گه‌ڕان

Shadow Shadow
سیاسه‌تی

’’ئەوەی ڕوویدا هێرشی چەکداری بوو نەک خۆپیشاندان’’

بەرپرسی لقی پارتی لە هەڵەبجە: بەڵێ شەوی ڕابردوو تەقەمان بەسەر خۆپیشاندەراندا کرد

2020.08.23 - 10:43
بەرپرسی لقی پارتی لە هەڵەبجە: بەڵێ شەوی ڕابردوو تەقەمان بەسەر خۆپیشاندەراندا کرد

ناس کورد-

بەرپرسی لقی 12ی پارتی لە هەڵەبجە دانی بەوەدانا کە شەوی ڕابردوو تەقەیان بەسەر خۆپیشاندەراندا کردووە و وتیشی، ئەوەی دوێنێ شەو کرا خۆپیشاندان نەبوو بەڵکو هێرشی چەکداری بوو.

 

ئەمڕۆ یەکشەممە، 23ی ئابی 2020، بەسام عەلی، بەرپرسی لقی 12ی پارتی لە هەڵەبجە لە کۆنفرانسێکی ڕۆژنامەوانیدا ڕایگەیاند: "شەوی ڕابردوو لەچوار لاوە هێرشی چەکداری کرایەسەر لقی 12ی پارتی و تەقەیەکی زۆرمان لێکرا و نزیکبوو بەچەکەوە بێنە ناو لق."

 

وتیشی: "کاتێک ئەوە ڕوویدا ناچاربووین کە تەقە بەسەر خۆپیشاندەراندا بکەین، ئەوەش تەنها بۆ دوورکەوتنەوەیان، بەڵگەش بۆ ئەوە ئەوەیە کە خوێنی کەس نەڕژاوە لە رووداوەکەدا."

 

بەرپرسی لقی 12ی پارتی لە هەڵەبجە ئاماژەی بەوەشكرد: "ئێمە هەموو هەوڵێکماندا کە کاردانەوەمان نەبێت و بە کادرانی خۆمان کە هیچ کاردانەوەیەکیان نەبێت و خوێنی هاووڵاتیان گرنگرە لە دەرگا و پەنجەرەی بارەگا، بەڵام دواتر ناچاربووین ئەو کارە بکەین."

 

بەرپرسەکەی پارتی لە هەڵەبجە ئەوەشی خستەڕوو: "ئەوەی شەوی ڕابردوو کرا خۆپیشاندان نەبوو، بەڵکو هێرشێکی چەکداری بوو بۆسەر دامودەزگا حکومییەکان و لقی 12ی پارتی."

 

باسی لەوەشكرد: "پێمان سەیرە کە تەنها هێرشکرایەسەر بارەگای ئێمە و هێرشنەکراوەتەسەر بارەگای هیچ حزبێکی سیاسی، ئێمە لە هەڵەبجە حزبێکی دەسەڵاتدار نین و هیچ پۆستێکی حکومیمان نییە لەم سنورە."