گه‌ڕان

Shadow Shadow
سیاسه‌تی

هیومان ڕایتس وۆچ داواى ئاشکراکردنى بەپەلەى لێکۆڵینەوەى تیرۆرکردنى چالاکوانانی عێراق دەکات

2020.08.26 - 15:24
App store icon Play store icon Play store icon
هیومان ڕایتس وۆچ داواى ئاشکراکردنى بەپەلەى لێکۆڵینەوەى تیرۆرکردنى چالاکوانانی عێراق دەکات

ناس کورد-

ڕێکخراوى هیومان ڕایتس وۆچ داوا دەکات حکومەتى عێراق بەپەلە ئەنجامى لێکۆڵینەوەکان لە پڕۆسەکانى توندوتیژى بەرانبەر خۆپیشاندەران و تیرۆرکردنى چالاکوانان ئاشکرابکات لەناویاندا تیرۆرکردنى هیشام هاشمى.

کەناڵی ناس کورد لە تێلیگرام جۆین بکە   

 

ڕێکخراوەکە ئەمڕۆ چوارشەممە (26ی ئابی 2020) لە ڕاگەیەنراوێکدا ڕایگەیاند "دەسەڵاتداران هیچ شتێکیان نەکردووە مایەى باسکردن بێت بۆ ڕاگرتنى کوشتنى چالاکان و خۆپیشاندەران، گەرچى مستەفا کازمیى سەرۆکوەزیران بەڵێنی دا لێپرسینەوە لەبەکارهێنانى هێزى لەرادەبەر بکات لەلایەن هێزە ئەمنییەکانەوە  لەسەرەتاى مانگى ئایاردا، بەڵام  هیچ بەرپرسێکى ڕاپێچى بەردەم دادگا نەکردووە ، لەبرى ئەوە چەند کارمەندێکى پلە نزم براونەتە بەردەم دادگا".

 

بەڵقیس والى، توێژەرى بەشى قەیران و ناکۆکییەکانى ڕێکخراوەکە دەڵێت، "بارودۆخەکە لەعێراقدا توندتربووە تا ئاستێک چەکدارەکان دەتوانن بەشەقامەکاندا بسوڕێنەوە و تەقە لەچالاکانى مەدەنى بکەن بێ ئەوەى سزابدرێن، ئەمەش گومانى کردووە دۆخەکە ڕوون نەبێت کە ئایا حکومەت دەتوانێت لەم قۆناغەدا کۆتایى بە توندوتیژیەکان بهێنێت و دادپەوەرى بۆ قوربانیان فەراهەم بکات".

 

هیومان ڕایتس وۆچ باسى لەچەند چەند ڕوداوێکى تەقەکردن لەچالاکان و نوسەران و کەسایەتیە دیارە ناڕازییەکان کردووە لایەن گروپە نادیارەکانەوە کە بەهۆیەوە کوژراون یاخود بریندار کراون کە  لەزۆربەى شارەکانى ناوەڕاست و خوارووى عێراق.

 

باسى لەوەشکردووە، لەزۆربەى ئەو ڕوداوانەشدا کە لەماوەکانى ڕابردوودا روویانداوە پەنجەى تۆمەت بۆ میلیشیا چەکدارەکانى سەر بەئیران لەعێراقدا ڕاکێشراوە و حەشدى شەعبیش بەدەر نەکراوە لەو تۆمەتبارکردنانە.

 

ڕێکخراوەکە دەڵێت، پێویستە حکومەتى فیدراڵى دەستبەجێ ئەنجامە سەرەتاییەکانى لیژنەکانى لێکۆڵینەوە لەسەر ئەو ڕوداوانە ئاشکرا بکات و کاتێکى دیارێکراویش بۆ وردەکاریەکان کە لیژنەکانى لێکۆڵینەوە پێدەگەن دابنرێت.

 

هیومان ڕایتس وۆچ داواش دەکات، ئەنجامى لێکۆڵینەوەکان بۆ ڕوداوى خۆپیشاندانەکان کە لەتشرینى ساڵى 2019 ەوە دەستى پێکرد و سەدان قوربانیى لێکەوتەوە و حەشدى شەعبیش تۆمەتبار کرا ئاشکرا بکرێن بۆ ئەوەى لەداهاتوودا ڕێگرى بکرێت لەهێزە ئەمنیەکان بۆ سەرکوتکردنى ناڕەزایەتییە جەماوەرییەکان.