جەلال محەمەد، پەرلەمانتارى فراكسيۆنى بزوتنەوەى گۆڕان پێشتر بە ناس كوردى ڕاگەیاندبوو، عەلى حەمە ساڵح ماوەى دوو ساڵە سەرۆكى فراكسيۆنە و هيچ كێشەيەكى نەبووە، بەڵكو خۆى چەند جارێك داواى كردووە دەستبەردارى ئەو پۆستە ببێت بۆ ئەوەى زياتر وەك ئەندام پەرلەمانێك بتوانێت ڕۆڵ بگێڕێت لە هەندێك بابەت.  

  

باسى لەوەشكردبوو "لەبەرئەوەى سەرۆكى فراكسيۆن فشاری زياترى لەسەرە و كاتى كەمترە بۆ بەدواداچوون و ئەو جۆرە كارانە، پێشتريش چەند جارێك داواى دەستلەكاركێشانەوەى پێشكەشكردووە بەڵام كاتەكەى بە گونجاو نەزانراوە، ئێستاش داواى كردووەتەوە و پێموايە جۆرێك لە هەماهەنگى كردووە لەگەڵ سەروو خۆيەوە."  

  

سەبارەت بەوەى كە دەستلەكاركێشانەوەكەى بەهۆى جۆرێك لە فشارەوە نەبووە لەسەرى، ئەو پەرلەمانتارەى فراكسيۆنى گۆڕان جەختیکردبووە "نەخێر هەر وەك ئەندامێكى فراكسۆنى گۆڕان دەمێنێتەوە و هيچ گرفتێكى نييە و بەو شێوازەش بەردەوام دەبێت، لە خولى پێشوو و ئەم خولەش يەكێكە لە ئەندامە چالاكەكانى پەرلەمان و دەتوانێت خزمەتى بزوتنەوەى گۆڕان و هاونيشتمانيانيش بكات."