گه‌ڕان

Shadow Shadow
سیاسه‌تی

دەستەى خاڵە سنوريەكانى عێراق بڕیاریدا خاڵە سنوریيەكانى هەرێم بە ناوەندەوە ببەستێتەوە

2020.08.26 - 23:18
دەستەى خاڵە سنوريەكانى عێراق بڕیاریدا خاڵە سنوریيەكانى هەرێم بە ناوەندەوە ببەستێتەوە

ناس کورد- 

دەستەى خاڵە سنوريەكانى عێراق ئاشكرايكرد، لەگەڵ هەرێمی کوردستان گەيشتوونەتە ڕێکكەوتن بۆ بەستنەوەى خاڵە سنوريەكانى هەرێم بە خاڵە سنورييەكانى عێراقەوە.

 

دەستەى خاڵە سنوريەكان لە ڕاگەیەندراوێکدا بڵاويكردوەتەوە: " كۆبوونەوەى ئەنجومەنى دەستەكە كراوە و گفتوگۆ لەسەر چەندين بابەتى تايبەت بە خاڵە سنوريەكان كراوە و چەندين بڕيار لەو بارەيەوە دراون و ژمارەيەك ڕێنماييش دەركراون و لەگەڵ هەرێمی کوردستان گەيشتووینەتە ڕێکكەوتن بۆ بەستنەوەى خاڵە سنوريەكانى هەرێم بە خاڵە سنورييەكانى عێراقەوە." 

 

ئەوەش هاتووە، يەكێك لە تەوەرەكانى كۆبوونەوەكە گفتوگۆكردن بووە لەسەر فەرمانى ديوانیى ژمارە 83ى تايبەت بە نوێكردنەوەى بەڕێوەبەرايەتیى پاراستنى فڕۆكەخانەكان كە فەرمانەكە دەرچووە بۆ دەستكردن بە كارەكانيان لە فڕۆكەخانەكانى هەولێر و سلێمانى لە هەرێمى كوردستان.

 

ڕونيشكراوەتەوە، تا ئێستا حكومەتى هەرێمى كوردستان هيچ وەڵامى نەداوەتەوە بۆ چالاككردنى فەرمانەكە و هەروەها كارمەندى پێويست بۆ ئەو كارە بەردەست نييە.

 

ئەوەش هاتووە، سەرەڕاى ئەوەش ئەندامانى ئەنجومەنە ڕێكەوتوون لەسەر ڕێنماييەك كە تەئكيد لە گرنگى پابەندبوونى هەرێمى كوردستان بە بڕيارى ژمارە 13 ى ساڵى 2019 دەكاتەوە.

 

سەبارەت بە بڕيارەكە ڕوونكراوەتەوە، لە يەكێك لە بڕگەكانيدا هاتووە خاڵە سنوریيەكانى هەرێم ببەسترێنەوە بە خاڵە سنوريەكانى ناوەندەوە و هەروەها هەڵوەشانەوەى ئەو بەرێوەبەرايەتييە و نوێكردنەوەى بەڕێوەبەرايەتييەكى تر كە ئاسايشى فڕۆكەخانەكان بگرێتە دەست.

 

لەبەشێكى ترى ڕاگەیەندراوەکەدا هاتووە، تەئكيد لەوە كراوەتەوە كە پێويستە لەسەر ڕێنمايى سەرۆكوەزيران حاويە مەترسيدارەكان لە سەرجەم دەروازە سنوريەكان دووربخرێنەوە بە خێرايى و بگوازرێنەوە ناوچەى ئارام، ئەوەش لە كارە لەپێشينەكانى ئاسايشى نەتەوەييە.