گه‌ڕان

Shadow Shadow
سیاسه‌تی

’کاتى قسە و بەڵێندان نیە، کاتى کارکردنە’

مستەفا ئەدیب لەلایەن سەرۆکى لوبنانەوە بۆ پێکهێنانى کابینەى نوێى ئەو وڵاتە ڕاسپێردرا

2020.08.31 - 15:50
مستەفا ئەدیب لەلایەن سەرۆکى لوبنانەوە بۆ پێکهێنانى کابینەى نوێى ئەو وڵاتە ڕاسپێردرا

ناس کورد-

مستەفا ئەدیب ڕاسپێدراو بۆ کابینەى نوێى لوبنان ڕایگەیاند، هیواخوازە تیمێکى هەماهەنگارى بەتوانا و شیاو دروست بکات و بتوانن لەگەڵ پەرلەماندا هەنگاوەکانى چاکسازى دەستپێبکەن.

 

دواى ڕاسپاردنى لەلایەن میشیل عەونى سەرۆکى لوبنانەوە بۆ پێکهێنانى کابینەى نوێ، مستەفا ئەدیب لەوتەیەکیدا ئاماژەى بۆ ئەوە کرد هیچ وادەیەک بۆ قسەکردن و بەڵێندان نەماوەتەوە بەڵکو کاتى کارکردنە بەخێرایى بۆ پێکهێنانى کابینەى نوێى حکومەت.

 

ئەدیب، جەختى لەسەر ئەوە کردەوە، ئەوەى پێویستیان پێیەتى کارکردنە بەهەماهەنگى بۆ ڕزگارکردنى لوبنان و دەرفەتەکەش لەبەردەمیاندا زۆر بەرتەسکە و دەبێت لایەنە سیاسیەکانیش هەستیان بەوە کردبێت.

 

سەرۆکوەزیرانى ڕاسپێرداو ڕاشیگەیاند، قەدەریان وایە زاڵببنە سەر خەم و ئاریشە و ئازارەکانیاندا و سووربن لەسەر ئەوەى بەخۆڕاگرى دەمێننەوە بۆ گەڕاندنەوەى ئومێد بۆ ئایندە.

 

بەگوێرەى ئاژانسەکان ئەدیب گەیشتە کۆشکى بەعبەدا بۆ دیدارى عۆن و سەرۆکى پەرلەمان بەمەبەستى ڕاسپاردنى بەپێکهێنانى کابینەى نوێ لەشوێن کابینەکەى حەسەن دیاب کە دواى سەرهەڵدانى خۆپیشاندان و ناڕەزایەتیەکان بەهۆى ڕوداوى تەقینەوەکەى بەندەرى بەیروتەوە دەستیلەکارکێشایەوە.

 

مستەفا ئەدیب کێیە..؟

 

تەمەنى 48 ساڵە و لە 2013ەوە  باڵیۆزى لوبنانە لەئەڵمانیا و هەڵگرى بڕوانامەى دکتۆرایە لەزانستە سیاسیەکان و سەرەتا وەکو مامۆستاى یاساى نێودەوڵەتى و دەستورى لەزانکۆ جیاوازەکانى لوبنان و فەڕەنسا دەستى بەکارکردن کردووە.

 

هەر لەو ساڵەدا بووەتە ڕاوێژکارى نەجیب میقاتى و دواتریش کراوەتە باڵیۆز.

 

لەساڵانى نێوان 2005 و 2006 و لەحکومەتەکەى میقاتیدا سەرۆکى کۆمەڵەى لوبنانى بۆ یاسا نێودەوڵەتیەکان و کۆمەڵەى لوبنانى بۆ زانستە سیاسەکان بووە.